Greiði SÍF 1,5 milljón

Vélsmiðja Orms og Víglundar í Hafnarfirði var í dag dæmd til að greiða SÍF alls rúmlega 1,5 milljón króna í bætur vegna málningarúða sem í tvígang barst frá vélsmiðjunni og lagðist yfir bifreiðar SÍF og starfsmanna fyrirtækisins.

Eimskip annast millilandaflutninga

Eimskip hefur tekið að sér að annast alla millilandaflutninga fyrir Samherja og var gengið frá samningi þess efnis í dag. Samherji er með starfsemi víða erlendis og rekur meðal annars útgerð í Þýskalandi, Bretlandi, Færeyjum og Póllandi.

Forsetinn á Talstöðinni

Ólafur Ragnar Grímsson, forseti Íslands, var í gær gestur Sigurðar G. Tómassonar í morgunþættinum Góðan dag á Talstöðinni, nýrri útvarpsstöð í eigu 365 - ljósvakamiðla. Ólafur Ragnar sagði frá nýlegri Indlandsför sinni en hann flutti meðal annars setningarræðu á alþjóðlegri ráðstefnu um loftslagsbreytingar og sjálfbæra þróun.

Leigubílstjóri í 50 ár

Eftir rúmar tvær vikur er hálf öld liðin síðan Svanur Halldórsson bílstjóri á Hreyfli hóf leigubílaakstur. Tvítugur settist hann undir stýri og hefur svo að segja verið þar síðan. Fyrir tólf árum keypti hann sér stóran bíl sem farþegar óttuðust. Þeir héldu að startgjaldið væri hærra. </font /></b />

Hornfirsk hljómsveit í útlöndum

Sá einstæði atburður varð um helgina að Hornfirsk hljómsveit lék í útlöndum. Samkvæmt vefsíðunni horn.is er þetta í fyrsta sinn sem hljómsveit starfandi á Hornafirði er fengin til að spila erlendis.

Nýnasistar vanvirða minninguna

Yfirvöld í Þýskalandi áforma að setja enn frekari hömlur á samkomur og hægri öfgahópa í landinu en nú er. Tilefnið er að nýnasistar undirbúa nú fjöldasamkomu í næsta nágrenni við minnisvarða um helförina.

4 mánuðir fyrir stuld á DVD-diskum

Þrítugur maður var í dag dæmdur í fjögurra mánaða fangelsi fyrir að hafa stolið þremur DVD-diskasöfnum í verslun Hagkaupa. Maðurinn á að baki mikinn sakaferil því frá árinu 1992 hefur hann alls þrettán sinnum verið dæmdur til refsingar.

Starfsemi neyðarlínunnar í beinni

Starfsemi neyðarlínunnar fer alla jafna fram fyrir luktum dyrum en nú bregður svo við að allir geta fylgst með því hvað er að gerast þarna innandyra í gegnum tölvuna sína í beinni vefútsendingu (siminn.is/112). Þess verður þó vel gætt að trúnaðarupplýsingar birtist ekki í útsendingunni.

N-Kórea krafðist viðræðna

Norður-Kórea krafðist í dag tvíhliða viðræðna við Bandaríkin um kjarnorkuáætlun sína. Kóreumenn tilkynntu í gær að þeir hefðu þegar smíðað kjarnorkusprengjur sem væru tilbúnar til notkunar.

Sesar Arnar í tvær aðgerðir

Sesar Arnar Sanchez, íslenski hermaðurinn sem særðist í Írak fyrr í vikunni, mun að líkindum þurfa að gangast undir tvær aðgerðir á næstunni. Móðir hans segir líkur á að hann verði skorinn upp á auga og fæti.

Nýr vefur slær í gegn

Níu hundruð manns skoðuðu auglýsingar um lóðir á vef Hafnarfjarðar á fimmtudag. Alls skoðuðu 1.400 manns vefinn þann dag. Nýtt útlit prýðir vefinn og er hann drifinn af ecWeb-umsjónarkerfinu.

Sjötíu konur tilbúnar í stjórnir

Um sextíu konur í stjórnunar- og áhrifastöðum á Suðurnesjum bjóða sig fram í stjórnir lífeyrissjóða. Þær krefjast þess að konum verði fjölgað í stjórnum þeirra í samræmi við fjölda kvenna í viðkomandi sjóðum.

