Becromal lofar úrbótum vegna sýrustigs í frárennsli

Stjórn Becromal Iceland ehf segir í yfirlýsingu sem þeir sendu frá sér að unnið verði með fagaðilum og hagsmunaaðilum að úrbótum þeirra vandkvæða sem starfsemin hefur átt við að etja.

Búið að safna 17 milljónum fyrir Japan

Rauði krossinn í Japan hefur stóreflt neyðaraðgerðir sínar fyrir fórnarlömb hamfaranna miklu sem riðu yfir landið fyrir hálfum mánuði. Rauði krossinn sinnir allri heilbrigðisþjónustu á vettvangi og í fjöldahjálparstöðvum á hamfarasvæðunum þar sem nálægt þrjú hundruð þúsund manns eru enn. Í neyðarsveitum Rauða krossins eru einnig sérfræðingar sem veita sálrænan stuðning og áfallahjálp.

Þýskukennarar áhyggjufullir

Félag þýzkukennara lýsir yfir þungum áhyggjum af stöðu og framtíð tungumálanáms í framhaldsskólum landsins. Þýskukennarar eru uggandi yfir fyrirhugaðri skerðingu á tungumálakennslu og telja hana leiða til einsleitari hóps íslenskra ungmenna sem hefur takmarkaðri aðgang að Evrópu og alþjóðasamfélaginu. Á aðalfundi Félags þýzkukennara sem haldinn var 18. mars 2011 spunnust miklar umræður um stöðu og framtíðarhorfur þýskunáms og -kennslu í framhaldsskólum landsins, í ljósi nýrra laga og drögum að námsskrá. Þar var samþykkt eftirfarandi ályktun: "Engum dylst nauðsyn þess að læra erlend tungumál og þá fleiri en ensku til þess að auka enn frekar menningarlæsi og víðsýni nemenda. Í því samhengi vill félagið undirstrika mikilvægi þess að Íslendingar hafi þýsku á valdi sínu. Löng hefð er fyrir menningar- og viðskiptatengslum milli Íslands og þýskumælandi þjóða. Þýskaland er eitt mikilvægasta viðskiptaland okkar og eru þýskumælandi ferðamenn einn fjölmennasti hópurinn sem sækir Ísland heim á hverju ári. Lykillinn að því að Íslendingar geti áfram stundað nám og aflað sér þekkingar í þýskumælandi löndum felst í góðu valdi á tungumálinu. Íslendingar eiga greiðan aðgang að háskólum í þýskumælandi löndum og skólagjöld eru þar fremur lág. Minni kunnátta getur seinkað námi og kostnaður við það aukist, þar sem viðkomandi nær ekki inntökuprófi í þýsku. Mikilvægt er að skólakerfið stuðli að því að Íslendingar geti nýtt þau fjölmörgu og fjölþættu tækifæri sem í góðri þýskukunnáttu felast.“

Blaðamannafundur um afnám gjaldeyrishafta

Efnahags- og viðskiptaráðherra hefur boðað til blaðamannafundar klukkan fjögur í dag þar sem kynnt verður áætlun um afnám gjaldeyrishafta. Undanfarið hefur sérstakur stýrihópur, sem í eiga sæti efnahags- og viðskiptaráðherra, fjármálaráðherra, seðlabankastjóri og forstjóri Fjármálaeftirlitsins, haft forystu um mótun áætlunar um afnám gjaldeyrishafta. Stýrihópurinn hefur unnið náið með sérfræðingum ráðuneyta og stofnana. Stefnt hafði verið að því að tekin yrði afstaða til tillagna stýrihópsins í ríkisstjórn þann 11. mars og að í kjölfarið yrði áætlunin birt opinberlega. Enn var þá nokkur vinna framundan til þess að stýrihópurinn geti lokið tillögugerð sinni til ríkisstjórnarinnar. Afgreiðslunni var því frestað til dagsins í dag.

Segir drenginn hafa fengið heilahristing eftir árásina

Tólf ára drengur sem á að hafa orðið fyrir árás karlmanns á fimmtugsaldri í Hafnarfirði á miðvikudaginn, hlaut heilahristing við aðförina samkvæmt móðir eins piltanna sem var með honum í för.

