Sigmundur á kjörstað: Eina vitið að kjósa framsókn

Sigmundur Davíð Gunnlaugsson mætti á einum af nýju framsóknarbílunum í kjörstað fyrir stundu en hann kýs í Ráðhúsi Reykjavíkur. Hann sagðist vera búinn að ákveða sig eftir ágætis yfirlegu og ekkert vit væri í öðru en að kjósa Framsóknarflokinn þar sem hann væri eini flokkurinn sem boðaði raunhæfar aðgerðir. Þetta kom fram í máli Sigmundur sem ræddi við strákana á Bylgjunni í Ráðhúsinu.

Kosningabíll Sturlu skemmdur

Sturla Jónsson efsti maður á lista Frjálslynda flokksins í Reykjavíkurkjördæmi suður hefur keyrt um á vörubíl með auglýsingu frá sjálfum sér í aðdraganda kosninganna. Honum brá því heldur betur í brún þegar hann ætlaði af stað í morgun og búið var að losa gám sem var á vagni aftan á bílnum. Litlu munaði að gámurinn færi af vagninum en það var fyrir snarræði Sturlu að ekki fór verr. Hann segir að einnig hafi verið búið að særa slöngu sem liggur úr bílnum í vagninn.

Verkalýðssamtök útrásarvíkinga á svölum Fríkirkjuvegar 11

Hópur sem kallar sig Verkalýðssamtök útrásarvíkinganna hefur sent frá sér tilkynningu og boðar kynningu á stefnumálum sínum á svölum Fríkirkjuvegar 11 í Reykjavík fyrir hádegi í dag. Húsið er sem kunnugt er í eigu þeirra Björgólfsfeðga en svo virðist sem samtökin hafi komið nokkurskonar brúðum fyrir á svölum hússins.

Jóhanna á kjörstað: Ákvað sig fyrir þrjátíu árum

Jóhanna Sigurðardóttir forsætisráðherra og formaður Samfylkingarinnar sagðist hafa ákveðið hvað hún ætlaði að kjósa fyrir þrjátíu árum síðan þegar hún mæti á kjörstað í Hagaskóla fyrir stundu. Hún sagði sumar í lofti og að Samfylkingin ætlaði að vinna kosningarnar.

Ástþór æfur út í Rúv - ætlar ekki að mæta í þáttinn í kvöld

Ástþór Magnússon talsmaður Lýðræðishreyfingarinnar hvetur fólk til þess að kjósa sinn flokk frekar en að skila auðu og fá þannig sína málpípu inn á Alþingi. Ástþór er hundfúll yfir leiðtogaumræðunum á Rúv í gærkvöldi og hann ætlar ekki að mæta í þáttinn í kvöld.

Bjarni á kjörstað: Atvinnan er stærsta velferðarmálið

Bjarni Benediktsson formaður Sjálfstæðisflokksins mætti ásamt fjölskyldu sinni á kjörstað í Fjölbrautarskólanum í Garðabæ fyrir stundu. Með í för var framtíðin eins og hann orðaði það og hann sagði framtíðina bjarta. Hann sagði nokkuð öruggt hvað hann væri að fara að gera í kjörklefanum og vonaði að flokkurinn fengi fleiri atkvæði en kannanir hafa sýnt upp á síðkastið.

Jóhanna kýs í Hagaskóla

Jóhanna Sigurðardóttir forsætisráðherra og oddviti Samfylkingarinnar í Reykjavík ætlar að mæta í Hagaskóla klukkan 10:30 og kjósa. Áætlað var að Jóhanna myndi kjósa klukkan 9:00 en hún mun ekki mæta fyrr en 10:30.

Búast við sögulegum kosningum

Stjórnmálafræðingar segja kosningarnar um margt sögulegar. Landsmönnum bjóðist að kjósa um stjórn um langa hríð og útlit sé fyrir sögulegt lágmark Sjálfstæðisflokksins. Ýmislegt geti breyst.

Hyggjast borða kjörseðlana

Hópur fólks hefur tekið sig saman og mun stunda atkvæðaandóf í kosningunum í dag. Það felst í því að taka sér góðan tíma í kjörklefanum til að ákveða hvernig atkvæðisréttinum verður beitt. Annar hópur hyggur á kjörseðlaát þannig að seðlarnir skili sér ekki í kjörkassann.

Algengast að merkt sé við tvo á kjörseðli

Fjölmargir ógildir kjörseðlar rata í kjörkassana í hverjum kosningum. Sumir eyðileggja kjörseðlana með því að skrifa vísur eða texta á þá. Aðrir merkja við einn lista en strika yfir frambjóðanda á öðrum lista, sem ógildir alltaf atkvæðið.

