Komu göngukonu til aðstoðar

Björgunarsveitarmenn voru kallaðir út í gærkvöldi til að aðstoða fjallgöngukonu, sem hafði snúið sig illa á fæti í hlíðum Helgafells, sunnan við Hafnarfjörð. Leiðangurinn gekk vel, enda veður gott, og var konunni komið undir læknis hendur. Óvenju mikið hefur verið um það að undanförnu, að göngufólki hlekkist eitthvað á, en kunnugir segja að það megi eflaust rekja til þess að sjaldan eða aldrei hafi jafn margt göngufólk verið á ferðinni og í sumar, bæði Íslendingar og útlendingar

Skotið á danska lögregluþjóna í nótt

Skotið var á tvo lögregluþjóna í úthverfi Óðinsvéa í Danmörku í nótt þegar þeir reyndu að handsama mann sem lenti í árekstri eftir glæfraakstur. Lögreglan hafði veitt manninum eftirför sem endaði með árekstri.

Brotist inn hjá Póstinum

Brotist var inn í aðalskrifstofur Íslandspósts í Stórhöfða i Reykjavík í nótt og komst þjófurinn undan. Hann rótaði víða í skúffum og skápum í leit að verðmætum , en ekki er enn vitað hvort, eða hvað hann hafði upp úr krafsinu. Þá er líka óljóst hvort hann hefur gramsað eitthvað í póstsendingum.

Karzai leiðir í könnunum í Afganistan

Sitjandi forseti Afganistans, Hamid Karzai fær mest fylgi í komandi forsetakosningum í landinu samkvæmt nýrri könnun sem greint hefur verið frá. Karzai fær þó ekki hreinan meirihluta og því þyrfti að kjósa aftur á milli hans og næsta manns ef útkoman í kosningunum sem fram fara í næstu viku verður á þessa leið.

Bandaríkjamenn mótmæla lausn Lockerbie morðingja

Bandaríkjamenn hafa lýst sig andsnúna þeim áformum breskra stjórnvalda að sleppa hryðjuverkamanninum al-Megrai úr fangelsi af mannúðarástæðum.

Tævan: Óttast að mörg hundruð hafi farist

Yfirvöld í Tævan áætla nú að 390 manns hafi farist þegar aurskriða féll á þorpið Shiaolin um síðustu helgi. Þetta er í fyrsta skipti sem stjórnvöld tjá sig um tölu látinna í þorpinu en fyrst óttuðust menn að um 700 manns hefðu grafist undir þegar skriðan sópaði þorpinu bókstaflega í burtu.

Icesave enn fast í fjárlaganefnd

Fjárlaganefnd Alþingis frestaði fundi sínum um Icesave málð um klukkan hálf tvö í nótt og kemur aftur saman í hádeginu. Þingflokkum voru kynnt drög að nefndaráliti í gærkvöldi og reyndust mjög skiptar skoðanir um þau.

Ógnuðu manni með riffli í Höfðahverfi

Fjórir ungir menn voru handteknir seint í gærkvöldi, eftir að þeir höfðu beint riffli að manni, sem var við vinnu sína í Höfðahverfi í Reykjavík. Manninum var að vonum brugðið.

Níu ára drengur rekinn úr fótboltaliði

Níu ára gamall drengur hefur verið rekinn úr 6. flokki ÍR í fótbolta vegna hegðunarvandamála. Hann má því ekki mæta á æfingar hjá félaginu. Foreldrar hans voru látnir vita af brottrekstrinum í bréfi. Móðir hans gagnrýnir þetta harðlega. Að sögn Halldórs Þ. Halldórssonar, yfirþjálfara yngri flokka ÍR, var þetta síðasta úrræði félagsins.

Talsmenn neytenda fordæma verðmerkingar

„Ég vil fá þetta burt. Það hefur lengi verið skoðun Neytendasamtakanna að það eigi að banna forverðmerktar vörur. Stærsti ágallinn er sá að þær halda uppi verði. Því fyrr sem þær verða bannaðar, því betra," segir Jóhannes Gunnarsson, formaður Neytendasamtakanna. Gísli Tryggvason, talsmaður neytenda, segir löngu tímabært að stöðva forverðmerkingar á matvöru.