SAMFOK: Fagleg rök skortir hjá borginni

SAMFOK leggur til að horfið verði frá áformum um sameiningar, samrekstur og aðrar breytingar að sinni. SAMFOK telur að mjög skorti á að fullnægjandi fagleg og fjárhagsleg rök styðji tillögurnar eins og viðmið starfshópsins kváðu á um. Auk þess sem verulegur skortur á samráði og upplýsingagjöf skilji eftir of mörg spurningarmerki og of mikla andstöðu hagsmunaaðila til að búast megi við farsælli niðurstöðu að svo stöddu. Þetta segir í umsögn stjórnar SAMFOK um skýrslu starfshóps um greiningu tækifæra til samrekstrar og/eða sameiningar leikskóla, grunnskóla og frístundaheimila. SAMFOK telur að rök fyrir þeim breytingatillögum sem lagðar hafa verið fram séu af svo skornum skammti og rannsóknarvinna ekki nægileg til þess að unnt sé að keyra tillögurnar í gegn á þeim hraða sem fyrirhugað er. Gera þarf faglega úttekt á tillögunum og reikna mögulegan sparnað eða hagræðingu út af mun meiri nákvæmni. SAMFOK telur ekki að skýrslan sýni fram á slíkan ávinning að verjandi sé að raska skólastarfi með svo afgerandi hætti á þessum tímapunkti. Mun lengri undirbúningstíma þarf til og náið samtal og samráð við þá sem breytingarnar snertir. Sameiningar skila sjaldnast hagnaði á fyrsta ári og SAMFOK telur að með því að fresta þessum aðgerðum og undirbúa þær betur í nánu samstarfi við foreldra og starfsfólk skóla náist betri árangur og meiri fjárhagslegur ávinningur. Umsögn SAMFOK er í heild sinni á vef Reykjavíkurborgar og einnig umsagnir annarra hagsmunaðila: <http://www.reykjavik.is/desktopdefault.aspx/tabid-4422/7534_view-4359/>

Fór í ófrjósemisaðgerð - fékk lífhimnubólgu en engar bætur

Íslenska ríkið var sýknað af skaðabótakröfu konu sem krafðist sjö milljóna vegna meintra læknamistaka. Konan fór í ófrjósemisaðgerð árið 2002. Aðgerðin virtist hafa gengið vel og var hún því útskrifuð af spítalanum. Rúmri viku síðar snéri konan aftur á spítalann vegna vaxandi verkja í neðri hluta kviðar og síðu hægra megin. Vaknaði grunur um lífhimnubólgu og möguleg tengsl við ófrjósemisaðgerðina.

Þurfa að skila inn áætlun um úrbætur fyrir 4. apríl vegna mengunar

Umhverfistofnun hefur sent Becromal Iceland, álþynnuverksmiðjuna á Akureyri, áform um áminningu og gerð er krafa um að fyrirtæki skili inn áætlun um hvenær það áformi að ljúka úrbótum eigi síðar en 4. apríl. Frestur fyrirtækis til að skila inn athugasemdum er lögbundinn.

Kærður fyrir að tuska tólf ára dreng til eftir snjóboltaárás

Karlmaður um fimmtugt hefur verið kærður til lögreglunnar fyrir að slá tólf ára dreng í höfuðið sem hafði, ásamt skólabræðrum sínum, kasta snjóboltum í glugga íbúðar hans í Norðurbæ Hafnarfjarðar.

Ólína leggst gegn áskorun Barðstrendinga

Þingmenn Norðvesturkjördæmis hafa verið boðaðir til Patreksfjarðar klukkan þrjú í dag til að taka við áskorun eitt þúsund íbúa á sunnanverðum Vestfjörðum um að nýr þjóðvegur verði lagður um Teigsskóg í stað vegarins um Ódrjúgsháls. Ólína Þorvarðardóttir lýsir andstöðu við áskorun íbúanna.