Boltinn er hjá ríkisstjórninni

Helstu stjórnendur Landspítalans hittu forsvarsmenn stærstu lífeyrissjóða landsins á þriðjudag og kynntu fyrir þeim tillögur norskra ráðgjafa um að flytja alla starfsemi spítalans úr Fossvogi í nýbyggingar og endurgert húsnæði við Hringbrautina á næstu árum.

Vernd uppljóstrara og nektardans bíður

Uppljóstrarar úr fjármálalífinu njóta ekki verndar og nektardans er enn heimill fáist til hans undanþága. Frumvörp um breytingar þar á voru meðal þeirra sem ekki voru samþykkt fyrir þinglok. Eignaumsýslufélag ríkisins var aldrei stofnað.

Átján oddvitar geta ekki kosið sjálfa sig

Í kosningunum í dag eru fjölmargir í framboði sem ekki geta kosið sjálfa sig. Helgast það af því að þeir hafa lögheimili í öðru kjördæmi en þeir eru í framboði í.

9.398 fá að kjósa í fyrsta sinn

Í takt við fjölgun þjóðarinnar hafa aldrei jafn margir verið á kjörskrárstofni fyrir kosningar og nú. Alls eru 227.896 á kjörskrárstofni en sú tala segir ekki til um endanlegan fjölda kosningabærra manna. Tekið verður tillit til látinna og þeirra sem fengið hafa nýtt ríkisfang að kosningunum afstöðnum. Í kosningunum 2007 voru 221.330 á kjörskrá. Neyttu þá 83,6 prósent atkvæðisréttar síns. Í kosningunum 2003 voru 211.304 á kjörskrá og kosningaþátttakan 87,7%.

Engin blá kjörklefatjöld í ár

Blá kjörklefatjöld munu ekki skýla kjósendum í Reykjavíkurborg í ár, segir Gunnar Eydal, staðgengill skrifstofustjóra hjá borginni. Þau verði þess í stað gráleit.

Segja úthlutanir ólögmætar

„Við erum nokkuð vongóð um að þessi kvörtun muni bera árangur.,“ segir Rannveig Grétarsdóttir, framkvæmdastjóri Hvalaskoðunar Reykjavík ehf. Rannveig, og Hörður Sigurbjarnarson, framkvæmdastjóri Norðursiglingar ehf., hafa sent kvörtun til umboðsmanns Alþingis vegna ákvörðunar sjávarútvegsráðherra um að láta ákvörðun forvera síns um úthlutun veiðiheimilda á hval í sumar standa.

Sumir syrgja á meðan aðrir fagna

Á kosninganótt má búast við heldur meiri ölvun á landinu en venjulega. Það þýðir þó ekki endilega meiri annir hjá lögreglu. Leigubílstjórar mega búast við nægri vinnu, en flestir kjósendur sækja samkvæmi eða halda sig heima fyrri hluta kvölds.

Kannanir samhljóma um meginlínurnar

Skoðanakannanir Fréttablaðsins og Capacent Gallup voru mjög samhljóma í gær og spá meirihlutafylgi Samfylkingar og Vinstri grænna. Báðar kannanir sýna einnig versta afhroð Sjálfstæðisflokksins frá stofnun flokksins.

Gátu oftast keypt tóbak

Tveir fimmtán ára unglingar gátu keypt tóbak hjá tólf sölustöðum af tuttugu, eða í sextíu prósentum tilfella, í könnun sem forvarnanefnd Hafnarfjarðar stóð fyrir fyrr í mánuðinum. Þetta kemur fram í tilkynningu frá forvarnanefndinni.

Rúm 12 þúsund hafa kosið

Fjöldi atkvæða sem greidd höfðu verið utan kjörstaða var 12.359 þegar Fréttablaðið sló á þráðinn til Bergþóru Sigmundsdóttur kjörstjóra klukkan rúmlega átta í gærkvöld. Þá var aðsóknin heldur að detta niður eftir annasaman dag. „Í þessari viku eru fleiri búnir að kjósa en í vikunni fyrir síðustu kosningar fyrir tveimur árum,“ segir Bergþóra.

