Tímamótakosningar í Úkraínu?

Íbúar í Úkraínu ganga að kjörborði í dag til að kjósa sér nýjan forseta. Óttast er að til uppþota geti komið í landinu. Margir ganga svo langt að segja að valið standi á milli þess hvort Úkraína muni í framtíðinni fylgja Rússum eða Vestur-Evrópu að málum.

Svíar líða fyrir Tsjernóbyl-slysið

Talið er að ríflega áttahundruð manns í norðurhluta Svíþjóðar hafi fengið krabbamein í kjölfar kjarnorkuslyssins í Tsjernóbyl árið 1986. Þetta er niðurstaða nýrrar rannsóknar um afleiðingar slyssins. Geislavirk ský fóru yfir norðurhluta Evrópu í kjölfar slyssins og merkjanleg aukning varð á krabbameinstilfellum.

Kuldamet slegin víða

Kuldamet voru slegin víða á Norðausturlandi í nótt. Mestur var kuldinn við Mývatn þar sem frostið mældist 30 gráður klukkan sex í morgun. Frostið fór niður í 27 gráður í Möðrudal á Fjöllum og 24 gráður á Grímsstöðum. Samkvæmt upplýsingum frá Veðurstofu hefur slíkur kuldi ekki áður mælst í nóvembermánuði á þessum slóðum.

Sveitarfélögin færri en hundrað

Sameining fjögurra sveitarfélaga í Austur-Húnavatnssýslu var samþykkt í gær og sömuleiðis sameining fjögurra sveitarfélaga sunnan Skarðsheiðar. Sveitarfélög í landinu eru þar með orðin færri en hundrað.

Dönum fjölgar í Afganistan

Fjöldi danskra hermanna í Afganistan mun þrefaldast á næsta ári samkvæmt því sem kemur fram í <em>Politiken</em> í dag. Hermennirnir eiga að sinna mannúðarstörfum og að taka þátt í þjálfun nýs hers Afganistans. Formaður samtakanna „Læknar án landamæra“ hefur áhyggjur af því að hermenn sinni einnig mannúðarstörfum.

Fótbrotnaði illa í handbolta

Harðdrægur markmaður Vals í fimmta flokki í handbolta og sókndjarfur Stjörnumaður skullu harkalega saman á lokamínútu leiks í gærkvöld með þeim afleiðingum að hinn þrettán ára gamli markvörður fótbrotnaði illa rétt fyrir ofan ökla. Stjörnumaðurinn tognaði á hné.

Sneri aftur í veisluna með byssu

Danska lögreglan telur að tæplega fimmtugur karlmaður frá fyrrverandi Júgóslavíu hafi drepið samlanda sinn með því að skjóta hann nokkrum skotum í samkomuhúsi á Kaupmannahafnarsvæðinu í gærmorgun. Maðurinn neitar sök en hann gaf sig fram við lögreglu síðdegis í gær.

Fagna tillögu viðskiptaráðherra

Ungir jafnaðarmenn fagna tillögu viðskiptaráðherra að Ríkisendurskoðun fari yfir fjármál stjórnmálaflokkanna og vilja einnig að sett verði skýr lög um fjárreiður þeirra. Þetta kemur fram í tilkynningu frá hreyfingunni sem send var fjölmiðlum í dag.

Sjö manns sagt upp á Vogi

Sjö starfsmönnum sjúkrahússins Vogs, sem er þungamiðja starfsemi SÁÁ, verður sagt upp og dregið saman í þjónustu við áfengis- og vímuefnasjúklinga. Ráðgjafavakt og sú bráðaþjónusta sem veitt hefur verið við göngudeild meðferðarstofnunarinnar verður lögð af. Innlögnum verður fækkað úr 2350 í 2100, eða um 10%, en við það mun svigrúm til bráða- og flýtiinnlagna minnka verulega.