Óásættanlegt að vera svo háð samþykki menntamálaráðherra

Halldór Halldórsson, formaður Sambands íslenskra sveitarfélaga gagnrýndi menntamálaráðherra í setningarávarpi sínu á 25. landsþingi sambandsins sem hófst á Hótel Nordica í morgun. Í ávarpi sínu ræddi Halldór meðal annars um samræmdar hagræðingaraðgerðir í skólamálum sem lagðar voru fyrir ráðherrann og áttu að skila sveitarfélögunum ríflega eins milljarðs króna sparnaði. Engin af þeim tillögum sem sambandið lagði fyrir hefur hlotið brautargengi innan ráðuneytisins. „Okkur hjá Sambandi íslenskra sveitarfélaga hefur mistekist að ná fram einhverju mikilvægasta verkefni sambandsins en það eru samræmdar aðgerðir við að ná fram frekari hagræðingu í skólamálum. Eftir þessu var kallað, skilaboðin frá sveitarstjórnarfólki hafa verið skýr, það þarf að hagræða frekar og það þarf aukinn sveigjanleika. Mér þykir leitt að standa hérna fyrir framan ykkur ágæta sveitarstjórnarfólk og segja að okkur hafi mistekist. En það er staðreynd, við fórum fram með skýrar tillögur til menntamálaráðherra en ekki ein einasta þeirra hefur hlotið samþykki hennar - ekki ein einasta þrátt fyrir eins og hálfs árs viðræður," sagði Halldór. Halldór rakti því næst í hverju hagræðingaraðgerðirnar fælust og taldi tímabært að fela Alþingi að fjalla um tillögurnar í samstarfi við sveitarfélögin. Hann sagðist þó ekki vilja byggja upp óraunhæfar væntingar sveitarstjórnarfólks til þess að sveitarfélögin myndu ná árangri þar en þeim bæri þó skylda til að reyna. „Það er auðvitað óásættanlegt að vera svo háð samþykki menntamálaráðherra vegna þess að lög og reglur eru svo niðurnjörvuð að fátt er hægt að gera. Og ef menntamálaráðherra vill að sveitarfélögin hækki útsvarið eða geri eitthvað annað þá verður bara svo að vera, þannig er kerfið uppbyggt hjá okkur. Það er ekki skrýtið þó maður velti stundum fyrir sér í þessu samhengi hvort það hafi verið óþarfi að kjósa allt þetta sveitarstjórnarfólk, alla þessa lýðræðislegu kjörnu fulltrúa í sveitarfélögunum til að taka ákvarðanir," sagði Halldór. Halldór ræddi einnig um fyrirhugaðan flutning á málefnum aldraðra frá ríki til sveitarfélaga en stefnt hefur verið að þeim flutningi frá árinu 2006. Þar var rætt um tímasetninguna 1. janúar 2012. „Það er ljóst að ekki verður hægt að standa við þær fyrirætlanir því sérstök nefnd um flutning á málefnum aldraðra hefur ekki verið skipuð ennþá. Við eigum að leggja áherslu á að vanda okkur frekar en að flýta okkur," sagði Halldór. Á landsþinginu munu þingfulltrúar fjalla um stefnumótun sambandsins til næstu ára. Þingfulltrúar skipa sér í hópa þar sem meðal annars verður fjallað um fjármál, skipulags- og byggingamál, fræðslu- og uppeldismál, kjaramál og flest þau önnur mál er varða rekstur sveitarfélaga. Einnig verður mikil áhersla lögð á atvinnumál en eftir hádegi mun Katrín Júlíusdóttir iðnaðarráðherra flytja ávarp á þinginu. Stefnt er að því að landsþingið standi fram til 15.30 en þá hefst aðalfundur Lánasjóðs sveitarfélaga ohf. Sjá frétt á vef Sambands íslenskra sveitarfélaga. http://www.samband.is/um-okkur/frettir/nr/1064?CacheRefresh=1

