Líðan mannsins stöðug eftir líkamsárás í Eyjum

Maðurinn sem fluttur var með sjúkraflugi til Reykjavíkur eftir líkamsárás í Vestmannaeyjum í nótt er í stöðugu ástandi, að sögn læknis á slysadeild Landspítalans í Fossvogi. Maðurinn hlaut höfuðáverka og þá einkum á andliti. Hann er enn til rannsóknar á slysadeild og verður mögulega lagður inn síðar í dag.

Nefbrutu lögreglumann

Tveir menn réðust á lögreglumann undir morgun í miðbæ Reykjavíkur þar sem hann var við skyldustörf. Hann var fluttur á slysadeild og reyndist vera nefbrotinn. Lögreglumaðurinn hafði reynt að stöðva mennina þegar þeir voru að sparka í liggjandi mann. Þeir brugðust hins vegar illa við og réðust þá á hann.

Steingrímur á Íslendingaslóðum

Steingrímur J. Sigfússon, fjármálaráðherra, er heiðursgestur á Íslendingahátíðum í Kanada og Bandaríkjunum sem standa nú um helgina og fram á þriðjudag í næstu viku. Íslendingahátíð er nú haldin í 112. sinn í Mountain í Norður-Dakóta og 122. sinn í Gimli í Manitoba en nokkuð fjölmennar Íslendingabyggðir voru á þessum svæðum á tímum vesturfaranna og reyna íbúar á svæðinu að virkja íslenskar rætur sínar meðal annars með því að halda hátíðirnar.

Rennslið í Skaftá náði hámarki í nótt

Rennslið í Skaftá náði hámarki við Sveinstind um þrjú leytið í nótt þegar það nam 295 rúmmetrum á sekúndu, eftir að hafa vaxið frá því um hádegisbilið í gærdag. Merki eru um að hlaupið hafi úr vestari Skaftárkatli. Aur og grugg í ánni náðu hámarki rétt fyrir kvöldmatarleytið í gær, en það sama segir um leiðni árinnar.

Tveir gistu fangageymslur á Akureyri

Líkamsárás var tilkynnt til lögreglunnar á Akureyri en þar fer hátíðin Ein með öllu fram. Talsverður erill var hjá lögreglunni í bænum og gistu tveir fangageymslur vegna ölvunar. Einn var tekinn grunaður um akstur undir áhrifum fíkniefna í umdæmi lögreglunnar á Hvolsvelli, sem meðal annars sér um Landeyjahöfn. Á Siglufirði, þar sem hátíðin Síldarævintýri er haldin, gekk nóttin vel. Mikill fjöldi er í bænum en lögregla segir alla hafa hegðað sér vel þrátt fyrir talsverða ölvun.

Fluttur með höfuðáverka til Reykjavíkur eftir líkamsárás í Eyjum

Þjóðhátíðargestur var fluttur með sjúkraflugi til Reykjavíkur með höfuðáverka eftir líkamsárás í Vestamannaeyjum í nótt. Til átaka kom milli fjögurra manna og þurftu nokkrir þeirra að leita sér aðhlynningar á Heilbrigðisstofnun Vestmannaeyjum. Þar tóku læknar þá ákvörðun að senda einn mannanna til Reykjavíkur en flogið var með hann á sjötta tímanum í morgun.

Þrír óku dópaðir

Umferð frá höfuðborgarsvæðinu gekk að mestu áfallalaust fyrir sig seinnipartinn í gær og í gærkvöldi, en hún var nokkuð minni um Suðurland en oft áður um þessa miklu ferðahelgi. Lögreglan á Selfossi þurfti að hafa lítil afskipti af ökumönnum en lögreglan í Borgarnesi stöðvaði í gærkvöldi tvo ökumenn sem óku undir áhrifum í fíkniefna og þann þriðja í nótt.

Keyra vatn í bílum í byggðina í Reykholti

Viðvarandi vatnsskortur hefur verið undanfarin sumur í Reykholti. OR hefur keyrt vatn í tankbílum á svæðið. Íbúar eru orðnir langeygir eftir úrbótum. Komið hefur fyrir að ekki væri hægt að sturta niður á salerni hótelsins.

Langisjór og hluti af Eldgjá friðlýst

Langisjór og hluti af Eldgjá og nágrenni hafa nú verið friðlýst og hefur Svandís Svavarsdóttir umhverfisráðherra gefið út reglugerð þar um. Umhverfisráðuneytið og sveitarstjórn Skaftárhrepps gengu frá samkomulagi um gjörðina. Innan þessara svæða eru náttúruminjar sem taldar eru hafa mikið gildi á heimsvísu. Að auki hefur svæðið mikið útivistar-, fræðslu- og vísindagildi.

