Ráðherra varar fólk við

Helmingur af verðbólgu síðustu tólf mánaða er vegna hækkana á fasteignaverði. Fjármálaráðherra segir þessar hækkanir komnar til vegna breyttra aðstæðna á lánamarkaði og biður fólk að fara varlega í skuldsetningu þar sem óljóst er hvert stefnir. Verðbólgan er komin yfir fjögur og hálft prósent, eða efri þolmörk Seðlabankans. Menn hafa að vonum áhyggjur af þessu en fari hún ekki að hjaðna eru kjarasamningar í uppnámi, svo ekki sé talað um annað. Sprengjan á fasteignamarkaði á þarna mikla sök. Geir H. Haarde fjármálaráðherra segir nauðsynlegt að brýna fyrir fólki að fara varlega í fasteignaviðskiptum; vera ekki að steypa sér í mjög miklar skuldir því ekki sé víst hver þróunin verður í framtíðinni. Fólk gæti endað með að tapa miklu fé. Það er hins vegar ekki bara hægt að kenna háu fasteignaverði um verðbólguna. Margir telja að verð á innfluttum vörum ætti að vera mun lægra hér á landi um þessar mundir þegar krónan stendur sterk gagnvart öðrum gjaldmiðlum. Fjármálaráðherra segist hafa grun um að neytendur séu ekki að njóta sterkrar krónu sem skyldi og nefnir sem dæmi könnun á vöruverði hjá ÁTVR - ríkisreknu áfengis og tóbaksversluninni - og hvetur hann alla heildsala sem eiga í viðskiptum við ríkið til að standa sig betur. Geir vill ekkert segja til um hvort verið geti að kaupmenn beri ekki það traust til krónunnar að hún muni haldast áfram sterk. Þó geti alveg verið að menn eygi þarna möguleika á að ná sér í tiltölulega auðtekinn hagnað. Hann hvetur neytendur til að standa vaktina því um hagsmuni almennings sé að ræða.