Flugdrekinn dró mann í skurð

Maður á fertugsaldri var fluttur á slysadeild í Reykjavík í dag eftir að flugdreki sem hann hélt í dró hann á eftir sér svo að maðurinn datt ofan í skurð. Flugdrekinn var í stærra lagi, af þeirri gerð sem skíðamenn nota gjarnan til að drífa sig áfram. Maðurinn hafði hins vegar ekki skíði á fótunum og hafði ekki við drekanum á hlaupum.

Jórdaníukonunugur varar við borgarastríði í þremur löndum

Abdullah, konungur Jórdaníu, varar við því að borgarastríð geti brotist út á þremur stöðum í Miðausturlöndum ef ekkert verði að gert: í Írak, Líbanon og Ísrael. Hann segir að fundur George Bush Bandaríkjaforseta með Nuri al-Maliki, forsætisráðherra Íraks, í Jórdaníu í vikunni, muni skipta sköpum í baráttunni fyrir friði í Írak og á svæðinu öllu.

Bílalest Malikis grýtt í Bagdad

Bílalest forsætisráðherra Íraks, Nouri Al-Malikis var grýtt þegar hann fór í úthverfi Bagdad-borgar til að votta virðingu sína rúmlega 200 fórnarlömbum einnar mannskæðustu sprengjuárásar síðan Bandaríkjamenn réðust inn í Írak. Reiðin kraumar í almenningi í Sadr-hverfinu í Írak þar sem útgöngubann er nú þriðja daginn í röð.

Blóðbönd fengu dómnefndarverðlaun í Þýskalandi

Íslenska kvikmyndin Blóðbönd fékk verðlaun dómnefndar á þýsku kvikmyndahátíðinni í Mannheim Heidelberg í gærkvöldi en verðlaunin voru veitt sérstaklega fyrir leikstjórn. Þau þykja stór fjöður í hatt Árna Ólafs Ásgeirssonar, leikstjóra myndarinnar en hátíðin er með þeim stærstu í Þýskalandi.

Ísraelar notuðu jarðsprengjur í Líbanon í sumar

Nú er talið fullvíst að Ísraelskir hermenn hafi komið fyrir jarðsprengjum þegar þeir voru í Líbanon í sumar en þessu hafa Ísraelar staðfastlega neitað. Tveir starfsmenn Sameinuðu þjóðanna stigu á jarðsprengjur á föstudaginn á svæði sem hafði verið hreinsað af jarðsprengjum eftir að Ísraelsher yfirgaf Líbanon árið 2000.

Stjörnuskoðunarferð á Esjuna í kvöld

Ferðafélag Íslands stendur fyrir stjörnuskoðunarferð í kvöld enda fádæma gott skyggni og skilyrði til störnuskoðunar. Fararstjórar verða Ólafur Örn Haraldsson og Snævar Guðmundsson stjörnufræðingur. Við Esjurætur verður síðan tjald þar sem hægt verður að fá heitt kakó til að ylja sér við þegar komið er niður.

Bresks drengs saknað eftir að báti hvolfdi

14 ára gamals bresks drengs er saknað undan strönd Suður-Englands, eftir að litlum kappróðrarbáti sem hann og vinur hans tóku í leyfisleysi hvolfdi undan suðurströnd Englands. Björgunarbátur fann félaga drengsins í sjónum, um klukkan 3 í morgun, 25 mínútum eftir að bátnum hvolfdi í vindhviðu. Strákarnir voru ekki í björgunarvestum.

Slökkvilið með viðbúnað við lendingu flugvélar á Akureyri

Viðbúnaður var á Akureyrarflugvelli í dag þegar þegar flugvél Iceland Express var nýlent klukkan 14:20. Slökkviliðið var kvatt á flugvöllinn og kannaði vélina út af reykjarlykt sem barst inn í vélina. Farþegar eru allir komnir frá borði og sakaði engan. Áhöfn lét vita af reykjarlyktinni en hún var til komin af sviðnu dekkjagúmmíi eftir að vélin lenti. Engin hætta var á ferðum.