Nafnið fylgdi kannabisleifum

Lögreglan í Reykjavík stöðvaði þrjú ungmenni í bíl aðfaranótt föstudagsins. Fólkið var að koma úr Heiðmörk og fann lögreglan kannabislykt í bílnum. Ekkert saknæmt fannst við leit.

Lögregla með mikið eftirlit

Mikill straumur bíla lá um Borgarnes í gær. Umferðin óx eftir því sem leið á daginn og var lögreglan með mikið eftirlit. Theodór Kr. Þórðarson, yfirlögregluþjónn í Borgarnesi, segir strauminn hafa legið mestmegnis til norðurs. Umferðin hafi gengið stórslysalaust. Eitthvað var um akstur undir áhrifum og einnig hafði fíkniefnahundurinn Tírí leitað í bílum og aftanívögnum.

Kennsl borin á öll fórnarlömb í Noregi

Fjöldi látinna eftir hryðjuverkin í Noregi er nú 77, eftir að einn lést af sárum sínum á spítala. Allir aðrir sem liggja á spítala eftir hryðjuverkin í Noregi fyrir viku eru nú sagðir úr lífshættu. Fimmtán eru þó enn taldir alvarlega slasaðir. Þá hafa kennsl verið borin á alla þá sem létust og engra er lengur saknað.

Grasagarðurinn skemmdur

Skemmdir voru unnar á Grasagarði Vestfjarða í Bolungarvík um síðustu helgi. Grjót í kringum beð og læk var fjarlægt og svo hent út í tjörnina í garðinum. „Þykir þetta miður því mikil vinna hefur verið lögð í garðinn til að gera hann sem fallegastan,“ segir á vef Náttúrustofu Vesturlands. Má fólk sem hefur einhverjar upplýsingar um skemmdarverkin hafa samband við Náttúrustofuna. - sv

Frumvarp stjórnlagaráðs afhent Alþingi

Stjórnlagaráð afhenti forseta Alþingis, Ástu Ragnheiði Jóhannesdóttur, frumvarp að nýrri stjórnarskrá í Iðnó í gær. Frumvarpið var samþykkt einróma á síðasta fundi ráðsins á miðvikudag. Leiðarstef stjórnlagaráðs voru þrjú: valddreifing, gegnsæi og ábyrgð.

Frekari hjálpar er þörf í Sómalíu

Bardagar héldu áfram á götum Mogadisjú í Sómalíu í gær þar sem friðargæslusveitir Afríkusambandsins unnu svæði af hópum skæruliða. Markmiðið er að tryggja að hjálpargögn nái til nauðstaddra sem hafa hópast til borgarinnar síðustu vikur og mánuði vegna hungursneyðar sem geisar í suðurhluta landsins.

Ástand búðarvoga ekki gott

Í sex fiskbúðum af fjórtán sem Neytendastofa gerði könnun hjá á höfuðborgarsvæðinu reyndist ástand voga ekki gott. Í tveimur matvöruverslunum af fjórtán reyndist löggilding voga ekki vera gild.

Söluverð efnisins er um 19 milljónir

Benedikt Pálmason var dæmdur í þriggja ára fangelsi í Héraðsdómi Reykjaness í gær fyrir að hafa flutt inn 3,8 kíló af amfetamíni.

Sakfelldur fyrir raksápuárásina

Breskur maður, sem réðst á fjölmiðlajöfurinn Rupert Murdoch með raksápu að vopni er Muroch var yfirheyrður af breskri þingnefnd, hefur verið sakfelldur fyrir árásina. Hinn 26 ára gamli Jonathan May-Bowles, sem hefur reynt fyrir sér sem grínisti, játaði greiðlega að hafa smurt raksápu á disk og klínt henni á Murdoch.

Hælisleitandi í haldi lögreglu

Erlendur maður á þrítugsaldri var handtekinn á Seyðisfirði í gær. Maðurinn var að koma með Norrænu frá Danmörku og var tekinn höndum þegar í ljós kom að skilríki hans voru fölsuð. Hann segist vera frá Palestínu hefur óskað eftir hæli.

Fjölmenn mótmæli í Kaíró

Hópur Salafista, öfgasinnaðra Múslima, réðst inn á Tahir torg í Kaíró í gær þar sem tugir þúsunda mótmæltu. Sunnan höfuðborgarinnar var skotið á bíl sem í voru kristnir menn og létust tveir. Ekki er vitað hvað byssumanninum gekk til en talið er að ódæðisverkið hafi tengst mótmælunum á Tahir torgi.

Boðað til kosninga á Spáni

Forsætisráðherra Spánar, José Luis Rodríguez Zapatero, hefur boðað til þingkosninga í nóvember, fjórum mánuðum fyrr en búist var við. Zapatero sagði snemmbúnar kosningar gera nýrri ríkisstjórn kleift að takast á við efnahagsvandamál landsins frá og með janúar.

