Stór hluti barna enn á sam­félags­miðlum hálfu ári eftir bannið

Börnum yngri en 16 ára hefur verið meinaður aðgangur að tíu helstu samfélagsmiðlunum í Ástralíu síðan 10. desember 2025, en það er almennt viðurkennt að mörg þeirra geti enn nálgast og notað bönnuðu smáforritin.

Í umfjöllun BBC segir að Ástralir ætli því að uppfæra löggjöf sína og samkvæmt því geti netöryggisstofnun þeirra geta krafið samfélagsmiðlafyrirtæki um sönnunargögn fyrir því hvaða ráðstafanir þau hafi gripið til til að framfylgja banninu. Í fréttinni segir að fimm miðlar, og meint brot þeirra, séu til rannsóknar í dag. Það eru Facebook, Instagram, Snapchat, TikTok og YouTube.

Í frétt BBC segir að þó svo að bannið hafi verið tilkynnt með fyrirvara og látum hafi yfirvöldum reynst erfitt að framfylgja því. Í febrúar heimsótti BBC skóla í Sydney þar sem meirihluti nemenda sem notuðu samfélagsmiðla fyrir bannið sögðust enn hafa aðgang.

Sjö af hverjum tíu enn á samfélagsmiðlum

Þá er í fréttinni vísað í skýrslu netöryggisnefndar, sem er óháð eftirlitsstofnun þjóðarinnar, um að sjö af hverjum tíu börnum undir 16 ára aldri sem voru með reikning á samfélagsmiðlum fyrir bannið hefðu enn „einhvern aðgang“.

Í yfirlýsingu sinni á laugardag viðurkenndi ríkisstjórnin sumar þessara áskorana og sagði að harðari viðurlög væru sönnun þess að hún væri að „herða róðurinn gegn miðlum sem gera ekki nóg“. Aukin eftirlitsvöld netöryggisstofnunarinnar ættu að styðja við „skilvirkari rannsóknir og hugsanlegar aðgerðir“.

Anthony Albanese, forsætisráðherra Ástralíu, sagði í yfirlýsingu í gær að breytt umræða í bæði Ástralíu og alþjóðlega vekti hjá honum von en að ljóst væri að stóru samfélagsmiðlafyrirtækin væru ekki að gera nóg til að framfylgja lögunum.

„Það eru enn of mörg börn á samfélagsmiðlum.“

Frá því að Ástralía tilkynnti um og innleiddi sitt bann hafa fleiri lönd gefið út að þau muni fylgja í kjölfarið. Til dæmis Bretland en í júní á þessu ári tilkynnti Keir Starmer, fráfarandi forsætisráðherra Bretlands, að hann myndi setja á svipað bann fyrir börn yngri en 16 ára, með áformum um að það tæki gildi vorið 2027.

Næturbann við skruni

Ekki hefur enn verið gefinn út tæmandi listi yfir þá miðla sem verða fyrir áhrifum, en ríkisstjórnin sagði að bannið myndi ná yfir þá miðla „sem hafa þann tilgang að gera félagsleg samskipti möguleg og leyfa notendum að birta efni“. Þá sagði í yfirlýsingu stjórnvalda að þau væru að skoða hvort innleiða ætti bann að næturlagi og aðgerðir til að stöðva endalausa skrunun fyrir þá sem eru yngri en 18 ára sem hluta af löggjöfinni.

Á Íslandi hefur ekki verið tilkynnt um samfélagsmiðlabann en bæði ríkisstjórn og borgarstjórn í Reykjavík hafa tilkynnt um símabann í grunnskólum frá og með haustinu. Forysta Kennarasambands Íslands hefur gagnrýnt það og sagst hafa áhyggjur af innleiðingu bannsins. Þá segja þau önnur mál meira aðkallandi en símabann innan skólakerfisins. Foreldrar hafa á sama tíma fagnað banninu.