Lamdi leigubílstjóra í andlitið

Sprunga komin í fjöreggið

Frystihúsi HB-Granda á Akranesi verður lokað í fimm vikur í sumar og frystihúsi fyrirtækisins á Vopnafirði verður lokað í þrjár vikur. Á Skaganum er þegar búið að loka og verður opnað aftur í lok júlí.

Kynferðisbrot gegn stúlkum

Karlmaður var í gær dæmdur, í Héraðsdómi Reykjaness, í sjö mánaða skilorðsbundið fangelsi fyrir kynferðisbrot gegn tveimur stúlkum. Maðurinn var ákærður fyrir að hafa ítrekað nuddað kynfæri stúlknanna innan klæða þeirra, en stúlkurnar voru sex og átta ára þegar atvikið átti sér stað.

Stjórn Tryggingastofnunar kölluð saman

Kristinn H. Gunnarsson, stjórnarformaður Tryggingastofnunar, segir milljónafjársvik þjónustufulltrúa hjá Tryggingaststofnun, einsdæmi í 70 ára sögu stofnunarinnar. Hann segir að stjórn Tryggingastofnunar verði kölluð til fundar á næstu dögum vegna málsins.

Starfshópur um Laugaveg

Meirihluti skipulagsráðs Reykjavíkurborgar mun skipa starfshóp til að vinna að verndun og viðhaldi Laugavegarins sem mikilvægustu verslunar- og þjónustugötu Reykjavíkur.

Ástin er engin tilviljun

Ástin er engin tilviljun. Það er að minnsta kosti niðurstaða sænskrar rannsóknar.

Fjarðabyggð kannar réttarstöðu sína

Einn er enn á gjörgæslu eftir mengunarslysið í sundlauginni á Eskifirði í gær. Bæjarstjóri Fjarðabyggðar segir réttarstöðu bæjarfélagsins verða kannaða ítarlega.

Krefst þess að viðskiptavinir verði upplýstir um samheitalyf

Lyfjafræðingafélag Íslands segir ekki hægt að alhæfa um afgreiðsluvenjur lyfjafræðinga almennt út frá verðkönnun ASÍ sem náði aðeins til fárra lyfja. Félagið segir lyfjabúðir hafa verklagsreglur sem kveða á um að lyfjafræðingar skuli bjóða fólki upp á samheitalyf, þar sem þau séu ódýrari kostur en með sömu virkni og lyf sem læknir hefur ávísað. Siv Friðleifsdóttir sendi í dag bréf til Lyfjastofnunar þar sem þess er krafist að stofnunin ítreki við lyfsala að starfsfólk þeirra upplýsi viðskiptavini um samheitalyf þegar þau eru í boði.

Vörur rangt verðmerktar

Bónus reyndist oftast með lægsta vöruverðið í könnun sem verðlagseftirlit ASÍ gerði í matvöruverslunum á höfuðborgarsvæðinu í gær. Fram kemur á vef ASÍ að af þeim 53 vörutegundum sem skoðaðar hafi verið hafi Bónus verið með lægsta verðið í 29 tilvikum en oftast reyndist lítill verðmunur í verslunum Bónuss og Krónunnar. Hins vegar reyndist Ellefu-ellefu oftast með hæsta verðið, í 31 tilviki af fimmtíu og þremur. Munur á hæsta og lægst verði á mjólkurvörum var oftast á bilinu 30-40 prósent og á brauði milli 60 og 80 prósent. Þá segir á vef ASÍ að nokkuð hafi borið á því að vörur hafi ekki verið verðmerktar í verslunum en slíkt brýtur í bága við lög um eftirlit með óréttmætum viðskiptaháttum.

Varðhald framlengt vegna skotárásar

Varðhald yfir þremur mönnum, sem grunaðir eru um að hafa skotið á hús í Hafnarfirði úr haglabyssu og kastað bensínsprengju inn um sama glugga, var framlengt til 4. júlí í dag. Fólk var innandyra þegar árásin var gerð. Að sögn lögreglunnar í Hafnarfirði miðar rannsókn málsins vel.

