Leita ráða við leirfoki úr lóninu

Starfsmenn Landsvirkjunar og Landgræðslunnar vinna nú að lausn á því hvernig hefta megi sand- og leirfok frá uppistöðulóninu við Kárahnjúkavirkjun, að sögn Sveins Runólfssonar landgræðslustjóra. Þegar virkjunin verður komin í notkun, lónsstæðið hefur fyllst og síðan sigið úr því aftur, situr mikið magn af leir eftir. Verulegt fok getur orðið upp úr lóninu þegar leirinn þornar og hvessir í veðri. Slíkt getur haft í för með sér gróðureyðingu og uppblástur á stóru svæði. "Við höfum verið að vinna með Landsvirkjun að finna lausnir á því að stöðva þetta fok áður en það fer út á gróið land," sagði Sveinn Runólfsson. "Ljóst er að þarna hefur á undanförnum árum verið heilmikið leirfok af aurum Jöklu og einnig Jökulsár á Fjöllum. En í samtölum við sérfræðinga Landsvirkjunar hefur komið fram að þeir séu staðráðnir í að koma í veg fyrir slíkt áfok úr lóninu. Auðvitað ráða menn ekki við það sem fer í loftið. En rannsóknir sem standa yfir miða að því að stöðva þetta grófara efni, sem gæti fokið með skriði út úr lónsstæðinu. Ég er sannfærður um að það muni takast, en það gæti orðið heilmikið verkefni í einstökum árum. Þetta verður örugglega misjafnt milli ára." Spurður um stærð leirfoksvæðisins sagði Sveinn að ekki væri búist við alvarlegu uppfoki nema öðrum megin við lónið. Það svæði væri 20 kílómetra langt og kannski um 100 metra breitt. "Uppi eru hugmyndir um að reisa svokallaðar fok - eða sandgildrur," sagði Sveinn spurður um hugmyndir til að hefta leirfokið. "Við erum nú með slíka rannsókn í gangi niður á Landeyjasandi til þess að finna hagkvæmustu lausnina. Skoðaður hefur verið möguleikinn á notkun rykbindiefna. Ég er ekki mjög trúaður á þá aðferð. Loks eru menn með hugmyndir um einhvers konar áveitur og að bleyta í leirunum sem hætta væri á að fyki úr. Menn eru að úða stór svæði í landbúnaði um allan heim. Þetta er vel gerlegt því þegar frost er farið úr jörðu að vori þá er hætta á foki í tiltölulega skamman tíma. Það getur hvesst vel einu sinni eða tvisvar á því tímabili sem virkilega þarf að gera eitthvað."