Búsáhaldabylting í ítölskum smábæ

Kirkjuklukkurnar í ítalska smáþorpinu Mezzema hljóðnuðu fyrr í mánuðinum fyrir tilstuðlan prestsins á staðnum. Ástæðan var sú að ferðamaður hafði kvartað yfir hávaðanum sem þær framkölluðu snemma á morgnana.

Íbúar þorpsins voru þó allt annað en ánægðir með þann ráðahag. Rúmur tugur mótmælenda fór út á götu og lamdi í potta og pönnur til að krefjast þess að klukkunum yrði hringt á ný.

Anna Daneri, leiðtogi mótmælendanna, sagði að snemma í gærmorgun hefði verið látið undan og bjöllurnar ómað að nýju. Það var eftir að hún og félagar hennar höfðu barið búsáhöld í nokkra daga.

Anna sagði klukknahljóminn veita öldungum þorpsins félagsskap, auk þess sem um aldagamla hefð væri að ræða.

Þess er skemmst að minnast þegar íslenskir mótmælendur gripu til búsáhalda og streymdu í miðbæinn til að láta í sér heyra í byrjun árs - þá af öðrum ástæðum en hinir búsáhaldabyltingarsinnuðu Ítalir.