Sumarið komið til Danmerkur

Loksins, loksins, segja Danir, og eiga þá við að loksins sé sumarið komið til landsins. Það hefur ekki komið svona seint síðan 1874. Dag eftir dag, allt frá því í maí, hafa Danir litið til himins og hrist höfuðið í forundran yfir tíðarfarinu. Jótlandspósturinn segir að samkvæmt þarlendum stöðlum hafi sumarið ekki komið til Danmerkur fyrr en síðastliðinn föstudag. Talað er við veðurfræðing, sem segir að sumarið hafi ekki komið svona seint, til landsins síðan mælingar hófust árið 1874. Hann segir að nokkrum sinnum á þessu tímabili hafi sumarið komið seint. Til dæmis árið 1923, þegar það kom ekki fyrr en 5. júlí og 1991 þegar það kom 4. júlí. Í ár var það semsagt ekki fyrr en 30. júlí. Ekki segir Jótlandspósturinn hverjir staðlarnir eru, en það gefur kannski einhverja vísbendingu um þá, að síðastliðinn föstudag var 25 stiga hiti í ríki Margrétar Þórhildar. Sumir virðast vera kröfuharðari en aðrir.