Sundlaugaverðir lenda í útistöðum við foreldra

Starfsmenn sundlauga lenda mjög oft í útistöðum við foreldra vegna kæruleysis. Foreldrarnir ætlast í sumum tilfellum til að starfsmennirnir taki að sér barnagæslu á meðan þeir sjálfir liggi í sólbaði. Þetta segir Hafþór B. Guðmundsson, lektor við HÍ að Laugarvatni. Hann á sæti í hópi á vegum Umhverfisstofnunar sem vinnur nú að endurskoðun reglugerðar um hollustuhætti á stundstöðum.

Vísir greindi frá því í morgun að Anton Bjarnason, sundkennari til fjörtíu ára, var stöðvaður þegar hann ætlaði með fjögur barnabörn sín, sjö og tíu ára, í sundlaugina að Laugarvatni í gær. Ástæðan er reglur um hollustuhætti á sund- og baðstöðum. Samkvæmt þeim má ekki fara með fleiri en tvö börn yngri en tíu ára í sund, nema að um sé að ræða foreldri eða forráðamann barnanna. Hins vegar getur leiðbeinandi á sundnámskeiði verið með 15 börn í sinnu umsjá. Anton segir að þarna sé ekkert samræmi í reglunum.

Hafþór segir það ekki rétt að barnabörn Antons hafi verið orðin tíu ára. Ef þau hefðu verið orðin það mættu þau fara ein í sund. Hann segir auk þess að reglugerðin sé mjög góð að flestu leyti. Íslendingar hafi verið of værukærir í öryggismálum á sundstöðum hingað til og því hafi þurft að breyta. Hann tekur hins vegar undir þær ábendingar sem Anton bendir á. Hann segir að reglugerðin fari til endurskoðunar í ágúst. Starfsmennirnir sem afgreiddu Anton hafi hins vegar brugðist hárrétt við miðað við það hvernig reglugerðin er núna.

„Ég á von á því að menn muni klykkja betur á því hvað er forráðamaður," nefnir Hafþór sem dæmi um breytingar sem þyrfti að gera á reglugerðinni. Hann segist sjálfur eiga þrjú barnabörn sem hann fái stundum til sín um helgar. „Er ég ekki forráðamaður barnanna, ef ég er með barnabörnin hjá mér yfir helgi?"