Af lista hinna vígfúsu ríkja

Flokksráðsfundur Vinstri - grænna í Reykjavík um helgina ítrekar kröfu sína um að ríkisstjórnin falli frá stuðningi við stríðsreksturinn í Írak og að Ísland verði tekið af lista hinna vígfúsu ríkja, eins og það er nefnt í ályktuninni. Þá lýsir fundurinn vanþóknun á lagasetningu ríkisstjórnarinnar gegn fullkomlega lögmætu verkfalli grunnskólakennara.

80% skuldanna felld niður

Rússar hafa samþykkt að fella niður 80 prósent skulda Íraka sem hljóða upp á um það bil 125 milljarða dollara. Þetta er haft eftir bandarískum embættismanni en Bandaríkjamenn leggja mikla áherslu á að skuldirnar verði felldar niður.

Fleiri lík finnast

Lík þriggja manna sem skotnir höfðu verið í höfuðið fundust á götum Mósúl í Írak í dag. Líklegt er talið að mennirnir séu úr þjóðvarðaliði Íraka en það hefur ekki verið staðfest. Í gær fundust lík níu írakskra þjóðvarðliða á víðavangi í borginni sem einnig höfðu verið drepnir með skoti í höfuðið.

Frænda Allawis sleppt?

Mannræningjarnir sem rændu frænda Iyads Allawis, forsætisráðherra Íraks, létu hann lausan í dag að sögn arabískrar sjónvarpsstöðvar. Talsmaður íröksku ríkisstjórnarinnar sagðist ekki geta staðfest fréttirnar í samtali við Reuters-fréttastofuna. Frænda forsætisráðherrans var rænt fyrr í mánuðinum.

Bílvelta á Reykjanesbraut

Bíll valt á Reykjanesbraut skammt frá Álverinu í Straumsvík rétt fyrir klukkan 11 í morgun. Einn var í bílnum og var hann fluttur á slysadeild en ekki var vitað hversu alvarleg meiðslin eru. Nota þurfti klippur til að ná manninum út úr bílnum. Víkurfréttir greina frá.

Fjögur morð á sólarhring í Napólí

Fjórir menn hafa verið drepnir undafarinn sólarhring í borginni Napólí á Ítalíu. Lögreglan segir morðin að öllum líkindum tengjast innbyrðis átökum í mafíunni þar í borg.

Boðað til kosninga í Írak

Boðað hefur verið til þingkosninga í Írak þrítugasta janúar á næsta ári þrátt fyrir það upplausnarástand sem ríkir í landinu. Dagsetningin fyrir kosningarnar var kunngerð í dag en fyrirfram höfðu margir haft uppi varnaðarorð og efast um að kosningar geti verið óhlutdrægar við núverandi kringumstæður.

Eitt kennileita Belfast sprengt

Það mannvirki í Belfastborg á Norður-Írlandi, sem mest hefur borið á, var jafnað við jörðu í dag. Churchill-húsið hefur staðið í miðborg Belfast í fjörutíu ár en yfirvöld ákváðu að landsvæðið væri svo verðmætt að það borgaði sig að sprengja húsið í morgun til að rýma fyrir nýjum byggingum.

Frír póstur fyrir lófatölvusíma

Tæknifyrirtækið Hot Mobile Mail, sem er starfrækt í Bolungarvík, býður viðskiptavinum sínum ókeypis aðgang að þráðlausum tölvupósti fyrir lófatölvusíma. Tekjur fyrirtækisins koma frá auglýsendum sem auglýsa í póstkerfi þess. Kerfið gagnast hvort tveggja viðskiptavinum OgVodafone og Símans, að því gefnu að þeir séu eigendur lófatölvusíma.

Yushchenko líklega sigurvegari

Útgönguspár í forsetakosningunum í Úkraínu, sem voru birtar rétt í þessu, benda til þess að Viktor Yushchenko beri sigur úr býtum. Yushchenko boðar breytta tíma í Úkraínu og náin tengsl við Vesturlönd. Stuðningsmenn hans eru að safnast saman í miðborg Kíev því þeir óttast að sigurinn verði hafður af þeim með kosningasvindli.