Nýfæddu barni fleygt út úr bíl

Nýfæddu barni var fleygt út úr bíl í Flórída í gærdag. Naflastrengurinn var enn á barninu og það var löðrandi í legvatni.

Háskólalistinn í oddastöðu

Háskólalistinn komst í oddastöðu í stúdentaráði Háskóla Íslands í kosningum á fimmtudag. Vaka, sem fyrir kosningarnar var með meirihluta í stúdentaráði, tapaði einum manni og fékk fjóra kjörna.

25 hús verði rifin

Reykjavíkurborg hefur heimilað að 25 hús við Laugaveg, byggð fyrir 1918, verði rifin. Þetta kemur fram í svari skipulags- og byggingarsviðs við fyrirspurn Ólafs F. Magnússonar, borgarfulltrúa Frjálslynda flokksins. Þar af hefur eitt hús, byggt árið 1892, þegar verið rifið. Húsin sem heimilt er að rífa eru á svæðinu frá Laugavegi 4 að Laugavegi 73.

Ráðherra líti sér nær

Fjármálaráðherra segir vínbirgja ekki láta lækkandi gengi skila sér í vöruverð. Heildsalar vísa gagnrýninni á bug og segja fáar vörur greiddar í dollurum. Vegna skattastefnu ráðherrans sé innkaupsverð lítill hluti af verði vínflösku.</font /></b />

Játaði fimm vopnuð rán

35 ára gamall maður hefur játað að hafa framið fimm vopnuð rán í Reykjavík á fjórum dögum. Hann var nú síðdegis úrskurðaður í vikulangt gæsluvarðhald. 

Palestínumenn hætti árásum

Forseti Palestínumanna krafðist þess í dag að herskáar hreyfingar Palestínumanna hættu strax öllum árásum á Ísraela. Forsetinn hefur rekið níu foringja úr öryggissveitum sínum.

Seint fyrnast fornar ástir

Karl Bretaprins hefur tilkynnt að hann ætli að kvænast unnustu sinni til margra ára, Camillu Parker Bowles, en hún verður þó aldrei drottning heldur mun hún fá titilinn eiginkona konungs. Almenningur virðist ánægður með ákvörðunina en stór hluti bresku þjóðarinnar er þó tregur til að fyrirgefa meðferðina á lafði Díönu. Því sigla skötuhjúin milli skers og báru með ráðahagnum.

Tvöfalt hærri fasteignaskattar

Íbúar í Reykjavík borga ríflega tvöfalt meira í fasteignaskatt nú en þeir gerðu þegar R-listinn tók við fyrir ellefu árum að sögn Guðlaugs Þórs Þórðarsonar, borgarfulltrúa Sjálfstæðisflokksins. Hann segir að eftir að hafa skoðað ársreikninga borgarinnar síðastliðin tólf ár hafi þessi sláandi tala komið í ljós.

Handtekinn vegna Bengtsson ránsins

Maður á fimmtugsaldri hefur verið handtekinn, grunaður um að eiga þátt í ráninu á Fabian Bengtsson. Annar maður sem handtekinn var í Austurríki grunaður um aðild að ráninu átti ekki þátt í því, að sögn austurrísku lögreglunnar, en reyndi að hafa peninga af fjölskyldu Bengtssons með því að látast vera einn mannræningjanna.

Óánægð með störf Bush

Meira en helmingur Bandaríkjamanna er ósáttur við frammistöðu George W. Bush í embætti Bandaríkjaforseta samkvæmt nýrri skoðanakönnun AP-fréttastofunnar. Mest er óánægjan hjá fólki sem komið er yfir fimmtugt.

Fresta leyfisveitingu vínbúðar

Bæjarstjórn Hveragerðis frestaði á síðasta fundi sínum að taka afstöðu til beiðni Áfengis- og tóbaksverslunar ríkisins um að reka vínbúð að Breiðumörk 1. Í bókun meirihluta bæjarstjórnar segir að afla verði frekari upplýsinga frá ÁTVR um rekstur vínbúðarinnar áður en hægt sé að veita leyfið og var bæjarstjóra falið að afla þeirra upplýsinga.

Rumsfeld hvetur Íraka

Donald Rumsfeld, varnarmálaráðherra Bandaríkjanna heimsótti í dag þjálfunarbúðir írakskra öryggissveita. Í ávarpi sem hann flutti við komuna sagði hann að Írakar yrðu sjálfir að taka við öryggismálum sínum eins fljótt og auðið yrði.

