Lækka á listanum enn einn mánuðinn

Eftir markalaust jafntefli gegn Maltverjum og stórtap á heimavelli fyrir Svíum á heimavelli þurfti það ekki að koma mikið á óvart að íslenska knattspyrnulandsliðið lækkaði enn einu sinni á styrkleikalista Alþjóðaknattspyrnusambandsins sem var birtur í gær. Íslenska landsliðið lækkaði sjötta mánuðinn í röð og er komið niður í 90. sætið á listanum. Landsliðið hafði aldrei verið neðar en í 88. sæti fyrir daginn í gær en í því sæti var liðið í síðasta mánuði sem og í ágúst 1997. Meðal þjóða sem við misstum upp fyrir okkur er Afríkuríkið Tógó sem bætist þar með í hóp með Angóla, Kenía, Gvæjana og Sýrlandi sem öll teljast vera með betri knattspyrnulandslið en Íslendingar í dag. Íslenska liðið komst í 42. sæti í ársbyrjun 2000 en var í 58. sæti í ársbyrjun á umræddum lista og hefur fallið um heil 32 sæti á þessum ellefu mánuðum, þar af niður um 34 sæti frá því í maí þegar íslenska liðið var í 56. sæti á listanum. Íslenska landsliðið hefur nú farið niður um sæti á listanum sex mánuði í röð en engin önnur þjóð hefur fallið hraðar niður listann á þessu ári eða fallið niður listann svo marga mánuði í röð. Næst okkur í falli niður FIFA-listann af Evrópuþjóðunum kemur landslið Skotlands sem hefur fallið um 23 sæti á árinu en þjálfari Skota, Berti Vogts, sagði einmitt starfi sínu lausu á dögunum. Íslenska landsliðið vann aðeins einn af níu landsleikjum sínum á árinu, töpin urðu sex, þar af fimm þeirra í sjö landsleikjum frá því í lok maí. Af gengi hinna liðanna í riðli Íslands er það frétt að Svíar hækka sig um sjö sæti upp í það 15., Króatar standa í stað í 23. sætinu, Búlgarar hækka sig um fjögur sæti upp í það 37. og Ungverjar lækka um sex niður í það 74. en Maltverjar hækka sig um eitt sæti og fara upp í 132. sæti listans. Hæsta fall á FIFA-listanum á árinu- 32 sætiÍsland(58-90)- 24 sætiMadagaskar(118-142)- 23 sætiSkotland(54-77)- 22 sætiBelgía(16-38)- 21 sætiKongó(56-77)- 20 sætiBosnía og Hersegóvína(59-79)- 18 sætiLesótó(120-138)- 18 sætiEþíópía(130-148)   Fall íslenska liðsins síðustu mánuðiMaí 200456. sætiJúní 200465. sæti (-9 sæti)Júlí 200475. sæti (-10 sæti)Ágúst 200479. sæti (-4 sæti)September 200480. sæti (-1 sæti)Október 200488. sæti (-8 sæti)Nóvember 200490. sæti (-2 sæti)