Kirkjukrytur í Reykjanesbæ

Yfirgnæfandi meirihluti kosningabærra manna í Reykjanesbæ hefur óskað eftir því að Sigfús B. Ingvason verði sóknarprestur í Keflavíkursókn. Málið er nú í höndum kirkjumálaráðherra.

Byggingu samgöngumiðstöðvar á Reykjavíkurflugvelli mótmælt

Forsvarsmenn samtakanna Flugkef, sem berjast fyrir því að innanlandsflugið verði flutt til Keflavíkurflugvallar, gagnrýna harðlega fyrirhugaða byggingu samgöngumiðstöðvar á Reykjavíkurflugvelli. Hver á að borga? Spyrja þeir.

Náið samstarf við NATO

Náið samstarf verður haft við Atlantshafsbandalagið um framtíð öryggis- og varnarmála Íslands, þegar Bandaríkjamenn hafi lagt fram útfærslu á því hvernig þeir hyggist halda í heiðri ákvæði varnarsamningsins. Þetta segir Halldór Ásgrímsson, forsætisráðherra, og jafnframt að framkoma Bandaríkjamanna í garð Íslendinga geri það að verkum að samstarf þjóðanna verði aldrei hið sama. Forsætisráðherra er ekki bjartsýnn á framahald samningaviðræðna við Bandaríkjamenn um varnir landsins og útilokar ekki að það komi til uppsagnar varnarsamningsins. Þetta kom fram í erindi sem hann flutti í Háskóla Íslands í dag um framtíðarstefnu Íslendinga í öryggis- og varnarmálum. Jafnframt að hvergi verði hvikað frá því að varnir Íslands séu sýnilegar og öflugar þótt erfitt væri að sjá hvernig það mætti vera án þess að herþotur væru hér. Því hafi Bandaríkjmenn haldið fram og nú væri beðið eftir því að þeir bæru fram frekari útskýringar. Forsætsráðherra segir Bandaríkjamenn þurfa að uppfylla stefnu Atlantshafsbandalagsins um loftvarnir og náið samstarf verði haft við bandalagið og þá sérstaklega framkvæmdastjóra þess, Jaap de Hoop Scheffer, þegar áætlun Bandaríkjamanna liggur fyrir. Enga launung væri á því að framkoma bandarískra stjórnvalda varðandi brottflutning héðan hafi skapað vantraust milli þjóðanna. Í ljósi breyttra aðstæðna sagði forsætisráðherra að þátttaka íslendinga innan Öryggis- og samvinnustofnun Evrópu, Atlantshafsbandalagsins og Sameinuðu þjóðanna yrði efld. Sömu sögu væri að segja um samstarf á vettvangi Schengen, jafnframt því sem þátttaka okkar í friðargæslu, þróunarhjálp og þróunarsamvinnu yrði efld. Utanríkisþjónustan þroskuð og möguleikar til þátttöku í alþjóðasamstarfi. Tækjabúnaðaður Landhelgisgæslunnar yrði stórefldur og einnig Víkingasveit lögreglunnar. Starfið yrði aukið í takt við auknar þjóðartekjur.

Eins er saknað eftir að snjóflóð féll í Hoffellsdal

Eins manns er saknað eftir að snjóflóð féll í Hoffellsdal í nágrenni Fáskrúðsfjarðar fyrir síðdegis í dag. Björgunarsveitir eru á leið á staðinn frá Reyðarfirði, Eskifirði og Neskaupsstað.

Nagladekkin að lenda á bannlista

Þeir sem eru enn á nagladekkjum ættu að huga að því að skipta um dekk hið fyrsta. Frá og með páskadegi er óheimilt að vera á negldum dekkjum á götum Reykjavíkur.

Hugmyndasamkeppni hleypt af stað

Heildar verðlaunafé í hugmyndasamkeppni um framtíðarskipulag Vatnsmýrinnar er jafnvirði rúmra 65 milljóna íslenskra króna. Átta teymi verða valin og fá þau tækifæri til að vinna að ítarlegri útfærslu hugmynda sinna.

Hafísinn þokast nær landi

Hafístunga er aðeins um tuttugu sjómílur norðaustur af Straumnesi. Ísinn þekur ýmis fiskimið úti af Vestfjörðum en lokar ennþá engum siglingaleiðum.