Aðstoð Írana í Írak skilyrðum háð

Mahmoud Ahmadinejad, forseti Írans, sagði í dag að Íranar væru tilbúnir að hjálpa Bandaríkjamönnum og Bretum í Írak en eingöngu ef þeir hétu því að breyta stefnu sinni og draga herlið sitt til baka. Jalal Talabani, forseti Íraks, er væntanlegur til Írans á morgun þegar útgöngubanni verður aflétt í Bagdad. Þeir Ahmadinejad munu ræða ástandið í Írak.

Heimsókn páfa mótmælt

Þúsundir múslima mótmæla heimsókn Benedikts sextánda páfa til Istanbúl í Tyrklandi, sem hefst á þriðjudaginn. Fólkið hrópar: "ekki koma, páfi," að stórum myndum af Benedikt sem varpað er upp á risaskjá í miðborg istanbul. Óvild í garð páfa stafar af ræðu hans í september þar sem hann vitnaði í kristinn keisara sem fór niðrandi orðum um Múhameð spámann.

Sigurörn í forsal vinda

Örninn Sigurörn flaug vængjum þöndum úr fangi Sigurbjargar Pétursdóttur fyrir ofan grunnskólann á Grundarfirði í dag. Hátt í hundrað manns fylgdust með þegar Sigurbjörg tók Sigurörn í fangið og þrátt fyrir að hann væri orðinn hinn sprækasti þá hélt hún honum meðan þau kvöddust og svo flaug hann fugla hæst og hvarf úr augsýn.

300 Bretar vilja geislarannsókn eftir dauða njósnara

300 manns hafa leitað til heilbrigðisyfirvalda í Bretlandi eftir að í ljós kom að eitrað var fyrir rússneska njósnaranum Litvinenko með geislavirku póloníumi í byrjun mánaðarins. Fólkið verður sett í rannsókn öryggisins vegna en ólíklegt er talið að geislavirkni sem fundist hefur á sushi-veitingastaðnum þar sem hann át, hafi haft áhrif á aðra í umhverfinu.

Yfirlýsingar Jóns skref í rétta átt

Össur Skarphéðinsson, formaður þingflokks Samfylkingar, segir Jón Sigurðsson feta í slóð Árna Johnsens og telja stuðninginn við Íraksstríðið tæknileg mistök en ekki ásetningssynd. Ögmundur Jónasson, formaður þingflokks VG, segir yfirlýsingar Jóns skref í rétta átt en taka þurfi málið upp á alþjóðavettvangi til að sjá hver hugur fylgi máli.

Fyrstu tölur úr prófkjöri á Vísi klukkan sex í kvöld

Gríðarlega góð þátttaka var í prófkjöri Sjálfstæðisflokksins í Norðausturkjördæmi í gær. Um 3.300 eru á kjörskrá og greiddu um 3.000 manns atkvæði. Níu gefa kost á sér í prófkjörinu, sex karlar og þrjár konur. Búist er við fyrstu tölum um klukkan sex í dag, sem þá birtast beint á Vísi. Fréttastofan verður að sjálfsögðu fyrir norðan á Hótel KEA í aðalfréttatíma okkar klukkan hálf sjö.

Berlusconi hneig niður í ræðustóli

Silvio Berlusconi, fyrrverandi forsætisráðherra Ítalíu til margra ára, hneig niður í ræðustóli í Toskana á Ítalíu í dag. Ekki er vitað hvað amar að fjölmiðlakónginum og stjórnmálamanninum en hann greip fyrir hjartað. Annar ræðumaður sagði fundarmönnum að Berlusconi hefði hjarnað við baksviðs og viljað halda áfram en læknir hefði bannað það.

Viðræður um varnarsamstarf við Noreg hefjast brátt

Formlegar viðræður um öryggis- og varnarmálasamstarf á milli Íslands og Noregs hefjast í næsta mánuði. Þetta var ákveðið á föstudag á óformlegum fundi forsætisráðherrana Geirs Haarde og Jens Stoltenbergs í Helsinki.

