Engar afsakanir

Viggó Sigurðsson, landsliðsþjálfari í handknattleik, tilkynnti í gær sinn fyrsta landsliðshóp sem fer á World Cup í Svíþjóð í næstu viku. Það eru miklar breytingar á landsliðshópnum en átta leikmenn koma nýir inn frá hópnum sem fór til Aþenu. Þeir eru Birkir Ívar Guðmundsson, Hreiðar Guðmundsson, Logi Geirsson, Vignir Svavarsson, Þórir Ólafsson, Arnór Atlason, Einar Hólmgeirsson og Markús Máni Michaelsson. Viggó hefur tilkynnt Guðmundi Hrafnkelssyni og Rúnari Sigtryggssyni að þeir muni ekki spila með landsliðinu undir hans stjórn og má því leiða líkum að því að landsliðsferill þeirra sé á enda. Ólafur Stefánsson hefur ákveðið að taka sér frí frá þessari keppni og Sigfús Sigurðsson er að skríða til baka eftir uppskurð. Kristján Andrésson er einnig meiddur og leikur ekki handbolta næstu mánuðina. Gylfi Gylfason og Róbert Sighvatsson hlutu ekki náð fyrir augum landsliðsþjálfarans að þessu sinni en eru samt í myndinni hjá þjálfaranum sem og Ragnar Óskarsson sem virðist seint ætla að fá almennilegt tækifæri með íslenska landsliðinu. Það eru ekki margir dagar í fyrsta leik á mótinu í Svíþjóð en Ísland leikur gegn Evrópumeisturum Þjóðverja á þriðjudag. Það segir sig því sjálft að Viggó fær ekki mikinn tíma til þess að slípa þetta óreynda lið til en hann setur engu að síður markið hátt eins og hann hefur alltaf gert. "Ég stend við það sem ég sagði þegar ég tók við starfinu að það þyrfti að gera breytingar á þessum landsliðshóp. Ég mun ekki afsaka mig fyrir fram að ég sé að fara með nýtt og óreynt lið á þetta mót. Það er bara þannig að ef maður ætlar að vera landsliðsþjálfari á Íslandi þá verður maður að gera væntingar. Annars getur maður bara verið einhvers staðar annars staðar. Þó ég geti ekki mótað liðið mikið þá geri ég þær kröfur að liðið nái árangri því við erum hátt skrifaðir í handbolta og erum með góða leikmenn. Liðið er byggt upp af atvinnumönnum sem eru að spila fyrir mikla peninga og við höfum engar afsakanir," sagði Viggó ákveðinn. Frumraun hans með landsliðið verður langt frá því að vera auðveld því fyrir utan að mæta Þjóðverjum á þessu móti er Ísland einnig í riðli með Frökkum og Ungverjum. Við mætum Frökkum á miðvikudag og Ungverjum á fimmtudag en þess má geta að allir leikir íslenska liðsins verða sýndir beint á Sýn.