Nýbura kastað út úr bíl

Ungt barn liggur illa haldið á sjúkrahúsi í Norður-Lauderdale í Flórída eftir að hafa verið kastað út úr bíl. Læknar telja að barnið hafi aðeins verið klukkutíma gamalt þegar því var kastað úr bílnum og var fæðingarstrengurinn enn á sínum stað þegar barnið fannst.

Skipulagði hópsjálfsmorð

Maður á þrítugsaldri var handtekinn eftir að upp komst að hann hafði skipulagt hópsjálfsmorð sem átti að eiga sér stað heima hjá honum á Valentínusardag, 14. febrúar

92 kærðir í mútumáli

Sænskir saksóknarar hafa ákært 92 einstaklinga í hneykslismáli sem hefur umleikið áfengisverslun sænska ríkisins, Systembolaget. 77 starfsmenn Systembolaget hafa verið ákærðir fyrir að þiggja mútur og fimmtán starfsmenn þriggja birgja hafa verið ákærðir fyrir að greiða eða bjóða mútur.</font />

Bretar vilja að Karl giftist

Nær tveir af hverjum þremur Bretum eru sáttir við ákvörðun Karls prins um að kvænast Camillu Parker Bowles en vel innan við helmingur vill að hann verði næsti konungur Bretlands.

Skjálftavefsjá fyrir almenning

Veðurstofan hefur opnað nýjan og endurbættan vef um jarðskjálfta og eldgos. Sigríður Anna Þórðardóttir umhverfisráðherra ræsti vefinn í dag en hann kallast „Skjálftavefsjá“. Með honum hyggst Veðurstofan auka enn möguleika almennings til að fylgjast með umbrotum í jarðskorpunni undir Íslandi og hafdjúpunum í kringum landið.

Afríku skortir ungt áræði

Vandamál afrískra ungmenna eru að þau hafa ekki atvinnu, eiga engar eignir og kjósa í flestum tilfellum ekki. Þeir sem vilja breytingar eiga erfitt uppdráttar og ekki heiglum hent að setja sig upp á móti stjórnvöldum. </font /></b />

Ráðherra varar fólk við

Helmingur af verðbólgu síðustu tólf mánaða er vegna hækkana á fasteignaverði. Fjármálaráðherra segir þessar hækkanir komnar til vegna breyttra aðstæðna á lánamarkaði og biður fólk að fara varlega í skuldsetningu þar sem óljóst er hvert stefnir.

Í framboð úr fangelsi

Borgarstjórinn í Mexíkóborg hótaði því að fara í forsetaframboð úr fangelsisklefa ef hann yrði dreginn fyrir dómstól og dæmdur í fangelsi.

Stærsti vandi íslensks réttarfars

Það fer eftir því hvernig Hæstiréttur er mannaður hvort dómurinn geti endurmetið sönnunargildi munnlegs framburðar úr héraðsdómi. Eiríkur Tómasson lagaprófessor segir að um sé að ræða stærsta vanda sem við er að etja í íslensku réttarfari.

12 ára gamalt námskeið lífsbjörg

Tólf ára gamalt skyndihjálparnámskeið varð manni í hjartastoppi til lífs. Maðurinn, sem sýndi rétt viðbrögð á neyðarstundu með hetjulegri framgöngu, var valinn skyndihjálparmaður ársins í dag. 

Deilt um úlfaveiðar í Noregi

Harðar deilur eru um það í Noregi hvort eigi að leyfa að skjóta úlfa. Borgarbúar vilja banna það en fólk til sveita segir að borgarbúarnir hafi ekkert vit á málinu.

Rannsókn á bruna hefst í dag

Rannsókn hefst í birtingu á því hvað olli sprengingu í mjölþurrkara í fiskimjölsverksmiðju Samherja í Grindavík í gær sem olli stórtjóni á allri verksmiðjunni. Slökkviliðsmenn voru á vettvangi fram undir miðnætti og lögregla vaktaði svæðið í nótt. Ljóst er að engin loðna verður brædd í verksmiðjunni á þessari vertíð en fram undan voru miklar annir þar sem loðnan er farin að ganga vestur með suðurströndinni og því hentugt að landa í Grindavík.