Snjósleðamaður í vanda norður af Gæsafjöllum

Lögreglan á Húsavík hefur verið kölluð til að aðstoða snjósleðamann sem mun hafa orðið fyrir óhappi í dag norðan Mývatns, nánar tiltekið norður af Gæsafjöllum. Lögreglumenn eru á leið á vettvang en ekki liggur fyrir hversu alvarlega maðurinn er slasaður.

Stýrivextir gætu farið í 16 prósent

Stýrivextir Seðlabankans geta farið í allt að sextán prósent að því er fram kemur í viðtali viðskiptavefsins Bloomberg við Davíð Oddsson Seðlabankastjóra. Davíð segist reiðubúinn að hækka stýrivexti verulega ef þess gerist þörf til að halda aftur af verðbólgu.

Miðjan er í bakgarði í Goðalandi

Miðja höfuðborgarsvæðisins er í bakgarði Goðalands 11, það er að segja ef það er reiknað er út frá búsetu í Reykjavík og nágrenni. Í fyrsta skipti í fjögur ár fjarlægist hún Kópavog í stað þess að nálgast hann.

Útilokar ekki að það komi til uppsagnar varnarsamningsins

Halldór Ásgrímsson, forsætisráðherra, útilokar ekki að það komi til uppsagnar varnarsamningsins. Það velti á því hvernig Bandaríkjamenn hyggjast tryggja sýnilegar og öflugar varnir á Íslandi. Þetta kom fram í erindi sem forsætisráðherra flutti í Háskóla Íslands í dag um framtíðarstefnu Íslendinga í öryggis- og varnarmálum.

Aðgerðaleysi ráðherra gagnrýnt

Stjórnarandstæðingar deildu hart á heilbrigðis- og fjármálaráðherra við upphaf þingfundar í dag. Þeir gagnrýndu ráðherrana fyrir aðgerða- og úrræðaleysi þegar kæmi að því að leysa stöðuna á hjúkrunarheimilum og óskuðu eftir því að forsætisráðherra hlutaðist til um málið.

Stefnt að sameiningu Apple-verslana á Norðurlöndum

Öflun ehf., eigandi Apple-verslananna á Íslandi, í Danmörku og Svíþjóð, hefur gert yfirtökutilboð í norska fyrirtækið Office Line en nýverið eignaðist Öflun yfir 89,58% í fyrirtækinu.

ESB stöðvar fjárstuðning til heimastjórnar Palestínumanna

Utanríkisráðherrar Evrópusambandsríkjanna samþykktu í dag formlega að stöðva tímabundið fjárstuðning til heimastjórnar Palestínumanna. Fram kemur í tilkynningu að með því vilji sambandsríkin þrýsta á að stjórnin, undir forystu Hamas-samtakanna, viðurkenni Ísraelsríki, stöðvi ofsamenn í sínum röðum og staðfesti þau friðarsamkomulög sem gerð hafi verið.

Möguleikhúsið við Hlemm frumsýnir nýtt leikrit

Leikritið Systur eftir Þórunni Guðmundsdóttur verður frumsýnt í Möguleikhúsinu næstkomandi miðvikudag. Leikritið fjallar um þrjár systur sem missa móður sína á unga aldri. Þar er skyggnst inn í íslenskan raunveruleika, kaldranalegan og hversdagslegan á yfirborðinu en litskrúðugan þegar betur er að gáð.

Gífurleg flóð í Serbíu

Serbar búa sig undir það að vatnshæð í Dóná verði í dag sú mesta sem mælst hefur í aldarfjórðung. Gríðarlega hefur flætt í landinu síðasta hálfa mánuðinn sökum mikillar úrkomu og asahláku.

Landsframleiðsla eykst um 1,2% vegna Fjarðaáls

Áætlað er að landsframleiðsla aukist um allt að 1,2% þegar starfsemi álvers Alcoa Fjarðaáls verður komin á fullt skrið. Aukningin svarar um 12 milljörðum króna á ári.

