Samstarf þrátt fyrir sérframboð?

Formaður Samfylkingarinnar óttast að R-listinn sé í dauðateygjunum. Hún telur samt að flokkarnir, sem að honum standa, vilji taka upp samstarf að loknum borgarstjórnarkosningum þótt þeir bjóði fram sjálfstætt. Forsvarsmenn Vinstri - grænna halda fund um framtíð R-listans klukkan átta í kvöld. Ingibjörg Sólrún Gísladóttir, formaður Samfylkingarinnar, er ekki bjartsýn á að R-listinn bjóði fram í næstu borgarstjórnarkosningum. Hún telur að það séu meiri líkur en minni á því að svo verði ekki eftir að hafa rætt við fólk um helgina. Árni Þór Sigurðsson, borgarfulltrúi Vinstri - grænna, segir samstarf flokkanna fjarri því að vera lokið en segir þó vel koma til greina að þeir bjóði fram sjálfstætt í næstu borgarstjórnarkosningum. Árni segir enn fremur að verði það niðurstaðan verði svo að vera en það þýði ekki að menn geti ekki starfað saman því það sé ekki málefnaágreiningur sem valdi því hugsanlega að menn bjóði fram hver í sínu lagi. Björk Vilhelmsdóttir, borgarfulltrúi Vinstri - grænna, telur að samstarf Samfylkingarinnar og Framsóknar sé útilokað að loknum kosningum verði enginn R-listi til. Líklegra sé að Framsókn og Sjálfstæðisflokkurinn taki saman. Það blasi því við vinstri - grænum að sitja áhrifalausir í stjórnarandstöðu náist ekki samkomulag um áframhald R-listans. Árni Þór, flokksbróðir Bjarkar, er henni ósammála. Hann segir það verulega einföldun að láta sem kostirnir séu aðeins áframhaldandi R-listasamstarf eða stjórnarandstaða. Hann viðurkennir þó ekki að erfiðleikar séu innan Vinstri - grænna. Árni vildi engu svara um hver niðurstaðan yrði. Ingibjörg Sólrún segir líkt og Árni grundvöll vera fyrir áframhaldandi samstarfi eftir kosningar þótt R-listinn deyi drottni sínum. Ef það sé einlægur vilji og ásetningur fólks að vinna saman sé að sjálfsögðu alltaf grundvöllur til samstarfs. Það verði enginn barinn til ásta en hins vegar hafi hagkvæmnishjónabönd oft reynst vel. Fundur Vinstri - grænna verður haldinn að Vesturgötu 7 í Reykjavík klukkan átta í kvöld en hvort niðurstaða fáist í málið er ekki gott að segja til um. Með hverjum degi sem líður án þess að málið sé útkljáð minnka líkurnar á sameiginlegu framboði R-listaflokkanna.