Fangi með fíkniefni

Fanga, sem tekinn var með nokkur grömm af hassi á Litla-Hrauni í júlí á síðasta ári, var ekki gerð sérstök refsing vegna málsins í Héraðsdómi Suðurlands. Fangaverðir fundu efnið í klefa fangans, er játaði sök fyrir dómi. Maðurinn hefur hlotið marga dóma fyrir ýmis brot. Í febrúar var hann dæmdur í átján mánaða fangelsi í Héraðsdómi Reykjavíkur fyrir skjalafals og fleira. Refsingin var ákvörðuð sem hegningarauki. Hassvarslan átti sér stað fyrir þann dóm. Að mati Héraðsdóms Suðurlands hefði hassmálið ekki verið til refsiþyngingar hefði það verið dæmt með skjalafalsinu.- jss

Nýir kjörseðlar sendir til Árósa

Íslendingar sem þurftu frá að hverfa þegar þeir ætluðu að greiða atkvæði í alþingiskosningum á ræðismannsskrifstofu Íslands í Árósum á fimmtudag fengu nýtt tækifæri til að kjósa í gær. Þá höfðu nýir kjörseðlar verið sendir frá sendiráðinu í Kaupmannahöfn til Árósa. Á vef Íslendingafélagsins í Árósum sagði að gert væri ráð fyrir að kjörseðlarnir bærust um hádegisbil í gær og því ætti fólk að geta nýtt kosningarétt sinn. Fram kom hjá mbl.is að íslenski sendiráðspresturinn myndi síðan sjá um að koma atkvæðaseðlum landa sinna í tæka tíð heim. - gar

Orkusetur á varnarsvæðinu

Undirritaður hefur verið samstarfssamningur um uppbyggingu rannsóknarseturs í orkuvísindum á gamla varnarsvæðinu sem hlotið hefur nafnið Ásbrú.

Ekki hugmynd um styrkina

Kjartan Gunnarsson, þáverandi varaformaður bankaráðs Landsbankans, segist ekki hafa hugmynd um hvaða stjórnmálamenn voru styrktir af bankanum árið 2006. Hann segist heldur ekki vita hversu margir frambjóðendur voru styrktir eða hve mikið var veitt í heildina.

Tíundi hver skili auðu

Tíu til fimmtán prósent kjósenda munu skila auðu ef marka má skoðanakannanir síðustu vikna. Í kosningunum árið 2003 skiluðu 1,01 prósent auðum seðli. Það árið voru 0,19 prósent seðla ógildir.

Atburðarásin var ævintýraleg

„Sú mynd sem maður fékk út frá þeim gögnum og umræðu í nefndinni sem okkur voru kynnt sýnir ævintýralegri atburðarás en ég átti von á varðandi bankahrunið almennt,“ segir Siv Friðleifsdóttir. Á fundi utanríkismálanefndar í gær voru kynnt gögn um samskipti íslenskra og erlendra ráðamanna 3. til 6. október í fyrra. Um er að ræða tvö símtöl forsætis­ráðherra, Geirs H. Haarde, við breska ráðherra.

Segja nýtt hrun ekki blasa við

Gylfi Magnússon viðskiptaráðherra kveðst algerlega ósammála þeirri niðurstöðu Sigmundar Davíðs Gunnlaugssonar, formanns Framsóknarflokksins, að hrun blasi við íslenska efnahagskerfinu.

Vilja bæta öryrkjum skerðingu í nýju kerfi

Lagt er til að taka upp barnatryggingar sem tryggi foreldrum 40 þúsund króna greiðslu fyrir hvert barn. Öryrkjar einir yrðu fyrir skerðingu. Þeir myndu missa 6.000 krónur á mánuði. „Verður að bæta þeim það upp,“ segir nefndarmaður.

Ástþór ætlar að setja útrásarvíkinga í gæsluvarðhald

Ástþór Magnússon, talsmaður Lýðræðishreyfingarinnar, vill setja hryðjuverkalög á útrásarvíkinga og jafnframt að þeir verði settir í gæsluvarðhald. Þetta kom fram í formannaþættinum Hvernig á að bjarga Íslandi á Stöð 2 í kvöld.

Hálka á Holtavörðuheiði

Á Holtavörðuheiði er hálka og talsverður skafrenningur. Hálkublettir eru í Heydal. Þetta kemur fram í tilkynningu frá Vegagerðinni. Hálkublettir og skafrenningur er á Bröttubrekku en hálka í Miðdölum og á Svínadal.

Endurskipulagning bankakerfisins afar mikilvæg

Formenn Framsóknarflokksins og Samfylkingarinnar telja eitt af mikilvægustu verkefnunum sem tilvonandi ríkisstjórn stendur frammi fyrir vera að endurreisa bankakerfið. Þetta kom fram í formannaþættinum Hvernig á að bjarga Íslandi á Stöð 2 í kvöld.

Geir tjáir sig ekki um risastyrkina

Geir H. Haarde, fyrrverandi formaður Sjálfstæðisflokks, vill ekki tjá sig við fjölmiðla um risaframlög Landsbankans og FL Group.

Fá leyfi til olíuleitar og olíuvinnslu í allt að 46 ár

Drekaútboðið sem nú stendur yfir er ekki aðeins um olíuleit heldur einnig um rétt til olíuvinnslu í samtals allt að 46 ár. Bæði iðnaðarráðherra og verkefnisstjóri olíuleitarinnar segja það misskilning að íslensk stjórnrnvöld geti ákveðið síðar hvort ráðist verði í olíuvinnslu.