Björn Bjarnason gagnrýnir ummæli Jóns um Írak

Björn Bjarnason dómsmálaráðherra fjallar um ummæli Jóns Sigurðssonar um stuðninginn við innrásina í Írak á heimasíðu sinni og segir meðal annars að ríkisstjórn Íslands eða einstakir ráðherrar innan hennar hafi enga ábyrgð borið á innrásinni í Írak. Afstaða ríkisstjórnar Íslands hefði engu skipt um það, hvort ráðist hefði verið inn í Írak.

Sigurörn fær frelsið aftur eftir hádegi

Örninn Sigurörn fær frelsið aftur um eitt-leytið, þegar bjargvættur hans, hin 12 ára Sigurbjörg Pétursdóttir sleppir honum aftur fyrir ofan barnaskólann í Grundarfirði. Sigurörn hefur braggast vel í Húsdýragarðinum og var þar settur á hann sendir svo hægt verði að fylgjast með ferðum hans. Hann er nýorðinn kynþroska og er því búist við að hann fari fljótlega að leita sér að konu.

Fríblöðin skapa vandamál í Danmörku

Fríblöð flæða um ruslatunnur og stigaganga fjölbýlishúsa í Danmörku. Dönsku neytendasamtökin hafa selt eitt hundrað þúsund límmiða gegn blöðunum. Danska þingið hefur gefið útgefendum blaðanna frest til áramóta til að finna í sameiningu lausn á málinu.

Þyngri dóma í kynferðisbrotamálum krafist

Þöglar mótmælastöður voru við héraðsdóma víða um landið í dag en mótmælendur kröfðust þyngri dóma í kynferðisbrotamálum. Fólkið kom saman klukkan fjögur í dag á Akureyri, Ísafirði, Selfossi, Egilsstöðum og í Reykjavík.

Yfir 200 manns jarðsettir í Írak

Yfir tvö hundruð manns voru bornir til grafar í Írak í dag eftir röð sjálfsmorðs- og bílaárása súnnia í borginni Sadr á fimmtudaginn. Dagurinn var sá mannskæðasti frá upphafi stríðsins. Hundruðir sungu og grétu þegar þeir gengu með kistum ástvina sinna á leið frá borginni Sadr til Najaf. Þrátt fyrir útgöngubann fyrirskipaði forsætisráðherrann lögreglu að gæta öryggis fólksins. Hinir látnu voru bornir til grafar í kirkjugarði í Najaf.

Fjölhæfir jólasveinar

Það þykir öruggt merki um að jólin séu í nánd, þegar ljós jólatrjáa eru tendruð. Í miðborg Chicago í Bandaríkjunum var kveikt á þrjátíu metra háu jólatré við hátíðlega athöfn undir jólasöng og flugeldasýningu. Í New York í dag gengu hins vegar eitt hundrað jólasveinar um götur Manhattan og söfnuðu peningum fyrir fátæka og heimilislausa.

Fuglaflensa ekki í fuglum húsdýragarðsins

Sýni, sem tekin voru úr þeim tugum fugla sem lógað var í fjölskyldu- og húsdýragarðinum fyrr í vikunni, sýna að dýrin voru ekki sýkt af fuglaflensu. Halldór Runólfsson yfirdýralæknir vill þó ekki meina að dýrin hafi verið aflífuð að ástæðulausu. Hann segir þessa aðferð hafa verið ráðlagða af alþjóðadýraheilbrigðismálastofnuninni eftir að mótefni fannst í fjórum fullorðnum landnámshænum í garðinum.

Rúmlega þrjú þúsund tóku þátt í prófkjöri Sjálfstæðisflokksins

Rúmlega þrjú þúsund manns tóku þátt í prófkjöri Sjálfstæðisflokksins í Norðausturkjördæmi sem lauk klukkan 18. Tæplega 3.300 voru á kjörskrá en í utankjörfundaratkvæðagreiðslu greiddu tæplega 500 atkvæði og um tvö þúsund og fimm hundruð manns greiddu atkvæði í dag.

Kæra yfirmenn efnahagsbrotadeildar

Baugsmenn hafa lagt fram kæru á hendur yfirmönnum efnahagsbrotadeildar ríkislögreglustjóra og segja þá vanhæfa í rannsókn á skattamálum þeirra. Þeir neita að svara spurningum lögreglu þar til skorið hefur verið úr um hæfi rannsakenda.