Nauðgarar sjaldnast ópersónuleg skrímsli

„Okkar forgangsatriði er að berjast gegn þeirri hugmynd að fórnarlömb nauðgana geti á einhvern hátt sjálfum sér um kennt. Ábyrgð á nauðgunum er alfarið hjá gerandanum en því miður virðist fókusinn í almennri umræðu oft verða á hegðun fórnarlambsins. segir Finnborg Salome Steinþórsdóttir, sem er 25 ára gömul og stundar mastersnám í kynjafræði við Háskóla Íslands. Hún er talsmaður NEI-hreyfingarinnar. „Nú fyrir verslunarmannahelgina hafa skilaboð okkar verið að á útihátíð, rétt eins og annars staðar, hefurðu rétt á því að verða ekki fyrir ofbeldi.“

Var í þvottavélinni í klukkutíma

Það þykir með ólíkindum að átta vikna kettlingur hafi lifað það af að vera klukkutíma inni í þvottavél á meðan að vélin var í gangi. Kettlingurinn er nú hinn hressasti en þurfti þó að vera nokkra daga á spítala eftir uppákomuna.

Breti telur sig hafa fundið Madeleine McCann

Bresk kona á ferðalagi um Norður-Indland telur sig hafa fundið Madeleine McCann, sem hvarf sporlaust í Portúgal fyrir fjórum árum. Hún er átta ára gömul, sé hún á lífi. Lögreglan á Indlandi hefur tekið DNA-sýni úr stúlkunni sem leiða eiga sannleikann í ljós.

Breivik næst yfirheyrður eftir helgi

Fjöldamorðinginn Anders Breivik var færður úr einangrunarvist í öryggisfangelsinu Ila í morgun til yfirheyrslu í höfuðstöðvum lögreglunnar. Þar er ætlunin að fara yfir síðasta vitnisburð mannsins síðan á laugardag og þær upplýsingar um ódæðisverkin sem fram hafa komið síðan þá.

Hertaka svæði stjórnarhersins

Hundruð uppreisnarmanna hröktu hermenn Múammars Gaddafí, leiðtoga Líbíu, frá þremur bæjum sem þeir hafa haldið í Vestur-Líbíu.

Fyrsta af allt of mörgum jarðarförum

"Þetta er fyrsta af allt of mörgum jarðarförum eftir hinar hræðilegu hörmungar á föstudaginn var,“ sagði Jonas Gahr Stoere, utanríkisráðherra Noregs, eftir að ung stúlka sem fórst í hryðjuverkaárásunum í Noregi fyrir viku var borin til grafar í dag, sú fyrsta af fórnarlömbum Anders Breiviks.

Á annað þúsund hafa greinst með lifrarbólgu

Á annað þúsund manns hafa greinst með lifrarbólgu B eða C frá aldamótum. Sóttvarnalæknir segir um alvarlegan faraldur að ræða, en Alþjóðaheilbrigðisstofnunin lýsir þungum áhyggjum af ástandinu á heimsvísu.

Fjölmargir íslenskar skátar í Svíþjóð

Hátt í þrjú hundruð íslenskir skátar eru staddir á heimsmóti skáta í Kristianstad í Svíþjóð. Mótið var formlega sett í gærkvöldi en um 40 þúsund skátar eru á svæðinu frá 160 löndum

Umferðin gengur vel

Umferð úr bænum hefur gengið vel í dag að sögn lögreglu. Umferðarþunginn dreifir sér nú á dagana fyrir og eftir helgi en ekki einungis á föstudag og mánudag eins og áður.

Börnin fá óvenjulegt kraftaverkameðal

Vannærð börn fylla flóttamannabúðir nærri Sómalíu, en stríðsátök og hungursneyð þjaka landið. Öll fjárframlög til Rauða kross Íslands fara nú í að kaupa óvenjulegt kraftaverkameðal fyrir börnin, vítamínbætt hnetusmjör, sem reynst getur þeim lífgjöf.

Fíkniefnasali handtekinn

Karl á þrítugsaldri var handtekinn í Breiðholti í gærkvöld en í fórum hans fundust nokkrir tugir gramma af marijúana. Ætla má að fíkniefnin hafi átt að selja um verslunarmannahelgina.

Barist til að tryggja aðstoð

Friðargæsluliðar Afríkusambandsins börðust í gær við skæruliðahópa í Mogadisjú, höfuðborg Sómalíu, til að tryggja að hjálpargögn skili sér.

Alls hafa 77 nöfn verið birt

Norska lögreglan birti seinnipartinn í dag nöfn 36 þeirra sem létu lífið í hryðjuverkaárásunum í Útey og höfuðborginni Osló fyrir viku. Áður hafði lögreglan birt 41 nafn en í heildina hafa verið birt 77 nöfn. Fyrstu jarðarfarir fórnarlamba fjöldamorðingjans Anders Breivik fóru fram í dag.

