Gretzky útilokar ekki þjálfun

Kanadíska íshokkígoðið Wayne Gretzky hefur ekki lokað dyrunum á það að þjálfa í NHL-deildinni þegar hún hefst að nýju. Forráðamenn Phoenix Coytoes hafa sótt að Gretzky um að taka að sér þjálfun liðsins en ekkert hefur enn verið gefið út í þeim efnum. "Þetta er ekki hátt á forgangslistanum að svo stöddu en ég hef þó ekki neitað neinu," sagði Gretzky, sem er talinn einn allra besti íshokkíleikmaður sögunnar. NHL-deildin er býsna illa stödd um þessar mundir og hefur verkfall liðseiganda gert það að verkum að deildin hefur tapað 123 milljónum dollara það sem af er.