Krefjast úrbóta tafarlaust

Fjölmennur baráttufundur aðstandendafélags aldraðra í dag krefst tafarlausra úrbóta í húsnæðismálum aldraðra. Staða mála er sorgleg og skammarleg fyrir eina ríkustu þjóð í heimi, sögðu fundarmenn.

Reynt að breyta niðurstöðu prófkjörs fyrir fjórum árum

Landssamband Sjálfstæðiskvenna óttast að framboð Árna Johnsen geti dregið úr fylgi flokksins á landsvísu og haft áhrif á gengi kvenna í baráttusætum listanna. Reynt var að breyta niðurstöðu prófkjörs í kjördæminu fyrir fjórum árum að kröfu Kristjáns Pálssonar.

Umferð hleypt á Sæbrautina

Umferð hefur verið hleypt á aftur á alla Sæbrautina. Enn er verið að vinna við frágang meðfram akbrautum og í miðeyju, einkum við gatnamótin Dalbraut-Sundagarðar. Vegagerðin býst ekki við að þeirri vinnu ljúki fyrr en í byrjun desember.

Útgöngubann í Írak fram á mánudag

Útgöngubann í Bagdad í Írak mun vera í gildi fram á mánudag. Írösk stjórnvöld tilkynntu í dag að banninu verði aflétt á mánudagsmorgun. Útgöngubannið var sett á eftir eina mannskæðustu árás í landinu frá innrás Bandaríkjamanna árið 2003. Um tvö hundruð manns týndu lífi í sprengjuárás á fátækrahverfi Sjía í Bagdad á fimmtudaginn.

Yfir tvö hundruð þúsund fuglum slátrað

Slátra á tvö hundruð þrjátíu og sexþúsund alifuglum í Suður-Kóreu eftir að hinn banvæni stofn fuglaflensunnar, H5N1, greindist í fuglum á fuglabúi í landinu.

Um sautjánhundruð hafa kosið í prófkjöri Sjálfstæðisflokksins

Klukkan korter í fjögur höfðu rúmlega sautjánhundruð manns kosið í prófkjöri Sjálfstæðisflokksins í Norðausturkjördæmi. Níu gefa kost á sér í prófkjörinu, sex karlar og þrjár konur en kosið er um sex sæti. Ekki er búist við fyrstu tölum fyrr en annað kvöld.

Átök milli þjófs og starfsmanns

Kom til átaka milli þjófs og starfsmanns, í versluninni Intersport á Bíldshöfða í Reykjavík, á þriðja tímanum. Starfsmaðurinn var fluttur á slysadeild Landspítala-Háskólasjúkrahús með áverka á enni en hann var kýldur í ennið.

Safnað fyrir hreinu vatni fyrir íbúa í Afríku

Jólasöfnun Hjálparstarfs kirkjunnar hefst í dag en í ár er verið að safna fjármunum í vatnsverkefni í Afríku. Á ári hverju deyja 1,8 milljón manna af vatnsskorti og sjúkdómum þeim tengdum. Um 1,1 milljarður manna hefur ekki aðgang að hreinu vatni og veikist oft af menguðu vatni.

Aðbúnaði ábótavant á leikskólum

Aðbúnaði er ábótavant á nánast öllum leikskólum á Norður- og Austurlandi samkvæmt nýrri könnun háskólanema.

Sjálfstæðiskonur óttast áhrif framboðs Árna Johnsen

Stjórn Landssambands sjálfstæðiskvenna hefur farið fram á það við flokksforystuna að hún skoði sérstaklega mál Árna Johnsen og óttast stjórnin að framboð hans í Suðurkjördæmi kunni að draga úr fylgi flokksins á landsvísu.

Baugsmenn kæra yfirmenn efnahagsbrotadeildar

Baugsmenn hafa lagt fram kæru vegna vanhæfni yfirmanna efnahagsbrotadeildar ríkislögreglustjóra í rannsókn á skattamálum þeirra. Þeir ætla ekki að svara spurningum lögreglu um skattrannsóknina fyrr en skorið hefur verið úr um hæfi rannsakenda.