Talið að 120 manns hafi drukknað

Talið er að allt að 120 manns hafi látist er bát hvolfdi á vatninu Volta í Ghana í Vestur-Afríku á laugardag. Í það minnsta 150 manns voru um borð og var þrjátíu þeirra bjargað. Báturinn hefur enn ekki fundist en björgunarmenn leita nú að þeim sem kynnu að hafa lifað slysið af.

Stefnir í fjöldauppsagnir

Ófaglærðir starfsmenn dvalar- og hjúkrunarheimila, sem hafa verið í mótmælaaðgerðum undanfarnar tvær vikur, munu funda saman klukkan hálffimm í dag. Búist er við fjöldauppsögnum ófaglærðra starfsmanna í kjölfar fundarins, að sögn Álfheiðar Bjarnadóttur, talsmanns starfsmanna.

Sambandslaust við tilkynningaskyldu

Landhelgisgæslan vill koma því á framfæri að það er sambandslaust við strandstöðvar og tilkynningaskyldu úti fyrir öllu Norðurlandi, frá Horni að Raufarhöfn. Sambandið féll niður í morgun en ekki er víst hvenær samband kemst á aftur.

Stjórn Berlusconis líklega fallin

Kjörstöðum á Ítalíu var lokað fyrir nokkrum mínútum og benda útgönguspár til að ólívubandalag Romano Prodis hafi nauma forystu á hægrifylkingu Silvio Berlusconis forsætisráðherra. Stjórn Berlusconis virðist með öðrum orðum fallin ef marka má þessar spár.

Sjóvá vill endurbyggja Suðurlandsveg

Tryggingafélagið Sjóvá vill endurbyggja Suðurlandsveg með tveimur akreinum í hvora átt, vegriði á milli og lýsingu alla leið. Þór Sigfússon forstjóri Sjóvá segir í viðtali við NFS að í rauninni vilji félagið, ásamt nokkurm fjárfestum flýta þessu nauðsynjaverki og að víða megi finna dæmi þess erlendis að einkaaðilar og ríki taki saman höndum við viðlíka framkvæmdir.

Tekur Varnarliðið fjóra mánuði að pakka niður

Það tekur Varnarliðið fjóra mánuði að pakka niður fyrir brottför hersins í haust. Allar deildir hans vinna nú að áætlunum um hvernig haga á brottförinni. Ekkert liggur fyrir um framtíð íbúðarhúsnæðis og annars húsnæðis í eigu Bandaríkjamanna á flugvellinum.

Allhvöss sunnan átt, allra vestast á landinu í dag

Í dag verður allhvöss sunnan átt allra vestast á landinu en lægir heldur þegar líður á dagnn. Annars staðar verður hægari vindur. Rigning eða skúrir víða um land en þó yfirleitt þurrt allra austast og norðaustast. Hiti 5-8 stig.

Excel Airways kaupir ferðaskrifstofuna Kosmar Holidays

Excel Airways Group, dótturfélag Avion Group hefur fest kaup á bresku ferðaskrifstofunni Kosmar Villa Holidays. Kosmar Holidays er fremsta ferðaskrifstofan í Bretlandi í ferðalögum til Grikklands og byggir á 24 ára reynslu í skipulagningu ferða þangað.

Kosið að nýju í Perú

Allt útlit er fyrir að kjósa þurfi að nýju í Perú þar sem enginn frambjóðendanna í forsetakosningum landsins fékk meirihluta atkvæða. Það er þjóðernissinninn og fyrrum yfirmaður í her Perú, Ollanta Humala, sem leiðir naumlega eftir fyrstu umferð forsetakosninganna.

Chirac dregur atvinnulöggjöfina til baka

Jacques Chirac, Frakklandsforseti, hefur tilkynnt að nýlegar breytingar á atvinnulöggjöf verði dregnar til baka. Breytingarnar hafa valdið miklum mótmælum í Frakklandi á undanförnum vikum, en nú segir forsetinn að lagðar verði fram nýjar áætlanir sem leysa eiga atvinnuvanda ungs fólks.

Roger Hodgson með tónleika á Broadway

Fyrrum söngvari og leiðtogi hljómsveitarinnar Supertramp Roger Hodgson mun halda hljómleika í Broadway föstudaginn 11. ágúst. Á hljómleikunum mun Roger m.a. flytja öll helstu lög Supertramp eins og t.d. Give A Little Bit, The Logical Song, Dreamer, Its Raining Again, Breakfast In America, School og Take The Long Way Home. Hljómsveitin Supertramp hefur selt yfir 50 milljónir platna á ferli sínum.