Stígamót fara til Sauðárkróks

Stígamót eru að fara aftur af stað með verkefnið "Stígamót á staðinn" og í apríl munu starfskonur heimsækja Sauðárkrók. Þær munu þá sinna almennri fræðslu til fagfólks um kynferðisofbeldi, sem og einkaviðtölum. Hægt er að panta tíma með því að hafa samband við Stígamót. Stígamót sinntu þjónustu á landsbyggðinni fyrir efnahagshrunið en þurfti að hætta henni vegna skertra fjárframlaga sem leiddi meðal annars til þess að segja þurfti upp starfsfólki hjá Stígamótum. Skotturnar, grasrótarsamtök kvenna, hafa að undanförnu staðið fyrir söfnunum til handa Stígamótum og er það fyrst og fremst þeirri söfnun að þakka að starfskonur sinna nú aftur þjónustu á landsbyggðinni. Með haustinu er stefnt á að starfskonur Stígamóta fari á fleiri staði en Sauðárkrók, meðal annars á Selfoss, Egilsstaði og Vestmannaeyjar. Hægt er að gerast styrktaraðili Stígamóta með frjálsum framlögum, sjá hér. <http://stigamot.is/index.php/styrktaradilar>

Fimm dæmdir og einn sýknaður í skotárásamáli og ráni

Þrir karlmenn voru í dag dæmdir fyrir skotárás í Bústaðahverfi á aðfangadag á síðasta ári. Einn var sýknaður. Sá sem hlaut þyngsta dóminn, Kristján Haukur Einarsson fékk tveggja og og hálfs árs refsingu. ívar Kolbeinsson fékk tveggja ára fangelsi. Sá þriðji fékk eitt ár.

Bæta stolna skartgripi eingöngu að litlu leyti

Tvær konur í Kópavogi, sem urðu nýlega fyrir barðinu á bíræfnum skartgripaþjófum, fá ekki nema fimm prósent af tryggingafjárhæð á innbúi og persónulegum munum endurgreidd frá tryggingafélaginu. Þær voru tryggðar hjá VÍS. Þjófarnir höfðu á brott með sér mikið af dýrum skartgripum úr gulli og hvítagulli með eðalsteinum.

Starfsmenn Becromal Iceland samþykkja verkfall

Starfsmenn Becromal Iceland, álþynnuverksmiðjunnar á Akureyri, samþykktu í gær verkfall með yfirgnæfandi meirihluta. 52 greiddu atkvæði, 51 sagði já en einn greiddi atkvæði gegn verkfallinu. 98 prósent starfsmanna greiddu því með verkfallinu.

Heim til Eyja eftir harmleik í Noregi

„Þetta er hræðilegur harmleikur,“ segir Óskar P. Friðriksson, sem er á leið til Noregs á laugardag ásamt fjölskyldu sinni til þess að hitta barnabarn sitt, Leif Magnús Grétarsson, átta ára. Móðir Leifs Magnúsar, hin 28 ára gamla Heidi Thisland Jensen, var myrt aðfaranótt sunnudagsins í bænum Mandal í Noregi.

Tekinn með tugi gramma

Tugir gramma af fíkniefnum fundust við leit í bíl, sem lögreglan á höfuðborgarsvæðinu stöðvaði við eftirlit í borginni í gærkvöldi.

Ekið á kyrrstæðan bíl - tvisvar

Tvisvar sinnum var ekið á sama bílinn á Akureyri í gærkvöldi eftir að ökumaður hans hafði skilið hann eftir fastan í snjóskafli á hringtorginu á mótum Hörgárbrautar og Undirhlíðar og var að sækja aðstoð. Báðir ökumennirnir létu lögregluna vita en bíllinn var ekki samur þegar eigandinn kom aftur með hjálparmennina til að sækja hann.

Forsetahjónin ekki boðin

Íslensku forsetahjónunum er ekki boðið til brúðkaups Vilhjálms prins í Bretlandi og Kate Middleton sem fram fer í Westminster Abbey í Lundúnum 29. apríl. Fjölda þjóðarleiðtoga er boðið til athafnarinnar en flestir koma frá ríkjum breska samveldisins eða tengjast konungsfjölskyldunni blóðböndum.