Örlög týnda rússneska skipsins eru enn ráðgáta

Örlög rússneska flutningaskipsins Arctic Sea, sem hvarf á Ermarsundi fyrir rúmlega hálfum mánuði, eru enn hulin ráðgáta. Ekkert hefur spurst til skipsins síðan 28. júlí.

Þúsundir mótmæla meðferð á flóttamönnum í Kaupmannahöfn

Danska lögreglan réðst snemma í gærmorgun inn í Brorsonkirkju í Kaupmannahöfn og handtók írakska flóttamenn, sem hafa haft þar afdrep undanfarið.

Hækkun álverðs mikið ánægjuefni fyrir orkufyrirtækin í landinu

Verðið á áli hefur hækkað um 59 prósent frá því í mars og kostaði tonnið 1.997 dali í gær. „Þetta er mikið ánægjuefni fyrir orkufyrirtækin og hefur jákvæð áhrif á tekjurnar,“ segir Stefán Pétursson, framkvæmdastjóri fjármálasviðs Landsvirkjunar.

Virkar ekki sem skyldi

Bandaríkjastjórn hefur undanfarið boðið eigendum gamalla bílskrjóða að skila þeim til förgunar en fá í staðinn peninga til að kaupa sér nýja eyðsluminni bifreið fyrir.

Íran: Bönnum árásir á kjarnorkuver

Stjórnvöld í Íran vilja að alþjóðlegt bann verði lagt við árásum á kjarnorkuver.

Kvótaúthlutun á makríl: Samningsstaða Íslands er óljós

„Ekki er enn ljóst hvort Íslandi verður meinuð þátttaka í fundum hinna strandríkjanna um stjórnun veiða úr makrílstofninum fyrir árið 2010. Þar til þau viður­kenna Ísland sem fullgildan aðila að stjórn veiðanna og réttmæta hlutdeild okkar munum við stunda lögmætar makrílveiðar á okkar forsendum," segir Friðrik J. Arngrímsson, framkvæmdastjóri LÍÚ, í niðurlagi greinar sem birtist í Fiskifréttum í gær.

Stöð 2 Sport: Leikdögum fjölgar í Meistaradeildinni

„Þetta er auðvitað mikið fagnaðarefni fyrir knattspyrnu­áhugamenn hér landi, en ekki síður viðurkenning fyrir fyrirtækið. Það hefur komið skýrt fram hjá sölu­aðilum þessa efnis að þeir telja að við höfum verið að þjóna markaðnum mjög vel og séum besti samstarfsaðilinn á markaðnum. Þeir líta á það sem sína hagsmuni að við komumst í gegnum þetta," segir Ari Edwald, forstjóri 365 miðla.

Eftirlit á miðunum: Um borð í 23 báta

Fiskistofa og Landhelgisgæslan fóru í júlí í sameiginlegan leiðangur í eftirliti á grunnslóð við landið. Leiðangurinn stóð í átta daga, en á þeim fimm dögum sem nýttust til verksins var farið um borð í alls 23 báta; tuttugu handfærabáta, einn togbát, einn línubát og einn netabát.

Með riffil út um bílgluggann

Lögregla fékk tilkynningu um að verið væri að ógna vegfarendum með skotvopni út úr bíl í grennd við Bíldshöfða um klukkan hálftíu í kvöld.

Lögreglukona gagnrýnir Stefán Eiríksson í opnu bréfi

Lögreglukonan Bylgja Hrönn Baldursdóttir sendir Stefáni Eiríkssyni, lögreglustjóra á höfuðborgarsvæðinu, tóninn í opnu bréfi sem hún sendi honum í dag. Hún segir lögreglustjórann því miður á góðri leið með að missa lögreglumennina frá sér.

