Umsátrinu lauk í nótt

Nítján klukkustunda umsátri um mannræningja sem héldu sex manns í gíslingu í rútu í Aþenu lauk í nótt, þegar ræningarnir gáfust upp. Upphaflega voru 23 í rútunni sem mennirnir rændu í Aþenu snemma í gærmorgun. Í gærdag slepptu mannræningjarnir svo smám saman yfir daginn meirihluta gíslanna, en héldu sex eftir. Mennirnir, sem reyndust frá Albaníu, höfðu gert kröfu um að vera ekið út á flugvöll og vildu fljúga þaðan til Rússlands. Þá hótuðu þeir að sprengja upp rútuna fengju þeir ekki sem svarar 85 milljónum íslenskra króna. Í gærdag slepptu mannræningjarnir smám saman yfir daginn meirihluta gíslanna. Þeir sögðust vera vopnaðir sprengiefni, en síðar kom í ljós að pokinn sem þeir veifuðu var tómur. Jafnframt varð ljóst að þeir voru ekki með sprengjur eins og talið var í upphafi, heldur voru þeir aðeins vopnaðir tveimur haglabyssum. Ástandið var að lokum fremur vonlítið fyrir mannræningjana, sem gáfust, eins og fyrr sagði upp, rétt fyrir klukkan eitt í nótt. Í ljós kom að þeir höfðu ekki í huga að fara til Rússlands, heldur Albaníu. Fyrir fimm árum síðan var tveimur rútum rænt á Grikklandi á tveggja mánaða tímabili. Í báðum tilfellum var um Albana að ræða sem krafðist þess að komast til Albaníu, og í báðum tilfellum var ræninginn skotinn til bana af lögreglu.