Stunginn á útsölu IKEA í Lundúnum

Einn maður var stunginn og fimm fluttir á sjúkrahús eftir mikla ringulreið á opnunarútsölu IKEA í Lundúnum í gærkvöldi. Þúsundir manna voru mættar fyrir utan búðina laust fyrir miðnætti þegar opnað var. Auk fyrrgreindra afleiðinga hlutu tuttugu og tveir minni háttar meiðsli í kjölfar stympinga á opnunarútsölunni.

Þriðji söluturninn rændur

Þriðja sjoppuránið í þessari viku var framið þegar maður vopnaður barefli rændi söluturn við Langholtsveg um níuleytið í gærkvöldi. Hin voru framin í Mjódd og í Grafarholti. Ræninginn í gærkvöldi var með sólgleraugu líkt og ræninginn í Mjódd í fyrrakvöld og grunar lögregluna allt eins að sami maður hafi verið að verki á öllum stöðunum.

Trylltist við afskipti lögreglu

Ölvaður ökumaður trylltist þegar lögreglan á Akureyri ætlaði að stöðva hann í Gilinu á Akureyri í gær. Hann gaf í og ók utan í lögreglubílinn en lögreglunni tókst að króa hann af. Þá læsti hann bílnum og neitaði að koma út. Lögreglumenn brutu þá rúðu til að ná manninum en þá réðst hann á lögreglumennina sem náðu að yfirbuga hann og flytja í járnum á lögreglustöðina þar sem hann var látinn sofa úr sér.

Bjartsýni lykill að langlífi

Leiðin að langlífi er að líta lífið björtum augum og elska náunga sinn. Þetta er samdóma álit hóps Kúbumanna yfir hundrað ára sem kom saman í gær. Læknar, næringarfræðingar og fleiri sérfræðingar áttu fund með hópnum í gær til þess að reyna að komast að því hver væri lykillinn að langlífi. Sumir sögðust þakka vinnusemi langlífið og aðrir miklu grænmetisáti.

Ótti vegna skjálfta í Aceh-héraði

Mikil skelfing greip um sig meðal íbúa á Aceh-héraði á Indónesíu í gær þegar jarðskjálfti upp á 6,2 á Richter skók svæðið. Fólk hljóp upp á hæðir og lögreglumenn og hermenn kölluðu í gegnum gjallarhorn og vöruðu fólk við flóðbylgjum. Ekki hafa borist neinar fregnir af mannfalli eða tjóni á byggingum í kjölfar skjálftans.

Dettifoss kominn til Rotterdam

Þýski dráttarbáturinn Primus kom með flutningaskipið Dettifoss í togi til Rotterdam undir kvöld í gær þar sem Dettifoss verður tekinn í þurrkví til viðgerðar. Tvö varðskip drógu Dettifoss inn til Eskifjarðar fyrir tæpum hálfum mánuði eftir að stýrið brotnaði af skipinu í slæmu veðri suðaustur af landinu.

Ók út af í hálku á Reykjanesbraut

Ökumaður rútu, sem var einn á ferð, slapp ómeiddur þegar bíllinn rann út af Reykjanesbraut skammt frá Vogaafleggjara í gærkvöldi. Á leiðinni út af braut bíllinn meðal annars umferðarmerki, en hálka var á vettvangi. Önnur rúta var notuð til að draga ökutækið aftur upp á veginn og var bíllinn ökufær eftir óhappið.

Norður-Kóreumenn eiga kjarnavopn

Stjórnvöld í Norður-Kóreu lýstu því yfir í morgun að þau hafi látið smíða kjarnorkuvopn til þess að verjast yfirgangi Bandaríkjamanna og tilraunum þeirra til að einangra landið. Jafnframt hafa stjórnvöld í Norður-Kóreu hætt þátttöku í viðræðum sex þjóða sem miðuðu að því að takmarka framþróun kjarnorkumála í landinu þannig að þar yrðu ekki smíðuð kjarnorkuvopn.

Fundi frestað vegna árása

Fundi Palestínumanna og Ísraela um öryggismál var frestað fyrir stundu eftir að liðsmenn Hamas-samtakanna létu vörpusprengjum rigna yfir landnemabyggðir gyðinga á Gaza-svæðinu í morgun. Háttsettur palestínskur embættismaður sagði að Ísraelar hefðu beðið um að fundinum yrði frestað. Ekki hefur verið ákveðið hvenær hann verður haldinn.