Enn fundað í fjárlaganefnd

Kristján Þór Júlíusson, einn fulltrúa Sjálfstæðisflokks í fjárlaganefnd, segir enn unnið að fyrirvaraleiðinni í nefndinni. Enn hefur nefndin ekki náð saman.

Tollverðir felldu líka kjarasamninga

Tollverðir felldu í dag nýjan kjarasamning félagsins sem undirritaður var 3. júlí síðastliðinn. Á kjörskrá voru 115, en alls greiddu 48 atkvæði í rafrænni kosningu á heimasíðu Tollvarðafélagsins.

Fjórir lögreglubílar stöðvuðu einn á Sæbrautinni

Fjórir lögreglubílar stöðvuðu einn fólksbíl á Sæbrautinni milli klukkan 21 og 22 í kvöld. Lögregla vildi ekki gefa neinar upplýsingar um hvað væri á seyði, en staðfesti hins vegar að slíkur fjöldi bíla hefði farið í mál á svæðinu.

Söguleg stund: Fleiri stúlkur fæðast en drengir

Árið 2008 fæddust fleiri stúlkubörn í höfuðborg Indlands, Delí, en á árinu fæddust 1004 stúlkubörn fyrir hverja þúsund drengi.

Dýrbítur gengur laus í Mosfellsdalnum

Hreinn Ólafsson, bóndi í Helgadal segir að bændur á svæðinu hafi síðasta hálfa mánuðinn fundið sex dauðar ær sem augljóslega hafi veið drepnar af hundi.

Nýr leikhússtjóri: Þjóðleikhúsráð skilar umsögnum eftir helgi

Þjóðleikhúsráð ætlar eftir helgina að senda menntamálaráðherra umsagnir sínar um umsækjendur um embætti Þjóðleikhússstjóra.

Útvarpsgjald: Vill koma til móts við öryrkja

Menntamálaráðherra hefur sett af stað vinnu til að endurskoða innheimtu á útvarpsgjaldinu svokallaða til að koma betur til móts við öryrkja og aðra hópa.

Frí frá þingstörfum hvarfla ekki að Þráni

Þráinn Bertelsson, þingmaður Borgarahreyfingarinnar, segir það ekki hvarfla að sér að taka sér frí frá þingstörfum þó restin af þingflokknum vilji að hann geri það.

Hert á höftum verði gjaldeyrisforðinn ekki aukinn

Seðlabankinn kynni að þurfa að herða á gjaldeyrishöftum, verði ekki unnt að auka gjaldeyrisforðann, vegna Icesave málsins, segir hagfræðiprófessor.

Vilja leikfrestun vegna svínaflensu

Knattspyrnudeild Grindavíkur hefur óskað eftir þvi við mótanefnd knattspyrnusambands Íslands að leik Grindavíkur og ÍBV á sunnudag verði frestað.

Viðsemjendur fái niðurstöðu fjárlaganefndar á undan Alþingi

Til stendur að kynna Bretum og Hollendingum niðurstöðu fjárlaganefndar í Icesave málinu, bak við tjöldin, áður en breytingar á frumvarpinu verða lagðar fyrir Alþingi. Heimildir fréttastofu herma að gengið sé langt í fyrirvörum.

Slökkviliðs- og sjúkraflutningamenn höfnuðu líka kjarasamningum

Slökkviliðs- og sjúkraflutningamenn höfnuðu í dag kjarasamningum sem gerðir voru í sumar með afgerandi meirihluta. Póstatkvæðagreiðsla um framlengingu og breytingar á kjarasamningum sem skrifað var undir í júlí hófst 6. ágúst og lauk í dag.

Davíð Oddsson á Austurvelli

Um þrjúþúsund manns eru mættir á samstöðufund á Austurvelli, en þar á meðal er Davíð Oddsson, fyrrverandi Seðlabankastjóri.