Stjórnarflokkarnir takast á um kvótann

Hvað tefur frumvarp um breytingar á fiskveiðistjórnunarkerfinu? Breytingar á lögum um stjórn fiskveiða er annað tveggja stórmála sem formenn ríkisstjórnarflokkanna leggja ríka áherslu á að klárað verði í vor. Hitt er gerð kjarasamninga.

Skoða allt sem bætt gæti fjárhag hjá OR

Til greina kemur að Orkuveita Reykjavíkur (OR) selji frá sér starfsemi Gagnaveitu Reykjavíkur. Gagnaveitan á og rekur ljósleiðaranet, en skilið var á milli reksturs OR og Gagnaveitunnar eftir ákvörðun Póst- og fjarskiptastofnunar árið 2006. Gagnaveitan er að fullu í eigu Orkuveitunnar.

Helmingur fjölskyldugarða verið leigður út

Góð viðbrögð hafa verið við því útspili borgaryfirvalda að bjóða fjölskyldum til leigu matjurtabeð þar sem skólagarðar hafa verið hingað til. Eins og fram kom í Fréttablaðinu í gær verða Skólagarðar Reykjavíkur lagðir niður í hagræðingarskyni. Rekstur þeirra kostaði borgina 24 milljónir króna í fyrra.

Díoxín enn tugfalt yfir mörkum á Klaustri

Mæling díoxíns í útblæstri frá sorporkustöðinni á Kirkjubæjarklaustri var 58-falt yfir viðmiðunarmörkum í mælingu sem var gerð í janúar. Í mælingu árið 2007 var magn díoxíns 95-falt yfir mörkum. Mengun frá sorpbrennslunni á Svínafelli í Öræfum var mæld í fyrsta skipti á sama tíma og reyndist díoxín vera 287-falt yfir mörkum. Bæjarráð sveitarfélagsins Hornafjarðar ákvað í lok febrúar að loka stöðinni. Mælinga er að vænta frá Vestmannaeyjum.

Átti fremur von á dauða sínum en úrskurði kærunefndarinnar

„Á dauða mínum átti ég von frekar en því að einhverjir kæmust að þeirri niðurstöðu að ég hefði brotið jafnréttislög,“ segir Jóhanna Sigurðardóttir forsætisráðherra í bréfi sem hún sendi félögum sínum í Samfylkingunni í dag. Ástæðan er úrskurður kærunefndar jafnréttismála sem komst að þeirri niðurstöðu að við ráðningu skrifstofustjóra á skrifstofu stjórnsýslu- og samfélagsþróunar í forsætisráðuneytinu hefði Jóhanna brotið jafnréttislög.

Varaformannsslagur í uppsiglingu

Svo kann að vera að kosið verið um embætti varaformanns Framsóknarflokksins á flokksþingi sem haldið verður þann 9. apríl næstkomandi. Birkir. J. Jónsson varaformaður mun gefa kost á sér áfram, líkt og formaður flokksins og ritari hans. Vigdís Hauksdóttir, þingmaður Framsóknarflokksins, íhugar varaformannsframboð.

Ungliðar vilja að Ísland fordæmi árásirnar

Stjórnir Ungra vinstri grænna, Ungra vinstri grænna á höfuðborgarsvæðinu, í Borgarbyggð og á Akureyri skora á ríkisstjórn Íslands og utanríkisráðherra, Össur Skarphéðinsson, að fordæma opinberlega loftárásir NATO-sveita í Líbíu. Í sameiginlegri ályktun frá þessum félögum segir að ung vinstri græn vilji enn og aftur ítreka að Ísland sé herlaust land sem eigi að sjá sóma sinn í því að styðja ekki við bandalög og árásarþjóðir sem fari í stríð. Sýnt hefur verið svart á hvítu í ítrekuðum stríðum vesturveldanna að með loftárásum sé aldrei hægt að tryggja öryggi almennra borgara.

