Gríðarlegar öryggisráðstafanir

Gríðarlegar öryggisráðstafanir hafa verið gerðar við fjármálastofnanir í New York, vegna yfirvofandi árásar hryðjuverkamanna. Þegar fjármálastofnanir í New York opnuðu fyrir viðskipti, í morgun, voru þær umkringdar vegatálmum, öryggishliðum og lögregluþjónum með hríðskotariffla og sprengjuleitarhunda. Meðal þessara fjármálastofnana voru Kauphöllin í New York, Alþjóðabankinn og Alþjóða gjaldeyrissjóðurinn. Yfirvöld í Bandaríkjunum segjast hafa fengið áreiðanlegar njósnir af því að árás vofi yfir þessum stofnunum. Upplýsingarnar bárust meðal annars frá Pakistan, en þar var háttsettur Al Kaida liði handtekinn fyrir nokkrum dögum. Upplýsingamálaráðherra Pakistans segir að í tölvu hryðjuverkamannsins hefðu fundist áætlanir um frekari árásir, á Bandaríkin og Bretland. Tom Ridge, yfirmaður heimavarnaráðuneytis Bandaríkjanna, sagði í aðvörun sinni að upplýsingarnar sem þeir hefðu fengið um yfirvofandi árás, væru skelfilega nákvæmar.