Nýfæddu barni fleygt út úr bíl

Nýfæddu barni var fleygt út úr bíl í Flórída í gærdag. Naflastrengurinn var enn á barninu og það var löðrandi í legvatni. Barnið er drengur og læknar telja að hann hafi verið innan við klukkustundar gamall þegar honum var kastað út úr bílnum á mikilli umferðargötu skammt frá Fort Lauderdale í Flórída. Kona sem bjargaði drengnum segir að hún hafi séð mann og konu rífast inni í bílnum, áður en hurðin farþegamegin opnaðist og honum var fleygt út. Drengurinn lenti á grasbletti um tvo metra frá bílnum, sem ók á brott á mikilli ferð. Drengurinn var hið bráðasta fluttur á sjúkrahús þar sem hann var tekinn til rannsóknar. Ekki hafa fundist neinir alvarlegir áverkar og vona læknar að hann nái sér að fullu. Foreldranna er nú leitað.