Sjötug kona vann 30 milljónir í happadrætti

Kona um sjötugt vann 30 milljónir í Milljónaveltu Happdrættis Háskólans þegar dregið var í dag. Vinningurinn kom á einfaldan miða í eigu konunnar, sem býr á höfuðborgarsvæðinu. Hún hafði átt miðann um árabil. Konan var að vonum himinlifandi þegar hún fékk fréttirnar.

Dauðsföllum fækkað um 80%

Dauðsföllum vegna hjartasjúkdóma á Íslandi hefur fækkað um áttatíu prósent undanfarna áratugi hjá fólki 75 ára og yngri. Árangurinn þykir gríðarlega góður. Prófessor í hjartalækningum segir þó að blikur séu á lofti.

EVE Fanfest sett í dag

EVE Fanfest, árleg hátíð og ráðstefna tölvuleikjafyrirtækisins CCP, var sett í dag. Það var Jón Gnarr borgarstjóri sem setti hátíðina. Íí ræðu sinni sagði hann frá því að hann spili sjálfur EVE Online tölvuleikinn. Hátíðin hefur verið haldin nær árlega frá árinu 2004 og en þessi er sú fjölmennasta til þessa.

Mónakó Supermarket opin tvo tíma á dag

Eina búðin á Bakkafirði er bara opin tvo tíma á dag og er um leið helsti samkomustaður þorpsins.

Um 12 þúsund manns hafa skorað á borgarstjórn

Tæplega tólf þúsund manns hafa skrifað undir áskorun á vefnum born.is. Jón Gnarr borgarstjóri tók við áskorununum síðdegis.

Forvarnir og árvekni lykilatriði málsins

Mottumars-átak Krabbameinsfélags Íslands, þar sem vakin er athygli á krabbameini í körlum, hefur gengið vel það sem af er mánuðinum.

Kaupþingsmenn geta sótt um samfélagsþjónustu

Þeir Daníel Þórðarson og Stefnir Ingi Agnarsson, sem dæmdir voru í sex mánaða óskilorðsbundið fangelsi, í Hæstarétti í dag munu eiga þess kost að sækja um að taka refsinguna út í samfélagsþjónustu. Þetta segir Páll Winkel fangelsismálastjóri í samtali við Vísi.

ÍAV segir alla heila í Hörpunni

Sigurður Ragnarsson, framkvæmdastjóri hjá Íslenskum aðalverktökum, sem stýrir byggingu Hörpunnar hafði samband við fréttastofu og sagðist ekki kannast við að neitt slys hafi orðið í Hörpunni í dag.

Staðfestir dóm yfir syni manns í "stærstu glæpasamtökum heims"

Hæstiréttur staðfesti dóm yfir hálffertugum karlmanni sem var dæmdur í sex mánaða óskilorðsbundið fangelsi fyrir að nefbrjóta karlmann og marglemja hann í bifreið.

Stefnir og Daníel fá sex mánuði óskilorðsbundið

Hæstiréttur Íslands mildaði refsingu yfir fyrrverandi starfsmönnum Kaupþings, þeim Daníel Þórðarsyni og Stefni Agnarssyni, en þeir voru dæmdir í átta mánaða óskilorðsbundið fangelsi í Héraðsdómi Reykjavíkur.

Björn Bjarnason: Jóhanna mesti gervibaráttumaður sem ég hef kynnst

"Í mínum huga er ótrúlegt að sjálf Jóhanna Sigurðardóttir skuli standa frammi fyrir úrskurði Kærunefndar jafnréttismála um að hún hafi brotið jafnréttislög við embættisveitingu í forsætisráðuneytinu. Þetta og viðbrögð hennar við úrskurðinum sanna mér endanlega að Jóhanna er mesti gervibaráttumaður í stjórnmálum sem ég hef kynnst,“ skrifar Björn Bjarnason, fyrrverandi ráðherra Sjálfstæðisflokksins um úrskurð kærunefndar jafnréttismála gegn Jóhönnu Sigurðardóttur, forsætisráðherra, á heimasíðu sína.

Dæmd til þess að greiða fyrir fermingaveislu dóttur sinnar

Móðir var dæmd í Héraðsdómi Reykjaness í dag til þess að greiða H 57 ehf, Flughótel í Reykjanesbæ, 340 þúsund krónur fyrir fermingaveislu dóttur sinnar sem þar var haldin.