Á fjórða hundrað hafa tekið þátt í prófkjöri

Á hádegi höfðu þrjú hundruð og fimmtíu manns greitt atkvæði í prófkjöri Sjálfstæðisflokksins í Norðausturkjördæmi. Kosið er á 22 stöðum en alls gefa níu einstaklingar kost í prófkjörinu, sex karlar og þrjár konur. Þrír sækjast eftir því að leiða listann.

Banaslys á Fljótsdalsheiði

Maður lést í vinnuslysi á Fljótsdalsheiði í morgun, þar sem verið er að breyta Kröflulínu vegna Kárahnjúkavirkjunar. Slysið bar að með þeim hætti að einangrunarkeðja, sem verið var að hífa upp í eitt mastur línunnar, féll til jarðar og lenti á starfsmanni króatísks fyrirtækis sem þar er að störfum sem verktaki fyrir Landsnet.

Mistök að styðja innrás í Írak

Jón Sigurðsson formaður Framsóknarflokksins segir stuðning við Íraksstríðið hafa verið mistök sem hafi byggst á röngum upplýsingum. Ákvarðanir um öryggismál og alþjóðaverkefni beri ævinlega að taka eftir vandaðasta undirbúning og trúnaðarsamráð við lögmætar stofnanir eins og utanríkismálanefnd alþingis.

Verður var við andstöðu Framsóknarmanna við RÚV frumvarp

Björn Ingi Hrafnsson formaður borgarráðs og fyrrverandi aðstoðarmaður forsætisráðherra segist verða var við mikla andstöðu innan Framsóknarflokksins við hlutafélagavæðingu Ríkisútvarpsins. Hann sagði í þættinum Pólitíkinni á Stöð tvö í dag að hann gæti ekki talað um það sem fram færi á þingflokksfundum en að hann hefði fáa Framsóknarmenn hitt sem vildu að RÚV yrði breytt í hlutafélag.

Flugvél brotlendir á bíl á hraðbraut

Sjö eru slasaðir eftir að einkaflugvél brotlenti á bíl á hraðbraut nálægt borginni Essen í vesturhluta Þýskalands í gær. Vélin var í aðflugi að flugvellinum í Essen-Muelheim þegar slysið varð. Hún klippti í sundur umferðarljós og brú áður en hún brotlenti á bíl á fjölfarinni hraðbraut við flugvöllinn. Bílstjóri flutningabíls náði að slökkva eld sem kviknaði í flaki vélarinnar, en báðir vængirnir brotnuðu af við áreksturinn.

Geislavirk efni á „njósnara“ stöðum í London

Fólk sem heimsótti sama veitingastað og hótel og rússneski njósnarinn sem lést á fimmtudaginn er hvatt til að hafa samband við heilbrigðisyfirvöld í Bretlandi vegna geislavirkra efna sem hafa fundist þar. Efnin fundust á veitingastaðnum Itsu Sushi bar við Piccadilly og Pine bar Millenium hótelsins við Grosvenor torg.

Breska lögreglan finnur leifar af geislavirku efni

Bresk yfirvöld hafa fundið leifar af sama geislavirka efninu og fannst í líkama Alexanders Litvinenko eftir að hann lést á þeim þremur stöðum sem hann dvaldi á daginn sem hann taldi að hefði verið eitrað fyrir honum.

Bílvelta undir Hafnarfjalli

Fólksbíll keyrði útaf undir Hafnarfjalli rétt um sjö leytið í kvöld. Velti ökumaður bílnum og er bíllinn mikið skemmdur en ökumaðurinn var einn á ferð. Hlaut hann áverka á höfði og brjóstkassa og var því fluttur á sjúkrahúsið í Borgarnesi og verður fylgst með honum þar yfir nótt. Lögreglan í Borgarnesi gat ekkert sagt um ástæður útafaksturins að svo stöddu.

Boðið upp á hraðþjónustu á flugvöllum

Einkafyrirtæki í Bandaríkjunum hafa nú séð sér hag í því að setja upp þjónustu sem að flýtir ferð fólks í gegnum flugvelli þar í landi. Vegna ótta við hryðjuverk eru mörg öryggishlið sem fólk þarf að fara í gegnum og hefur það valdið miklum pirringi meðal fólks sem ferðast mikið.