Ótrúleg skammsýni stjórnvalda

Það er ótrúleg skammsýni að byggja hagvöxt á því að menga meira, segir náttúrufræðingurinn Hjörleifur Guttormsson. Forsætisráðherra sagði í gær að fyrirhugaðar skattalækkanir byggðust að hluta á Kyoto-bókuninni sem gerði Íslendingum kleift að losa meiri mengun út í andrúmsloftið.

Umferðarslys við Hvalfjarðargöng

Hvalfjarðargöngin eru lokuð vegna umferðarslyss sem þar varð upp úr klukkan hálf sjö í kvöld. Svo virðist sem ökumaður hafi misst stjórn á bifreið sinni og ekið utan í vegg ganganna. Mikið lið lögreglu og sjúkraliða eru á vettvangi en samkvæmt fyrstu upplýsingum frá lögreglu urðu ekki alvarleg slys á fólki.

Vilja opið bókhald flokkanna

Ungir jafnaðarmenn fagna tillögu viðskiptaráðherra um að Ríkisendurskoðun fari yfir fjármál stjórnmálaflokkanna.

Matvælarannsóknir

Háskólinn á Akureyri og Rannsóknastofnun fiskiðnaðarins munu halda sameiginlegan fund um matvælarannsóknir á Norðurlandi þriðjudaginn 23. nóvember.

Bráðaþjónusta verður lögð af

Vegna mikils hallareksturs á Vogi verður gripið til aðgerða sem spara sjúkrastofnuninni 45 milljónir á ári. Sjö starfsmönnum sagt upp. Innlögnum fækkað. Sjúklingar yngri en 16 ára ekki innritaðir.

Lúpínan og rjúpan

"Ég held að það sé ekkert hægt að gera til að útrýma lúpínunni - hún er komin til að vera," segir Sigmar B. Hauksson, formaður Skotveiðifélags Íslands.

Hryðjuverkin í Madrid

Eduardo Zaplana, fyrrverandi talsmaður ríkisstjórnar Spánar, heldur því fram að hryðjuverkárásunum í Madríd þann 11. mars á þessu ári hafi verið stýrt af erlendum aðila í von um að koma forsætisráðherranum, Jose Maria Aznar, frá völdum.

Ghazi Allawi sleppt úr gíslingu

Ghazi Allawi, frændi Iyads Allawi, forsætisráðherra Íraks, var látinn laus á sunnudag í Bagdad en hann var tekinn í gíslingu þann 10. nóvember.

Þjónustan á Vogi minnkuð

Sjö stöðugildi verða lögð niður á Vogi og þjónustu við áfengis- og vímuefnasjúklinga skert í sparnaðarskyni. SÁÁ hefur spennt bogann of hátt miðað við tekjur. Áfram verður staðið við þjónustusamning sem í gildi er milli heilbrigðisráðuneytisins og SÁÁ en önnur þjónusta skorin niður.

Friður í suður-Súdan

Sameinuðu þjóðirnar munu staðsetja þúsundir hermanna í Suður-Súdan þegar ríkisstjórnin í Khartoum, höfuðborg Súdans, og byltingarhreyfingin í suðrinu hafa skrifað undir friðarsamning.

Kindur mótmæla

Um það bil 1200 kindur ráfuðu um götur Madrídar í gær, 21. nóvember, til að vekja athygli á kröfu um verndun á árstíðabundnum flutningi búpenings milli beitilanda á láglendi og hálendi, en það er aldagömul hefð á Spáni.

Sigurbjörn fluttur í Mosfellsbæinn

Sigurbjörn Sævar Grétarsson sem nú bíður dóms fyrir kynferðislega misnotkun á ungum drengjum á Patreksfirði hefur fengið sér raðhús í Mosfellsbæ. Raðhúsið er við hliðina á barnaleikvelli. Uggur er í brjóstum nágranna sem óttast áreiti gegn börnum sínum og barnabörnum.

Háð hreinu umhverfi

Ný skýrsla um mannlíf á norðurslóðum var kynnt á Nordica hóteli í gær. Samantekt skýrslunnar var eitt af forgangsmálum Íslands í formennsku Norðurskautsráðsins árin 2002 til 2004.