Áfram-hópurinn: Segjum Já við Icesave

Áfram-hópurinn kynnti stefnumál sín á blaðamannafundi á Kjarvalsstöðum fyrr í dag. Áfram-hópurinn er þverpólitísk grasrótarsamtök fólks sem kýs að taka ábyrga og upplýsta afstöðu gagnvart Icesave-samningi Íslendinga við Breta og Hollendinga. Besta leiðin í stöðunni, að mati hópsins, er að segja JÁ í þjóðaratkvæðagreiðslunni 9. apríl. Þannig verði horfið frá stöðnun og stórt skref stigið fram á við til enduruppbyggingar efnahags- og atvinnulífsins. Þetta kemur fram í tilkynningu frá Áfram-hópnum. Á fundinum voru mættir 14 aðstandendur hópsins - en aðstandendahópurinn telur þegar 60 manns, víðsvegar að úr þjóðfélaginu. Sá hópur fer sífellt stækkandi. Dóra Sif Tynes, lögmaður, flutti opnunarávarp, þar sem hún sagði hópinn sammála um það að farsælast og áhættuminnst væri að ljúka Icesave-málinu með þeim samningum sem nú liggja fyrir. "Sátt í þessu máli verður ekki náð nema að fram fari málefnaleg og heildstæð umræða um málið, þar sem öll sjónarmið koma fram svo fólk geti tekið upplýsta ákvörðun á kjördag," sagði Dóra. Guðmundur Gunnarsson, formaður Rafiðnaðarsambands Íslands, sagði Icesave-málið geta skipt máli við þær viðræður um kjarasamninga sem nú standa yfir. "Fyrirtæki hafa ekki aðgang að erlendum lánamörkuðum, sem er forsenda þess að koma efnahagslífinu af stað og endurheimta þann kaupmátt sem við höfum tapað. Þar stendur Icesave í veginum. Við teljum því Icesave vera hluta af okkar kjarabaráttu." Margrét Kristmannsdóttir sagði spurninguna um lagaskyldu Íslendinga til greiðslu löngu vera orðna að aukaatriði. "Icesave snýst um lífskjör okkar á komandi árum, um að stækka köokuna, svo það verði meira til skiptana fyrir okkur öll." Að lokum sagði Gunnar Ellert Geirsson, framkvæmdastjóri í Reykjanesbæ, Suðurnesjamenn þekkja af eigin raun hversu mikil þörf er til að koma fjárfestingu í atvinnulífinu af stað. "Ég segi já við Icesave vegna framtíðarinnar," sagði Gunnar Ellert. Áfram-hópurinn heldur úti heimasíðunni afram.is, þar sem hægt er að fræðast frekar um afstöðu aðstandenda hans til samningsins.

Lykilatriði að tillögur stjórnlagaráðs verði lagðar í dóm þjóðar

Stjórnmálafræðingurinn Eiríkur Bergmann hefur ekki gert upp huga sinn hvort hann muni taka sæti í stjórnlagaráði sem Alþingi samþykkti í hádeginu í dag.

Jóhanna: Engum heilvita manni dytti það í hug

„Dettur einhverjum heilvita manni í hug, að þrjár konur, ég sem forsætisráðherra, ráðuneytisstjórinn í forsætisráðuneytinu og mannauðsráðgjafinn, sem einnig er kona, hafi eina einustu mínútu gert sér í hugarlund að þær væru að brjóta jafnréttislög með þessari skipun í embætti?" spurði Jóhanna Sigurðardóttir forsætisráðherra á Alþingi fyrir stundu. Þar flutti hún skýrslu um úrskurð Kærunefndar jafnréttismála sem var á þá leið að Jóhanna hafi brotið gegn jafnréttislögum. Jóhanna segir mikilvægt að taka úrskurðinn alvarlega og fara vel yfir hann til að unnt sé að beita réttum vinnubrögðum í framtíðinni. Í óundirbúnum fyrirspurnartíma á Alþingi í morgun sagðist Jóhanna ekki sjá ástæðu til að segja af sér vegna málsins þar sem faglega hefði verið staðið að ráðningunni. Þar tók hún fram að hún hefði hins vegar íhugað afsögn ef hún hefði gerst sek um að ganga framhjá faglegu mati og skipað pólitískt í stöðuna, og rifjaði í því sambandi upp skipan Árna Mathiesen, fyrrverandi dómsmálaráðherra, sem skipaði Þorstein Davíðsson sem héraðsdómara þrátt fyrir að hann væri langt því frá að vera metinn hæfastur í stöðuna.

