Best vill reka Eriksson

Knattspyrnugoðsögnin George Best, sem gerði garðinn frægan hjá Manchester United á sínum tíma, liggur ekki á skoðunum sínum þegar kemur að málum enska landsliðsins í knattspyrnu og segir að reka ætti Eriksson úr starfi hið snarasta. Best er norður-írskur og fagnaði innilega með þjóð sinni eftir sigurinn á Englendingum í Belfast á dögunum, en eftir leikinn var hann spurður hvað hann hefði gert ef hann réði hlutunum hjá enska knattspyrnusambandinu. "Ef ég fengi að ráða, myndi ég eflaust reka þjálfarann. Þetta var auðmýkjandi tap og ég held að ég myndi ráða einhvern annan í staðinn. Englendingar eru með frábært lið, það vantar ekki, en þeir eru ekki að ná að smella saman sem lið inni á vellinum. Þeir hafa þó enn smá tíma til að stilla saman strengi sína, svo við skulum ekki dæma þá úr leik alveg strax," sagði Best.