Vændi ekki stundað í húsi við Ármúla

Rannsóknarlögreglan segir fíkniefnaleit lögreglu í húsi í Ármúla ekki tengjast rannsókn á skipulögðu vændi. DV hefur greint frá því að skipulagt vændi hafi verið stundað í húsinu.

Dagur vill málefni aldraðra til sveitarfélaganna

Dagur B. Eggertsson, borgarstjóraefni Samfylkingarinnar, segir að Samfylkingin muni beita sér fyrir því að málefni aldraðra færist alfarið yfir til sveitarfélaganna.

Kröftug sprenging á sjúkrahúsi í Kína

Í það minnsta 17 fórust og sjö slösuðust þegar kröftug sprenging varð á sjúkrahúsi í Shanxi héraði í norðurhluta Kína í gær. Sprenginin varð í bílageymslu sjúkrahússins og olli skemmdum á nærliggjandi byggingum. 17 lík hafa fundist en björgunarstarf stendur enn yfir og talið er að fleiri lík muni finnast við leit í dag. Ekki er vitað hvað olli sprengingunni.

Alexander Lukashenko í ferðabanni

Alexander Lukashenko forseti Hvíta-Rússlands má ekki ferðast til landa innan Evrópusambandsins samkvæmt banni sem sambandið setti á í dag.

Samskip og Safari Transport sameina krafta sína

Samskip og færeyska flutningsmiðlunin Safari Transport hafa sameinað krafta sína. Skrifað var undir viljayfirlýsingu um kaup Samskipa á 50% hlut í færeyska félaginu í Þórshöfn fyrir helgi.

Slösuðust þegar svalir hrundu

Sex manns slösuðust á Lálandi í Danmörku í morgun þegar svalir sem fólkið stóð á hrundu til jarðar. Fólkið sem var statt á námskeiði hafði brugðið sér út á svalirnar til að reykja þegar óhappið varð. Það var flutt á slysadeild og mun ekkert þeirra vera alvarlega slasað.

Allt að hálf milljón manna mótmæla

Allt að hálf milljón manna hvöttu yfirvöld í mótmælagöngum í nokkrum bandarískum borgum í gær til að viðurkenna þær ellefu milljónir ólöglegra innflytjenda sem búa í landinu sem fullgilda borgara.

Heimsmet í páskaeggjaleit

Rúmlega tíuþúsund manns, aðallega börn, tóku forskot á páskasæluna og tóku þátt í heimsins stærstu páskaeggjaleit í Georgíu í Bandaríkjunum í gær. Rúmlega þrjúhundruð þúsund egg höfðu verið falin í Stone Mountain Park og innihéldu þau flest sælgæti en í rúmlega fjögur þúsundum þeirra voru ýmis verðlaun eins og DVD-diskar og aðgangsmiðar að leikjagörðum. Páskaeggjaleitin í gær sló fyrra heimsmet Rockfords í Illinois en þá voru falin 292.686 egg.

Mikill hafís við Grænland

Þrátt fyrir að hvert hitametið af öðru hafi verið slegilð á Grænlandi í vetur, er svo mikill hafís við suðvestanvert landið að hafís veldur vandræðum við strandsiglingar. Sum héruð eru nánast einangruð vegna þessa þar sem lítið er um samgöngur á landi. Vefurinn Skip.is greinir frá því að þetta sé mesti hafís sem sést hefur á svæðinu síðan árið 1999 og að svæðið verði líklega ekki orðið íslaust fyrr en í júlí.

Mótmæla valdatöku Gyanendra

Mótmæli gegn konungi Nepals, Gyanendra standa enn yfir. Yfir helgina skutu hermenn tvo mótmælendur til bana en konungur landsins lagði á útgöngubann í höfuðborginni Katmandu og skipaði hermönnum sínum að skjóta alla sem ekki virtu bannið. Þúsundir hafa mótmælt ólýðræðislegri valdatöku Gyanendra fyrir 14 mánuðum.

