Dýrbítur gengur laus í Mosfellsdalnum

Hreinn Ólafsson, bóndi í Helgadal segir að bændur á svæðinu hafi síðasta hálfa mánuðinn fundið sex dauðar ær sem augljóslega hafi veið drepnar af hundi.

Ærnar hafa allar fundist í Seljadalnum, sem er afréttur Mosfellinga og lágu hræin öll meðfram Seljadalsánni eða úti í henni miðri. Bændurna grunar að ærnar hafi allar verið drepnar á svipuðum tíma og jafnvel af sama hundinum. Ærnar voru með tíu lömb samtals og hefur ekkert til þeirra spurst.

„Hundar vaða hér uppi og það er staðreynd að sumir kunna með þá að fara en aðrir ekki," segir Hreinn. Á síðustu 6 -7 árum hafa tugir kinda verið drepnir á svæðinu að sögn hans. Hreinn segir að nýjasta tilvikið hafi verið tilkynnt til lögreglu en að lítið sé hægt að gera í málum sem þessum. Brýnt sé því að vekja athygli hundaeigenda á hættunni af því að sleppa dýrunum lausum á svæðum eins og í Seljadal þar sem mikið er af fé.

Hægt er að sjá myndir af illa útleiknum kindarhræjunum hér að neðan. Hins vegar er rétt að vara viðkvæma við myndunum.