Magnús Lárusson sigraði

Hið árlega Shoot-out góðgerðamót Nesklúbbsins fór fram í áttunda sinn í gær á Nesvellinum á Seltjarnarnesi. Tíu af bestu kylfingum öttu kappi saman með Shoot-out fyrirkomulagi þar sem kylfingurinn með versta skorið á hverri holu fellur út þar til einn stendur eftir. Tvær konur mættu til leiks, þær Ragnhildur Sigurðardóttir, sem vann þetta mót í fyrra, og Íslandsmeistarinn Ólöf María Jónsdóttir. Átta karlar voru meðal keppenda, Íslandsmeistararinn Birgir Leifur Hafþórsson, Björgvin Sigurbergssson, Heiðar Davíð Bragason, Magnús Lárusson, Sigurpáll Geir Sveinsson, Ólafur B. Loftsson, Örn Ævar Hjartarson og Stefán Már Stefánsson en styrktaraðili mótsins DHL-hraðflutningar gáfu 250 þúsund krónur sem runnu að þessu sinni til "Einstakra barna" sem er félag barna með sjaldgæfa og alvarlega sjúkdóma. Magnús Lárusson, kylfingur úr Golfklúbbnum Kili í Mosfellsbæ, sem tók þátt í mótinu í fyrsta sinn fór með sigur af hólmi eftir að hafa lagt Örn Ævar Hjartarson úr Golfklúbbi Suðurnesja á lokaholunni. Magnús byrjaði illa og þurfti þrívegis að fara í svokallað Shoot-out á fyrstu holunum þar sem þeir sem eru með versta árangurinn á holunni keppa sín á milli hver dettur út. Hann komst hins vegar í gegnum þær raunir og spilaði lokaholurnar mjög vel. Hann fékk fugl á sjöundu og áttundu holu og hefði væntanlega fengið fugl á lokaholunni ef Örn Ævar hefði ekki gefið honum auðvelt pútt og sigurinn. Magnús var glaðbeittur þegar Fréttablaðið ræddi við hann að móti loknu og sagði þetta mót vera hörkuskemmtilegt. "Þetta er skemmtilegt fyrirkomulag, ekkert stress og virkilega gaman að spila. Ég byrjaði afar illa en náði mér síðan á strik og get ekki verið annað en sáttur með sigurinn í fyrstu tilraun," sagði Magnús.