Hækkun álverðs mikið ánægjuefni fyrir orkufyrirtækin í landinu

Verðið á áli hefur hækkað um 59 prósent frá því í mars og kostaði tonnið 1.997 dali í gær. „Þetta er mikið ánægjuefni fyrir orkufyrirtækin og hefur jákvæð áhrif á tekjurnar,“ segir Stefán Pétursson, framkvæmdastjóri fjármálasviðs Landsvirkjunar.

Lánshæfismat Landsvirkjunar lækkaði nýlega og er í neikvæðu horfi innanlands. Stefán segir hækkandi álverð ekki hafa áhrif á lánshæfismatið til skemmri tíma en geti gert það yfir lengri tíma. Stóra málið varðandi lánshæfismat Landsvirkjunar er hins vegar það að lánshæfismat ríkisins er mjög lágt, að sögn Stefáns.

Hæst hefur álið verið í 3.263 dölum á tonnið og var það í júlí í fyrra. Eftir heimskreppuna síðasta haust tók álið mikla dýfu og var tonnið í 1.473 dölum um áramótin. Álið var í sögulegu lágmarki í mars, í 1.257 dölum á tonnið, en fór stigvaxandi og var í 2.006 dölum á mánudaginn.

Ágúst F. Hafberg, framkvæmdastjóri viðskiptaþróunar og samskipta hjá Norður­áli, segir hækkandi álverð ekki hafa mikil áhrif á daglega starfsemi félagsins en auki hins vegar tekjurnar og það sé gott. „Sveiflur í álverði eru alþekktar og menn eru undirbúnir fyrir þær,“ segir Ágúst.

Ágúst segir hækkun álverðs geta hækkað lánshæfismat Norðuráls en matið sé nú þegar sterkt, því fyrirtækið sé skuldlaust.