Landsvirkjun íhugar áfrýjun vegna kröfu um umhverfismat við Þjórsárver

Landsvirkjun mun á næstunni skoða hvort dómi héraðsdóms um að hluti framkvæmda við Þjórsárver þurfi að fara í umhverfismat, verði áfrýjað. Héraðsdómur Reykjavíkur sýknaði í gær íslenska ríkið og Landsvirkjun af kröfum Áhugahóps um verndun Þjórsárvera og fleiri um að úrskurður Jóns Kristjánssonar setts umhverfisráðherra vegna Þjórsárvera verði felldur úr gildi í heild sinni. Hins vegar féllst héraðsdómur á þá kröfu að framkvæmdir við setlón norðan og vestan Þjórsárvera og veituskurður í Þjórsárlón þyrftu að fara í umhverfismat, og felldi þar með úr gildi úrskurð Jóns um það slíkt þyrfti ekki. Að sögn Þorsteins Hilmarssonar upplýsingafulltrúa Landsvirkjunar er verið að skoða málið þar innanhúss. Skoðað verður hvort að ráðist verður í mat á umhverfisáhrifum þess hlutra framkvæmdarinnar sem dómur héraðsdóms kveður á um. Einnig verður skoðað hvort að dómi Héraðsdóms Reykjavíkur verður áfrýjað til Hæstaréttar, en ákvörðun um það ætti að liggja fyrir innan fjögurra vikna. En það koma auðvitað fleiri að málinu, íslenska ríkið og svo stefnendur. Að sögn Katrínar Theódórsdóttur lögmanns Áhugahóps um verndun Þjórsárvera og fleiri hafa umbjóðendur hennar ekki tekið afstöðu til þess hvort dómi héraðsdóms verði áfrýjað. Hún bendir á að sá þáttur úrskurðar setts umhverfisráðherra sem héraðsdómur felldi úr gildi hafi verið hvað mikilvægastur og að menn vonist til að leiði til þess að hætt verði við framkvæmdirnar alfarið.

Bæjarstjórastaða í Grundarfirði eftirsótt

Tuttugu og þrjár umsóknir hafa borist um stöðu bæjarstjóra í Grundarfirði en umsóknarfrestur rann út í fyrradag. Þetta kemur fram á héraðsfréttavefnum Skessuhorni. Sjálfstæðisflokkurinn hlaut hreinan meirihluta í sveitarstjórnarkosningunum í vor með þriggja atkvæða mun og ætlar hann að ráða bæjarstjóra í stað Bjargar Ágústsdóttur sem gegnt hefur starfinu um árabil.

Samingar opinberra starfsmanna túlkaðir þröngt

Það verður aldrei aftur látið viðgangast, ef BSRB fær því mögulega komið við, að bandalagið eigi ekki aðild að endurskoðun kjarasamninga. Þetta segir Ögmundur Jónasson, formaður BSRB, eftir fund bandalagsins, Kennarasambands Íslands og Bandalags háskólamanna með samninganefnd fjármálaráðuneytisins í dag. Þar var farið yfir forsendur fyrir endurskoðun á kjarasamningum hjá opinberum starfsmönnum eftir að nýgerða samninga á almennum vinnumarkaði. Ögmundur segir fjármálaráðuneytið túlka endurskoðunarákvæði í samningum opinberra starfsmanna þröngt en eftir eigi að fara nákvæmlega til hverra endurskoðunin nái. Það sé í höndum aðildarfélaga BSRB en það sem snúi að félagsmönnum almennt verði á borði bandalagsins.

Stakk föður sinn í kviðinn

Hæstiréttur staðfesti í dag framlengdan gæsluvarðhaldsúrskurð yfir ungum manni sem grunaður er um að hafa stungið föður sinn hnífi í á veitingastað við Laugaveg aðfararnótt 17. júní. Höfðu þeir feðgar deilt sem lyktaði með því að sonurinn stakk föður sinn í kviðinni þannig að hann hlaut lífshættulega áverka og var um tíma á gjörgæslu. Skal ungi maðurin sitja í gæsluvarðhaldi þar til dómur gengur í máli hans en þó ekki lengur en til föstudagsins 4. ágúst.

