KR-ingar ekki af baki dottnir

Íslandsmeistarar KR láta ekki deigan síga þrátt fyrir að vera dottnir út úr Evrópukeppninni og slæma stöðu í Landsbankadeildinni. Þeir eru þegar farnir að huga að leikmannahópnum fyrir næsta tímabil og Kristinn Kjærnested, stjórnarmaður í KR Sporti, sagði í samtali við Fréttablaðið í gær að færeyski landsliðsmaðurinn Rógvi Jacobsen, sem skoraði í báðum landsleikjunum gegn íslenska landsliðinu í fyrra, væri sá sem KR-ingar beindu sjónum sínum helst að. "Við höfum verið í sambandi við HB í Færeyjum varðandi Rógva Jacobsen en þeir hafa ekki viljað sleppa honum hingað til. Samningur hans við félagið rennur út í haust og við höfum þegar boðið honum tveggja ára samning sem hann tók mjög vel í. Hann er að klára "timburmanninn" í Færeyjum sem útleggst sem húsasmíðameistari á okkar ástkæra máli og hlakkar mikið til að koma til landsins. Hann er gífurlega öflugur framherji, stór og sterkur og kemur með kraft sem okkur hefur sárlega vantað í sumar," sagði Kristinn. Hann sagðist vonast til að heyra frá HB fljótlega en það væru hverfandi líkur á því að Rógvi kæmi til liðsins áður en þetta tímabil væri úti. "Við bíðum rólegir en það er alveg ljóst að að það þarf að hressa verulega upp á leikmannahópinn hjá okkur fyrir næsta tímabil. Þá hljótum við að beina sjónum okkar að markahæsta manni deildarinnar sem er með lausan samning í haust. Gunnar Heiðar Þorvaldsson er verulega spennandi kostur og ég tel það nánast öruggt að við munum reyna að fá hann til liðsins fyrir næsta tímabil," sagði Kristinn.