Búsáhaldabylting í ítölskum smábæ

Kirkjuklukkurnar í ítalska smáþorpinu Mezzema hljóðnuðu fyrr í mánuðinum fyrir tilstuðlan prestsins á staðnum. Ástæðan var sú að ferðamaður hafði kvartað yfir hávaðanum sem þær framkölluðu snemma á morgnana.

Hundruð manna að safnast saman á Icesave fundi

Um 2- 300 manns hafa safnast saman á Austurvelli þar sem samstöðufundur vegna Icesave samninganna hefst klukkan fimm.

Óvíst að Reykvíkingar fái mjólk á morgun

Bilun kom upp í dag í stjórnbúnaði sem stýrir framleiðslu á mjólk hjá Mjólkursamsölunni í Reykjavík.

Mikilvægt að kanna hvað veldur fjölgun barnaverndarmála

Árni Páll Árnason, félags- og tryggingamálaráðherra, lítur það mjög alvarlegum augum að tilkynningum til barnaverndayfirvalda séu að aukast.

Langflestir ganga niður Laugaveginn

Langflestir vegfarendur á Laugavegi og Skólavörðustíg í júlí eru fótgangandi samkvæmt könnun sem voru gerð var á ferðavenjum þeirra. „Veðrið hefur leikið við okkur í sumar og margir gengið Laugaveginn til að versla, skoða í glugga, fá sér matarbita eða bara til að njóta mannlífsins," segir Þorbjörg Helga Vigfúsdóttir formaður umhverfis- og samgönguráðs í tilkynningu.

Lögfræðingar á fundi fjárlaganefndar

Hópur lögfræðinga sem fenginn var til þess að útbúa breytingar á frumvarpi um ríkisábyrgð vegna Icesave settist á fund með fjárlaganefnd rétt uppúr klukkan þrjú í dag.

Annað innbrotið í Langholtskirkju á skömmum tima

Innbrotið í Langholtskirkju í nótt er annað innbrotið í kirkjuna á skömmum tíma. Brotamennirnir sem fóru inn í kirkjuna í nótt höfðu ekkert upp úr krafsinu nema ef vera skyldi að hafa svalað skemmdarfýsn sinni en þeir komust inn með því að brjóta rúðu á skrifstofu kirkjunnar.

Lögreglumenn höfnuðu kjarasamningi

Lögreglumenn höfnuðu með miklum meirihluta kjarasamningi sem gerður var við hið opinbera í sumar. Mikil óánægja hefur verið meðal lögreglumanna undanfarin misseri með launakjör og starfsaðstæður. Því höfnuðu rúmlega 91% félaga í Landssambandi lögreglumanna samningnum.

Torfæruhjólin fundin - eigandi stendur við fundarlaunin

Torfæruhjólin sem lýst var eftir á Vísi í morgun eru komin í leitirnar. Eigandinn stendur við fundarlaunin, en ætlar að rukka þjófana um þau seinna meir.

Hörður Arnarson ráðinn forstjóri Landsvirkjunar

Hörður Arnarson, forstjóri Sjóvár, hefur verið ráðinn forstjóri Landsvirkjunar. Hann tekur við af Friðriki Sophussyni sem hefur verið forstjóri Landsvirkjunar undanfarin tíu ár eigi síðar en 1. janúar 2010.

Edwards á barn með viðhaldinu

John Edwards, fyrrum forsetaframbjóðandi í Bandaríkjunum, á barn með fyrrum starfsmanni úr forsetaframboði hans, segir National Enquirer. Blaðið sagði í fyrra frá sambandi Edwards við konuna sem heitir Rielle Hunter. Edwards þurfti að taka faðernispróf eftir að Hunter krafðist þess að fá meðlag frá Edwards. Edwards er giftur en eiginkona hans segist ekki vita hvort hann sé faðir barnsins.

Bíræfnir brotamenn brutust inn í kirkju

Brotist var inn í Langholtskirkju í nótt eða í morgun, en lögreglan fékk tilkynningu um málið um tíuleytiið. Samkvæmt upplýsingum frá lögreglunni er ekki vitað hvort einhverju var stolið.