12 ára stúlka bjargaði haferni frá drukknun

Tólf ára Grundfirðingur sýndi mikið snarræði þegar hún handsamaði haförn sem féll í Kirkjufellslónið skammt fyrir innan Grundarfjörð. Má segja að hún hafi bjargað konungi fulganna frá drukknun. Sigurbjörg Sandra Pétursdóttir, 12 ára Grundfirðingur var í gærkvöldi ein á ferð á hesti sínum við Kirkjufellslón skammt frá heimabæ hennar. Á ferð sinni sá hún haförn, konung fuglanna, falla af himnum og ofan í lónið. Sigurbjörg beið ekki boðanna heldur synti á eftir erninum og dró hann í land. Hún vafði svo vesti sínu utan um hann og fór með hann út á veg þar sem hún beið í tvo tíma eftir hjálp. Örninn er nú kominn í Húsdýragarðinn til aðhlynningar en ljóst er að löng bið verður á því að hann fái að fara aftur út í frelsið enda er hann mjög lemstraður. kvót segir Tómas Ó. Guðmundsson forstöðumaður Húsdýra- og fjölskyldugarðsins en hann áréttaði einnig að þó stúlkan hefði sýnt mikla dirfsku við björgunina væri ekkert grín að lenda í arnarklóm enda launaði fuglinn Sigurbjörgu björunina með því að grípa um hana þéttingsfast með klónum. Sigurbjörg virðist þó ekki reiðari en svo að í samtali við NFS sagði hún að ætlunin væri að heimsækja fuglinn eins fljótt og hún gæti en hér má sjá tilvonandi heimkynni hans. Sigurbjörg sagði einnig að hún væri búin að gefa honum fuglinum nafn, það er Sigurörn.

Einn enn á gjörgæslu vegna klórgasmengunar

Einn er enn á gjörgæslu eftir klórgasmengun í sundlauginni á Eskifirði í gær. Bæjarstjóri Fjarðabyggðar segir réttarstöðu bæjarfélagsins verða kannaða ítarlega.

Segir úrskurð ekki í samræmi við fyrri úrskurð samkeppnisyfirvalda

Forstjóri Dagsbrúnar undrast úrskurð Samkeppniseftirlitsins, sem hefur úrskurðað að samruni félagsins við afþreyingarfyrirtækið Senu sé ólöglegur. Hann segir úrskurðinn ekki í samræmi við fyrri úrskurð samkeppnisyfirvalda. Úrskurðinum verður áfrýjað til áfýjunarnefndar samkeppnismála.

Lítill munur á verði gjaldeyris milli banka

Gjaldeyrir er dýrastur í Landsbankanum í Leifsstöð, þar sem gengið er einu prósenti hærra en í öðrum útibúum bankans. Í könnun Neytendasamtakanna á verði á gjaldeyri, kemur fram að almennt er lítill munur milli viðskiptabankanna og Forex. Aðeins er um 2,5 prósentustiga munur á hæsta og lægsta verði á gjaldeyri að jafnaði. Ef peningar eru teknir úr hraðbanka erlendis með debetkorti, leggst tveggja prósenta þóknun á útektina en 2,5 prósent ef tekið er út með kreditkorti. Engin aukaþóknun leggst hins vegar þegar greitt er með kreditkorti í verslunum í útlöndum.

Ríkið sýknað af bótakröfu

Héraðsdómur Reykjavíkur sýknaði ríkið af skaðabótakröfu konu á þrítugsaldri. Konan varð fyrir líkamstjóni á heimili sínu árið 2002. Fyrrum sambýlismaður hennar braust inn í íbúð hennar og svo inn í svefnherbergi hennar. Í átökum milli þeirra skall hún í gólfið og brotnaði bátsbein í hönd hennar. Tjón hennar hefur verið metið til 20% örorku. Maðurinn var þó ekki dæmdur fyrir líkamsárás og því taldi dómurinn ríkið ekki bótaskylt.

300.000 króna sekt fyrir endurtekin umferðarlagabrot

Héraðsdómur Reykjaness dæmdi í dag mann um fertugt í fimm mánaða skilorðsbundið fangelsi fyrir umferðarlagabrot, þjófnað og rof á skilorði. Maðurinn var í nóvember árið 2004 dæmdur í fjögurra mánaða fangelsi fyrir þjófnað og var dómurinn skilorðsbundinn í þrjú ár. Brotin fólust í margendurteknum umferðarlagabrotum þar sem hann keyrði undir áhrifum slævandi lyfja þannig að hann var ófær um að stjórna bifreiðinni. Þrjú þessara atvika áttu sér stað á sex dögum í september á síðasta ári.

