Miðaverð með því hæsta

Svíþjóð og Ísland eru í sérflokki hvað varðar miðaverð á landsleiki liðanna í áttunda riðli undankeppni heimsmeistarakeppninnar sem fram fer í Þýskalandi árið 2006. Er um þrefalt dýrara að kaupa sér miða á besta stað á landsleik Íslands, sem er í næstneðsta sæti, og kaupa miða á heimaleik Möltu, neðsta liðsins í riðlinum, sem þó hefur sama stigafjölda og Ísland. Umræðan um hátt miðaverð á knattspyrnuleiki fer vaxandi hér á landi sem erlendis. Þykir England vera í sérflokki hvað þetta varðar, hvort sem um er að ræða miða á leiki félagsliða eða hjá landsliðinu. Hefur enska samkeppnisstofnunin talið málið það alvarlegt að rannsókn stendur yfir á ástæðum þess að miðaverð í Englandi er í hróplegu ósamræmi við miðaverð annars staðar í Evrópu. Gildir einu hvort litið er til Spánar, Þýskalands, Ítalíu eða Frakklands. Sé hugur til að skreppa á góðan fótboltaleik þarf vart að gera ráð fyrir að eyða mikið meira en tvö þúsund krónum fyrir sæti á ágætum stað. Eðlilega er miðaverðið breytilegt miðað við mikilvægi hvers leiks fyrir sig en það virðist ekki vera raunin í Englandi þar sem miðaverð á leiki í úrvalsdeild fer sjaldan undir þrjú til fjögur þúsund krónur og er oft mun hærra en það. Eggert Magnússon, formaður Knattspyrnusambands Íslands, vill ekki meina að miðar á leiki íslenska landsliðsins séu dýrir en viðurkennir engu að síður þörfina á ódýrari sætum á Laugardalsvellinum. Ráðgert er að miðaverð í þær nýju stúkur sem til stendur að reisa verði ekki hærra en 1.500 krónur. "Þar er kannski mest verið að horfa til þeirra fjölskyldna sem áhuga hafa á að eyða stund saman. Eins og staðan er í dag er dýrt að fara með fjölskylduna á völlinn og því horfum við til að breyta með þeirri uppbyggingu sem vonandi fer að hefjast von bráðar. Hins vegar er miklu dýrara að fara á völlinn í Englandi eða í Skandinavíu en hér og ekki hægt að bera miðaverð hér saman við miðaverð á Möltu. Þá verður að líta til þess hvað kostar að lifa í þessum löndum líka." Samanburður við England og aðrar Norðurlandaþjóðir er þó að margra mati ekki sanngjarn heldur. Talsverður styrkleikamunur er á Íslandi og þeim þjóðum öllum samkvæmt styrkleikalista FIFA. Að Færeyjum undanskildum eru Finnar næsta norræna þjóðin fyrir ofan Ísland, í 45. sæti, Norðmenn í 37. sæti, Svíar í 22. sæti og Danir í því fimmtánda. Landslið Englands er 81 sæti fyrir ofan Ísland í því sjöunda. Af þeim þjóðum í Evrópu sem eru í nánd við Ísland á viðkomandi lista er miðaverð á leiki Albaníu margfalt lægra en hér gerist og í raun aðeins Austurríki, þremur sætum fyrir ofan Ísland, sem kemst með tærnar þar sem Ísland hefur hælanna hvað varðar miðaverð á landsleiki. Aðspurður um hvort þeir sem sækja heimaleiki íslenska liðsins séu að fá sitt fyrir peningana segir Eggert að það verði hver og einn að gera upp við sig sjálfur. "Það er nú svo að margir koma á landsleiki Íslands til að fylgjast með heimsþekktum stjörnum þeirra þjóða sem sækja okkur heim. Ég vil meina að margir fái mikið fyrir peningana þó að íslenska landsliðið sé ekki að sýna sitt besta."