Listaverk á útskriftarsýningu brjóta kosningalög

Yfirkjörstjórn í Reykjavíkurkjördæmi norður hefur gert athugasemdir við listaverk á útskriftarsýningu Listaháskólans og segja þau brjóta kosningalög.

Jóhanna vill aflétta trúnaði af skýrslu um bankahrunið

Forsætisráðherra vill láta kanna hvort ekki verði hægt að aflétta trúnaði af gögnum Rannsóknarnefndar Alþingis um atburðarrásina í kringum bankahrunið í október. Utanríkismálanefnd Alþingis fjallaði um gögnin í morgun en Siv Friðleifsdóttir segist vera slegin yfir þeim upplýsingum sem þar koma fram.

Sigmundur Davíð: Stjórnin heldur upplýsingum leyndum

Sigmundur Davíð Gunnlaugsson, formaður Framsóknarflokksins, telur að ríkisstjórnin haldi vísvitandi upplýsingum um raunverulega stöðu íslensks efnahagslífs leyndum fyrir kjósendum. Hann segir það með ólíkindum að fjármálaráðherra hafi ekki séð skýrslu Oliver Wyman.

Samfylkingin með 30% í nýrri könnun

Samfylkingin er stærsti flokkur landsins samkvæmt nýrri könnun Capacent-Gallup fyrir Ríkisútvarpið. Flokkurinn nýtur 29,8% stuðnings.

FME: Staðhæfingar Sigmundar standast ekki

Staðhæfingar Sigmundar Davíðs Gunnlaugssonar, formanns Framsóknarflokksins, um að í verðmati á bönkunum komi fram að aðeins muni innheimtast 2000 en ekki 3000 milljarðar af útistandandi skuldum bankanna standast ekki. Þetta kemur fram í svari Fjármálaeftirlitsins til fréttastofu.

Tekjuháir fái ekki barnabætur

Róttækar breytingar verða á opinberum greiðslum til barnafjölskyldna nái tillögur sem nefnd um stöðu barna í mismunandi fjölskyldugerðum kynnti í dag nær fram að ganga. Ágúst Ólafur Ágústsson, formaður nefndarinnar, segir að nýja kerfi myndi bæta stöðu lágtekjufólks og millitekjufólks.

Grunur um íkveikju

Sumarbústaður við Miðengi í Grímsnesi stórskemmdist í eldi í dag. Lögreglu og slökkviliði var tilkynnt um eldinn um hálfþrjúleytið og lauk slökkvistarfi á fimmta tímanum.

Vefur Samfylkingarinnar verstur fyrir sjón- og heyrnaskerta

Vefur Samfylkingarinnar er með lélegasta aðgengið fyrir sjón- og heyrnaskerta samkvæmt óháðu mati fyrirtækisins Sjá ehf, sem gerði úttekt á aðgengi fatlaðra að vefjum allra flokkanna.

Kosningastjóri Björgvins tók við Baugsstyrk

„Ég man vel eftir að hafa fengið styrkinn, það var ég sem bað um hann," segir Tómas Þóroddsson, kosningastjóri Björgvins G. Sigurðssonar, þingmanns Samfylkingarinnar, en áður hafði verið neitað fyrir tilurð styrksins.

Orðrómurinn ekki haft áhrif á Icelandair

Orðrómur um að Steingrímur J. Sigfússon fjármálaráðherra telji að ríkið þurfi að koma að eða taka yfir rekstur Icelandair að hluta til eða öllu leyti hefur ekki haft áhrif á félagið í dag, samkvæmt upplýsingum frá stjórnendum fyrirtækisins. Hermt var í fjölmiðlum í gær að Steingrímur hafi lýst þessum vilja sínum á fundi í Norðausturkjördæmi.

Hvalaskoðunarfyrirtæki kvarta undan Steingrími

Hvalaskoðunarfyrirtækin Hvalaskoðun Reykjavík og Norðursigling hafa kvarta til umboðsmanns Alþingis vegna ákvörðunar Steingríms J. Sigfússonar, sjávarútvegsráðherra, vegna úthlutunar veiðiheimilda á hval í sumar.

Hestur einn á ferð í Grafarvogi

Vegfarendum í Foldahverfi Grafarvogi brá heldur betur í brún þegar þeir sáu hest að spóka sig um í hverfinu hádegisbil í dag. Árvökull vegfarandi og einn leikskólakennari á leikskólanum Foldaborg náðu svo að koma taumi í hestinn og leiða hann inn á lóð Foldaborgar. Þangað kom svo starfsmaður frá Reykjavíkurborg til þess að ná í hestinn.