Sýslumaður tekur málið fyrir

Það ræðst í dag hvort sýslumaður á Akureyri fellst á lögbannsbeiðni útgerðarfélags togarans Sólbaks á samtök sjómanna, til að koma í veg fyrir truflanir við löndun úr togaranum, sem er væntanlegur til lands í fyramálið. Það er Útgerðarfélag Sólbaks ehf, í eigu Brims, sem fór í gær fram á lögbann gegn Sjómannasambandinu, Sjómannafélagi Eyjafjarðar, Farmanna- og fiskimannasambandinu, Vélstjórafélaginu og Einingu-Iðju, til að koma í veg fyrir að að menn á þeirra vegum trufli, eða komi í veg fyrir löndun úr togaranum, eins og gerðist í síðustu viku. Málið var tekið fyrir hjá sýslumanni í gær og aftur klukkan níu í morogun og var þar ákveðið að taka það aftur fyrir klukkan þrjú í gær. Að sögn Sigurðar Eiríkssonar hjá Sýslumanni er stefnt að því að úrskurður liggi þá fyrir. Togarinn er nú að veiðum fyrir austan land og fallist sýslumaður ekki á lögbannið, er ekki loku fyrir það skotið að hann verði látinn landa á Eskifirði, en löndunarmenn þar hafa lýst sig fúsa til að landa úr honum, þrátt fyrir tilmæli verkalýðsfélaga um að gera það ekki. Útgerðin ákvað fyrir helgi að krefjast skaðabóta fyrir tafir, sem fulltrúar fyrrgreindra félaga ollu við síðustu löndun úr skipinu.