Foreldrar Sturlu færðu gjörgæsludeildinni gjöf

Kristín Dýrfjörð og Friðrik Þór Guðmundsson, foreldrar Sturlu Þórs Friðrikssonar sem lét lífið eftir flugslys í Skerjafirði árið 2000, hafa fært gjörgæsludeildinni í Fossvogi að gjöf sjónvarp, DVD tæki og nokkra mynddiska til minningar um hann.

Krummi gerir sig heimkominn í Norðlingaholtinu

Svo virðist sem krumminn gæfi, sem Vísir greindi frá þann 20. júlí síðastliðinn, hafi gert sig heimkominn í Norðlingaholtinu, en hann vakti fyrst athygli fréttastofu þegar íbúar höfðu samband eftir að hrafninn hafði eytt 40 mínútum að leik með krökkum á svæðinu.

Rennsli eykst í Skaftá

Rennsli í Skaftá hefur aukist á ný, að því er fram kemur á vef Veðurstofunnar. Leiðni hækkar áfram en aur og grugg hefur vaxið á ný. Merki eru um að hlaupið hafi úr vestari Skaftárkatli. Ekki eru merki um hlaupóróa en náið er fylgst með svæðinu.

Þriggja ára fangelsi fyrir amfetamínsmygl

Benedikt Pálmason var í dag dæmdur í þriggja ára fangelsi fyrir að hafa flutt inn rúmlega 3,8 kíló af amfetamíni til landsins með Goðafossi þann 13. júní síðastliðinn.

Stoltenberg sagði fórnarlömbin hetjur

Jens Stoltenberg, forsætisráðherra Noregs, sagði að fórnarlömb fjöldamorðingjans Anders Breivik væru hetjur, þegar hann ávarpaði minningarsamkomu sem haldin var í Osló í dag á vegum ungliðahreyfingar norska Verkamannaflokksins. Hreyfingin var skotmark árásarinnar á Útey.

Fyrstu jarðarfarirnar fóru fram í dag

Hundruðir fylgdu í dag til grafar hinni norsku Bano Rashid sem var aðeins átján ára þegar fjöldamorðinginn Anders Breivik myrti hana í Útey á dögunum. Þetta var fyrsta fórnarlamb hans sem er jarðsett.

Sundlaugaverðir lenda í útistöðum við foreldra

Starfsmenn sundlauga lenda mjög oft í útistöðum við foreldra vegna kæruleysis. Foreldrarnir ætlast í sumum tilfellum til að starfsmennirnir taki að sér barnagæslu á meðan þeir sjálfir liggi í sólbaði. Þetta segir Hafþór B. Guðmundsson, lektor við HÍ að Laugarvatni. Hann tók þátt í að semja nýja reglugerð um hollustuhætti á sundstöðum.

Bleikir pennar stofna nýjan vef

Heiða Þórðardóttir og Steinunn Fjóla Jónsdóttir, sem báðar eru pistlahöfundar vefritsins Bleikt.is, virðast hafa ákveðið að breiða út vængi sína og fljúga úr bleika hreiðrinu, en þær koma til með að opna nýjan vef þann 1. ágúst næstkomandi, sem bera mun nafnið Spegill.

Fyrsta útförin eftir hryðjuverkin í Osló

Fyrsta útför fórnarlambs hryðjuverkaárásanna í Noregi fyrir viku fer fram í dag þegar hin 18 ára gamla Bano Abodakar Rashid verður jarðsungin. Þá verður einnig minningarathöfn í Osló á vegum ungliðahreyfingar norska verkamannaflokksins, en hreyfingin var skotmark árásarinnar á Útey. Meðal viðstaddra verður Jens Stoltenberg, forsætisráðherra landsins, og Jóhanna Sigurðardóttir, forsætisráðherra Íslands, auk formanns ungra jafnaðarmanna á Íslandi.

Hælisleitandi með fölsuð skilríki á Norrænu

Lögreglan á Egilsstöðum hefur nú í haldi erlendan mann sem kom til Seyðisfjarðar með Norrænu í gær. Maðurinn var tekinn höndum þegar í ljós kom að skilríki hans voru fölsuð, en hann segist vera frá Palestínu og er hingað komin í hælisleit.

Lögmaður Breivik: Þetta er ekki spurning um sýknu eða sakfellingu

Geir Lippestad, verjandi Anders Behring Breivik, segir í viðtali við norska miðilinn Verdens Gang að það hefði ekki verið auðvelt að taka ákvörðunina um að verja hryðjuverkamanninn, sem varð valdur að dauða 76 manns þann 22. júlí síðastliðinn.