Tvö örugg til Aþenu í frjálsum

Ólympíuhópur Íslands í frjálsum íþróttum samanstendur í dag af tveimur einstaklingum, tugþrautarkappanum Jóni Arnari Magnússyni og stangarstökkskonunni Þóreyju Eddu Elísdóttur. Þessi tvö hafa náð lágmörkum fyrir ólympíuleikana í Aþenu, frestur til þess rennur út 9. ágúst næstkomandi. Guðmundur Karlsson, landsliðsþjálfari í frjálsum íþróttum, sagði í samtali við Fréttablaðið í gær að hann vonaðist að sjálfsögðu eftir því að hópurinn myndi stækka áður en fresturinn til ná lágmörkum myndi renna út. "Við vorum með fjóra keppendur á síðustu leikum í Sydney en það væri ekkert áfall þó að keppendurnir yrðu aðeins tveir í þetta skiptið. Við myndum þá mæta til leiks með keppendur sem eru báðir líklegir til að fara í tólf manna úrslit í sínum greinum og það er sómi fyrir hverja einustu þjóð," sagði Guðmundur. Aðspurður sagði Guðmundur að nokkrir íþróttamenn væru nálægt því að ná lágmörkunum fyrir leikana og taldi hann spjótkastarana Vigdísi Guðjónsdóttur og Ásdísi Hjálmsdóttur, sem varð í sjötta sæti á HM 19 ára og yngri á dögunum, líklegastar. "Þær eru stutt frá lágmarkinu, sérstaklega Ásdís sem er aðeins 51 sentimetra frá lágmarkinu. Þær munu báðar reyna við lágmarkið á meistaramótinu um helgina og miðað við hvernig þær hafa kastað þá er ég bjartsýnn fyrir þeirra hönd. Ásdís er mjög ung en það væri frábært fyrir hana að komast inn núna. Hún á eftir að verða fastagestur á stórmótum í framtíðinni en aðalmarkmiðið hjá henni er að stefna á ólympíuleikana í Peking 2008." Guðmundur sagðist einnig vonast til þess að kringlukastarinn Magnús Aron Hallgrímsson myndi höggva nærri lágmarkinu. "Hann hefur verið mikið meiddur en kastaði 58 metra á sínu fyrsta móti í langan tíma á dögunum þrátt fyrir að aðstæður væru ekki góðar. Hann hefur kastað best 63,09 sem er yfir lágmarkinu en auðvitað þarf hann að hitta á mjög góðan dag. Hann þarf að ná nokkrum mótum í röð og þá gæti þetta smollið hjá honum." Guðmundur sagði að sömu sögu væri að segja um Völu Flosadóttur. "Það vita allir hvað Vala getur og hún gæti þess vegna stokkið yfir 4,40 sem er lágmarkið fyrir Aþenu. Hún hefur verið meidd á læri en er orðin góð og gæti þess vegna náð lágmarkinu í Bikarkeppni FRÍ sem fer fram 6.-7. ágúst. Það er síðasti möguleikinn til að ná lágmarkinu og ég verð að vera bjartsýnn á að einhverjum takist það," sagði Guðmundur.