Tvöföldun Reykjanesbrautarinnar hefur skilað sér

Enginn hefur látist í umferðarslysi á Reykjanesbraut frá því hluti hennar var tvöföldaður og minna er um hraðakstur. Ökumenn haga sér öðruvísi í umferðinni á Reykjanesbrautinni eftir að hún var tvöfölduð fyrir tæpum tveimur árum síðan. Þetta segir Jóhannes Jensson, aðstoðaryfirlögregluþjónn í Keflavík.

Sjö mánaða fangelsi fyrir kynferðisbrot gegn tveimur telpum

Héraðsdómur Reykjaness dæmdi í dag karlmann í sjö mánaða skilorðsbundið fangelsi fyrir kynferðisbrot gegn tveimur telpum. Maðurinn var ákærður fyrir að hafa ítrekað nuddað kynfæri tveggja stúlkna, um 6 ára og 8 ára, innan klæða þeirra. Brotin áttu sér stað á heimilum telpnanna og í bíl mannsins. Maðurinn játaði brot sín. Sálfræðingur sem haft hefur stúlkurnar í meðferð bar fyrir dómi að sú yngri væri að mestu búin að jafna sig eftir brotin en sú eldri þyrfti frekari meðferðar við. Stúlkunum voru dæmdar bætur, þeirri eldri 250 þúsund krónur og þeirri yngri 150 þúsund auk þess sem ákærða var gert að greiða sakarkostnað, um hálfa milljón.

Mikil uppbygging á Hvanneyri

Aðsókn í nám við Landbúnaðarháskóla Íslands á Hvanneyri stóreykst. Á næsta skólaári verða nemendur um 300 og er ljóst að Nemendagarðar skólans munu yfirfyllast. Stjórn Nemendagarðanna hefur því ákveðið að fara út í framkvæmdir og stefnt er að rúmlega tvöföldun leigurýma á næstu tveimur árum. Fjárfestingarkostnaður vegna nýs húsnæðis á staðnum verður á annan milljarð króna næstu 2-3 ár.

Afhentu staðgenglum ráðherra áskorun

Háskólamenntaðir starfsmenn hjá Svæðisskrifstofum um málefni fatlaðra afhentu í morgun staðgenglum fjármála- og félagsmálaráðherra áskorun um að tryggja nægilegt fjármagn svo hægt sé að ganga til samninga við gerð stofnanasamninga milli BHM og svæðiskrifstofanna.

Sýknaður af að hafa ráðist á stúlku

Karlmaður var sýknaður af ákæru um líkamsárás fyrir héraðsdómi Reykjaness í morgun. Maðurinn var ákærður fyrir að hafa ráðist á stúlku í bíl sínum, snúa upp á hönd hennar, skella henni í malbik og kýla hana í magann. Maðurinn var vinur móður stúlkunnar. Stúlkan ber að hann hafi ráðist á hana og þvingað hana inn í bíl sinn. Maðurinn ber hins vegar að hann hafi farið til að ræða við stúlkuna þar sem móðir hennar hafi lýst áhyggjum sínum af henni við manninn um morguninn. Hann hafi ekki þvingað stúlkuna inn í bíl sinn en hún hafi ekki viljað tala við hann og hafið að skaða sjálfa sig og síðar hann. Framburður ákærða þótti sannfærandi og sjálfum sér samkvæmur en framburður stúlkunnar óljós á köflum. Dómi fannst því ákæruvaldinu ekki hafa tekist að sanna sekt mannsins.

Ragnar vill að Björn víki sæti við meðferð beiðninnar

Ragnar Aðalsteinsson hæstaréttarlögmaður ætlar að krefjast þess að Björn Bjarnason víki sæti sem dómsmálaráðherra við meðferð óskar Ragnars um aðgang að gögnum um hleranir á tímum kalda stríðsins.

