Meistarar Detroit töpuðu

Tíu leikir voru í NBA-körfuboltanum í gærkvöldi. Miami og Minnesota töpuðu leikjum sínum á heimavelli, Miami með tólf stigum fyrir Portland og Minnesota með ellefu stigum fyrir Seattle. Óvænt úrslit urðu þegar Charlotte Bobcats sigraði meistarana í Detroit Pistons 91-89. Nokkrir leikmenn í Detroit-liðinu tóku út leikbann vegna slagsmála gegn Indiana um helgina. Önnur úrslit urðu þau að Washington vann Toronto, Indiana sigraði Boston, New York vann Atlanta, Denver marði sigur á New Jersey, Golden State þurfti þrjár framlengingar til þess að leggja New Orleans að velli, LA Lakers sigraði Milwaukee með fjögurra stiga mun og Sacramento hafði betur gegn Houston.