Ný flugstöð útilokar samgöngumiðstöð

Í umræðum um ósk Iceland Express um aðstöðu til innanlandsflugs á Reykjavíkurflugvelli hefur þeirri hugmynd verið varpað fram að reisa bráðabirgðaflugstöð við hlið afgreiðslu Flugfélags Íslands. Á sama tíma stendur yfir undirbúningur að smíði samgöngumiðstöðvar norðan Loftleiðahótelsins. Formaður verkefnisstjórnar samgöngumiðstöðvar er Ólafur Sveinsson, stjórnarformaður Flugstoða, og sagði hann í samtali við Stöð 2 í dag að verkefnið væri það langt komið að framkvæmdir gætu hafist innan fárra mánaða. Beðið væri eftir svörum frá skipulagsyfirvöldum í Reykjavík. Telur hann að samgöngumiðstöðin gæti verið tilbúin í ársbyrjun 2010, innan tveggja ára. Ólafur segir hins vegar að ef farið verður í byggingu flugstöðvar vestan megin vallarins þá verði samgöngumiðstöð ekki byggð. Það telji hann að sé öllum ljóst og telur enga breyta þótt hún yrði kölluð bráðabirgðaflugstöð enda sé núverandi flugafgreiðsla búin að vera til bráðabirgða í hálfa öld. Menn þurfi því að velja á milli þess að byggja samgöngumiðstöð eða flugstöð.