Haukar komnir upp í Lengjudeildina

Guðjón Pétur Lýðsson tók við þjálfun Hauka í vetur og liðið hefur átt góðu gengi að fagna undir hans stjórn.

Sigurinn í dag var sá fimmti í röð hjá Haukum í 2. deildinni. Þeir eru með átta stiga forskot á toppi hennar þegar þremur umferðum er ólokið.

Sigurður Hrannar Þorsteinsson skoraði þrennu fyrir Hauka í leiknum í dag og Jón Gísli Stefánsson og Ólafur Darri Sigurjónsson sitt markið hvor.

Hjörtur Freyr Ævarsson og Rúnar Helgi Björnsson skoruðu fyrir Dalvík/Reyni sem er í 9. sæti deildarinnar.

Selfoss er í 2. sæti deildarinnar með 36 stig, þremur stigum á undan Kára sem er í 3. sætinu.