Ferjulægi í Bakkafjöru til að bæta samgöngur við Vestmannaeyjar

Ferjulægi í Bakkafjöru verður tekið í notkun árið 2010 ef tillögur Sturlu Böðvarssonar samgönguráðherra ná fram að ganga. Siglingatími milli lands og eyja verður þá aðeins um hálftími. Sturla kynnti tillögur sínar á ríkisstjórnarfundi í gær.

Deilur um aðgerðir gegn mávum

Meirihluti umhverfisráðs Reykjavíkurborgar ætlar að koma á aðgerðum til að fækka sílamávum í borginni. Fulltrúar minnihlutans segja fyrirhugaðar aðgerðir örvæntingarfulla tilraun til að láta eftir sér taka við stjórnarskiptin. Gísli Marteinn Baldursson formaður umhverfisráðs Reykjavíkur segir kvartanir vegna varfugla hafa verið það margar úr öllum borgarhlutum að það væri ábyrgðaleysi að bregast ekki skjótt við.

Fjölbreytt eignarhald í fjölmiðlum

Stjórnarformaður útgáfufélags Morgunblaðsins eignaðist hlut í útgáfufélagi Fréttablaðsins, í Matador íslenska viðskiptalífsins í gær. Í sama snúningi eignaðist FL Group, sem á í útgáfufélagi Fréttablaðsins, hlut í útgáfufélagi Morgunblaðsins.

Öryggisreglum í sundlauginni ábótavant

Líðan þeirra sem urðu fyrir eitrun í klórgasslysinu í sundlauginni á Eskifirði í gær er eftir atvikum. Vinnueftirlitið segir öryggisreglum í sundlauginni hafa verið ábótavant.

Samruni Dagsbrúnar og Senu ólögmætur

Samkeppniseftirlitið tilkynnti Dagsbrún í gærkvöld að samruni þess fyrirtækis og Senu væri ólögmætur og yrði ógiltur. Virðist helst vísað til markaðsráðandi stöðu Dagsbrúnar á áskriftarsjónvarpsmarkaði. Stjórn Dagsbrúnar ætlar ekki að una þessum úrskurði og mun, samkvæmt tilkynningu til Kauphallarinnar nú laust fyrir hádegi, skjóta málinu til Áfrýjunarnefndar samkeppnismála. Sena var áður afþreyingarsvið Skífunnar og rekur meðal annars verslanir með tónlistarefni og tölvuleiki ásamt kvikmyndahúsum. Dagsbrún rekur meðal annars sjónvarpsstöðina NFS.

Bilaður bátur í togi

Bátur bilaði suðvestur af Stafnnesi í morgun. Bátur svipaður að stærð var rétt hjá en til að flýta fyrir þar sem farið var að kula náðist í stærri bát sem nú er kominn með þann bilaða í tog á leið til Sandgerðis. Þeir eru líklega rétt ókomnir.

Starfsmenn svæðisskrifstofa um málefni fatlaðra ósáttir við kjör sín

Háskólamenntaðir starfsmenn hjá svæðisskrifstofum um málefni fatlaðra íhuga nú uppsagnir þar sem ekkert hefur þokast í kjaraviðræðum þeirra við ríkið. Þeir vilja sambærileg kjör og fólk í sambærilegum störfum hjá borginni og afhentu yfirvöldum áskorun vegna deilunnar nú klukkan níu.

Konan sveik út úr tryggingum með hjálp sonar síns, tengdadóttur og 20 annarra

Konan sem er sökuð um að hafa svikið 75 milljónir út úr Tryggingastofnun er á fimmtugsaldri og hafði unnið sem þjónustufulltrúi í Þjónustumiðstöð stofnunarinnar í yfir 20 ár. Sonur konunnar og tengdadóttir sitja einnig í gæsluvarðhaldi. Alls tengjast um 20 manns málinu sem gæti verið eitt stærsta tryggingasvindl Íslandssögunnar.

Fallhlífastökkvari fótbrotnaði í lendingu

Fallhlífastökkvari fótbrotnaði í harkalegri lendingu á Helluflugvelli í gærkvöldi og var fluttur með sjúkrabíl á Slysadeild Landsspítalans. Hann var við æfingar ásamt félögum sínum úr Fallhlífaklúbbi Reykjavíkur, og voru aðstæður góðar, að sögn lögreglunnar á Hvolsvelli.