Hvernig samrýmist ábyrgðin lögum?

Innanríkisráðuneytið vill að Mosfellsbær skýri hvernig það geti samrýmst lögum að sveitarfélagið gekkst í sjálfskuldarábyrgð fyrir 246 milljóna króna bankaláni fyrirtækisins Helgafellsbygginga hf.

Inga Lind ætlar ekki að taka sæti í stjórnlagaráði

Inga Lind Karlsdóttir ætlar ekki að taka sæti í stjórnlagaráði sem Alþingi samþykkti í hádeginu.

Tryggir eftirlit með skilanefndum föllnu bankanna

Viðskiptaráðherra segir að í smíðum sé frumvarp sem eigi að tryggja eftirlit með skilanefndum föllnu bankanna. Þetta kom fram í svari hans við fyrirspurn þingmanns um hvort hann legði blessun sína yfir framferði skilanefnda. Í óundirbúnum fyrirspurnartíma á Alþingi í morgun spurði Þráinn Bertelsson, þingmaður vinstri grænna, Árna Pál Árnason, viðskiptaráðherra út í störf og framferði skilanefnda bankanna. Þráinn sagði sér þætti starfsemi þeirra til marks um að hópar í landinu hefðu ekkert lært af hruninu. Þráinn sagðist vel gera sér grein fyrir því að eldveggur eigi að vera milli nefnda og stjórnvalda en það breyti því ekki að stjórn ríkisins sé í höndunum ríkistjórnarinnar og alþingis. Hann vildi því spyrja Árna Pál hvort hann væri sáttur við störf skilanefnda og framferði eða hvort hann hygðist aðhafast eitthvað. Árni Páll benti á að skilanefndirnar störfuðu á ábyrgð kröfuhafa en það væri mikilvægt að hafa eftirlit með þeim og slitastjórnum. Slíku eftirliti væri því miður mjög ábótavant nú. Þá þyrfti að tryggja að einstaklingar og fyrirtæki sem skulda hinum föllnu bönkum fái úrlausn sinna mála með sanngjörnum hætti en misbrestur hefði verið á því. Hins vegar vilji hann verja það kerfi að kröfuhafar fari með ábyrgð á þrotabúunum. Hann sagði að unnið væri að úrbótum á þessu og að frumvarp væri í undirbúningi um málið og stefnt væri á að leggja það fram í lok mánaðarins. Með því sé þess freistað að fella skilanefndir og slitastjórnir undir ákveðið eftirlit en jafnframt auka aðkomu kröfuhafa að því að hafa eftirlit með stórum ákvörðunum og ráðstöfun eigna. Þráinn sagði svör ráðherra loðin. Það þurfi einnig að tryggja að ákvarðanir skilanefnda og slitastjórna um eigin viðskipti við þrotabúin séu með eðlilegum hætti og virtar séu grundvallar leikreglur sem almennt eiga að tíðkast í viðskiptalífi en semji ekki við sjálfan sig um aðstöðu kaup og kjör. Gagnrýni Þráins svaraði Árni á þá leið að feta þurfi vandratað meðalhóf með frumvarpinu.

Tillaga um stjórnlagaráð samþykkt á Alþingi

Þingsályktunartillaga um skipun stjórnlagaráðs var samþykkt á Alþingi rétt í þessu. Tillagan var samþykkt með 31 greiddu atkvæði. 21 þingmaður var á móti og sjö greiddu ekki atkvæði.