Segir gæsluna vanta rekstrarfé

Guðjón Arnar Kristjánsson, formaður Frjálslynda flokksins, segir Landhelgisgæsluna ekki hafa nægjanlegt fjármagn til rekstrar. Áður en farið verður út í byggingu nýs varðskips segir hann að tryggja verði fjármagn í þann rekstur sem Landhelgisgæslan er með í dag.

Einstök efni gegn krabbameini

Í íslenskum fléttum og sjávarlífverum er að finna einstök efni gegn sýklum, veirum og krabbameini vegna þess að þær eru svo harðgerðar. Þetta hefur ný íslensk rannsókn leitt í ljós. Næsta skrefið er lyfjaframleiðsla.

Mývatnssveitin falleg í frosti

Frostið mældist 30 gráður í Mývatnssveit klukkan sex í gærmorgun. Upp úr hádegi hafði hlýnað og frostið var 22 gráður og klukkan fimm síðdegis var það 17 gráður. Fáir voru á ferli í sveitinni í gær en menn skruppu vitanlega í messu og gufubað eins og gengur. </font /></b />

Týndir í Sahara

Fimm þýskir ferðamenn fundust heilir á húfi eftir að hafa verið saknað í fjölda daga í Sahara-eyðimörkinni. Ferðalangarnir eiga yfir höfði sér kæru fyrir stuld á fornminjum.

Kúrdar drepnir

Tyrkneskir hermenn drápu tvo Kúrda sem réðust að herstöð í suðausturhluta Tyrklands í gær. Kúrdarnir skutu úr sjálfvirkum rifflum á hermennina en féllu þegar þeir svöruðu fyrir sig, samkvæmt heimildum hersins.

Safn um helförina

Safn í Jerúsalem um helförina hefur opnað heimasíðu með aðgangi að lífshlaupi um þriggja milljóna gyðinga sem deyddir voru af nasistum. Gagnasafnið er það yfirgripsmesta sinnar tegundar.

Telur gerðardóm betri leið

Kennarar líta til gerðardóms og telja niðurstöðu hans ekki geta orðið verri en nýs kjarasamnings. Reyndur samningamaður framhaldsskólakennara segir gerðardóm það versta sem gæti gerst í stöðunni. </font /></b />

Friður með vísindalegri þekkingu

Nýjar Sameinaðar þjóðir verða stofnaðar í dag. Þeim er ætlað að koma á varanlegum friði í heiminum.

Kusu tengsl við Vesturlönd

Útgönguspár seinni umferðar forsetakosninga í Úkraínu sem voru í gær benda til þess að Viktor Júsjenko beri sigur úr býtum.

Nauðsyn að huga að nemendunum

Heimili og skóli - landssamtök foreldra hvetja kennara og foreldra til að sýna börnum á grunnskólaaldri nærgætni og umhyggju nú þegar þau hafi aftur sest á skólabekk eftir langt verkfall kennara.

Ráðherra hlusti á launþega

Formaður BSRB segir nær að forsætisráðherra hlusti á kröfur launþega í stað þess að skammast út í þá. Í ræðu sinni á miðstjórnarfundi Framsóknarflokksins í gær boðaði forsætisráðherra verri stöðu í efnahagsmálum, ef allir fengju jafnmiklar launahækkanir og kennarar.

Spjallvefur kennara opnaður

Spjallþráður kennara á vef Kennarafélags Reykjavíkur hefur legið niðri frá því á mánudag. Hann verður settur upp í dag, segir Ólafur Loftsson, formaður félagsins.

Þorskeldi framtíð Vestfjarða

Þorskeldi er vel á veg komið hjá fyrirtækinu Þóroddi í Tálknafirði. Því er spáð að eldinu vaxi ásmegin og verði jafnvel undirstaða atvinnulífsins eftir fimmtán ár. Þorskurinn er alinn á loðnu og etur úr lófa gjafara sinna. </font /></b />