Mikil aukning á fíkniefnamálum

Lögreglan á Ísafirði hefur lagt hald á mun meira magn af fíkniefnum fyrstu þrjá mánuði ársins en undanfarin ár að því er fram kemur á vef Bæjarins besta. Það sem af er árinu hefur lögreglan á Ísafirði átta sinnum haft afskipti af mönnum grunuðum um fíkniefnamisferli og lagt hald á rúm 265 grömm af hassi og tæp 30 grömm af amfetamíni. Þetta er töluvert meira magn en áður þekkist fyrir vestan því undanfarin ár hefur lögreglan gerð upptæk um 140 grömm af ólöglegum efnum að meðaltali á ári hverju.

Átti sex börn með föður sínum

Karlmaður í Þýskalandi á nú yfir höfði sér 15 ára fangelsi fyrir að misnota dóttur sína kynferðislega í rúm þrjátíu. Maðurinn býr ásamt fjölskyldu sinni á bóndabæ og lengst af héldu nágrannarnir að þar færi venjuleg fjölskylda en á heimilinu bjuggu tólf börn. Nú hefur elsta dóttir bóndans komið fram og sagt föður sinn hafa misnotað sig frá níu ára aldri og að saman eigi þau sex börn.

Jafnaðarmenn halda líklega völdum

Jafnaðarmenn í Ungverjalandi virðist ætla að halda völdum í landinu en fyrri hluti kosninganna fór fram í gær, þær fyrstu eftir að Ungverjaland gekk í Evrópusambandið. Seinni hluti þingkosninganna fer fram þann 23. apríl næstkomandi. Gangi útgönguspárnar eftir verður þetta í fyrsta skipti sem ríkisstjórnarflokkar halda meirihluta í kosningum í Ungverjalandi frá árinu 1989.

Áfengissýki vaxandi vandamál hjá flugfélögum

Sífellt fleiri flugmenn og flugþjónar og flugfreyjur í Danmörku eru svipt atvinnuleyfi vegna áfengissýki. Samkvæmt dagblaðinu Extra bladet þar í landi hefur vandinn farið stöðugt vaxandi en á meðan sjö manns voru á ári hverju að meðaltali sviptir starfsréttindum sínum vegna vandans á árunum 1992 til 2001, er talan nú 20 til 30 manns. Reynist áhafnarmeðlimur eiga við áfengisvanda að stríða er honum gert að fara í meðferð, vilji hann halda áfram störfum.

Hvöttu yfirvöld til að viðurkenna innflytjendur

Allt að hálf milljón manna hvöttu yfirvöld, í mótmælagöngum í nokkrum bandarískum borgum í gær, til að viðurkenna þær ellefu milljónir ólöglegra innflytjenda sem búa í landinu, sem fullgilda borgara. Talið er að fleiri göngur verði farnar í dag í enn fleiri borgum landsins. Mótmælin hafa hingað til farið friðsamlega fram en málið er mjög umdeilt. Talið er þó að yfirvöld muni láta af kröfum innflytjenda að lokum.

Mun líklega velta Berlusconi úr sessi

Þingkosningar halda áfram á ítalíu í dag en kjörstöðum verður lokað klukkan eitt eftir hádegi að íslenskum tíma. Talið er að kosningabandalag Romanos Prodis, forsætisráðherraefnis vinstri flokkanna, muni sigra Berslusconi, forsætisráðherra Ítalíu. Reynist það rétt bíður hans erfitt verkefni. Á vinstri væng þyrfti hann að mynda bandalag sem samanstendur af mörgum fylkingum, allt frá hörðum kommúnistum til hófsamra kaþólskra miðjumanna.

Slagsmál víða um land um helgina

Töluvert bar á ofbeldi og slagsmálum víða um land um helgina. Tveir voru fluttir undir læknishendur eftir blóðug slagsmál í Skíðaskálanum í Hveradölum og þrír vistaðir í fangageymslum eftir slagsmál þar. Tveir menn ruddust inn til þess þriðja í Reykjanesbæ og höfðu í hótunum við hann með eggvopnum. Maðurinn slapp með skrekkinn en árásarmennirnir voru handteknir. Þá brutust tvisvar út hópslagsmál á Ísafirði og voru tveir menn handteknir vegna þeirra.