Hraðakstur á Reykjanesbraut

Ekkert lát er á hraðakstri á Reykjanesbraut, sem hefur færst mjög í vöxt. Tveir ökumenn voru stöðvaðir þar í gærkvöldi eftir að hafa mælst á 150 kílómetra hraða þar sem hámarkshraði er 90. Fimm til viðbótar voru teknir með stuttu millibili, en þeir óku heldur hægar.

Boranir í nágrenni Húsavíkur

Boraðar verða þrjár háhitaholur á Kröflusvæðinu og þeystareykjasvæðinu fyrir rúmlega hálfan milljarð króna í sumar vegna hugsanlegs álvers við Húsavík. Húsnæðisverð hefur hækkað í Húsavík og Alcoa hefur ráðið kynningarfulltrúa fyrir svæðið.

Samtök herstöðvaandstæðinga mótmæla æfingum Rússa

Miðnefnd Samtaka herstöðvaandstæðinga gagnrýnir harðlega boðaðar æfingar rússneskra herskipa í grennd við Ísland í haust. Í tilkynningu frá samtökunum segir að æfingar af þessu tagi þjóni engu uppbyggilegu hlutverki og þeim fylgi ýmsar hættur þar sem kjarnorkuknúin skip verði að öllum líkindum með í för. Samtökin ítreka einnig þá kröfu sína að látið verði af svonefndum kurteisisheimsóknum erlendra herskipa í íslenskar hafnir.

Uppsveiflu lokið segir KB banki

Uppsveiflunni, sem hófst í ársbyrjun árið 2003 er nú lokið, að mati KB banka, sem styðst þar við væntingavísitölu Gallups, sem mælist nú rétt rúmlega hundrað stig, þriðja mánuðinn í röð. Þegar hún mælist hundrað, eru jafn margir neytendur jákvæðir og neikvæðir á aðstæður í efnahags- og atvinnumálum. Í fyrravetur mældist væntingavísiltalan 130 stig, en er nú fallin niður í hundrað, eða það sama og hún var við upphaf uppsveiflunnar árið 2003.

Jón Sigurðsson í formannsslag í Framsóknarflokknum

Jón Sigurðsson viðskipta-og iðnaðarráðherra ætlar að gefa kost á sér til formanns Framsóknarflokksins og vonast eftir heiðarlegri og vinsamlegri baráttu um formannssætið.

Mengunarslys á Eskifirði í rannsókn

Vinnueftirlitið, lögregla og fleiri vinna enn að rannsókn mengunarslyssins á Eskifriði í gær þegar eitrað gas náði til sundlaugargesta og um 30 veiktust. Eftir því sem Fréttastofan kemst næst er líðan þeirra fjögurra, sem fluttir voru flugleiðis á sjúkrahús í Reykjavík og þeirra tveggja sem fluttir voru til Akureyrar eftir atvikum. Um 10 manns dvöldu á sjúkrahúsinu í Neskaupstað í nótt, þar sem fylgst var með líðan þeirra til öryggis.

Friður um Straum

Friður skapast væntanlega í stjórn Straums-Burðaráss eftir að FL Group gekk í gærkvöldi frá kaupum á rúmlega 24% hlut þeirra Magnúsar Kristinssonar og Kristins Björnssonar í bankanum fyrir 47 milljarða króna.

Lækka lán og fresta framkvæmdum

Ríkisstjórnin ætlar að draga úr þenslu og minnka verðbólgu með því að lækka lánshlutfall og hámarkslán Íbúðalánasjóðs, fresta nýjum framkvæmdum og fá sveitarfélögin til að draga úr nýjum fjárfestingum á þessu ári og næsta.

Fjárbóndi drap dýrbíta og var laminn

Tveir hundar voru skotnir við bæinn Holt í Svínadal, eftir að þeir höfðu drepið fimmtán lömb í æði. Eigandi annars hundsins lagði hendur á búfjáreigandann sem segir sig sáran eftir. Hann hefur kært árásina til lögreglu.

Viðskipti fyrir 47 milljarða

FL Group festi í gær kaup á 24,2 prósenta hlut í Straumi-Burðarási fjárfestingabanka hf., en seljendur eru að stærstum hluta Magnús Kristinsson og Kristinn Björnsson.