Þrjár opnunarhátíðir á HM og stór­stjörnur á þeim öllum

Shakira mun koma fram ásamt listamanninum Burna Boy fimmtudaginn 11. júní í Mexíkóborg. Atriðið fer fram áður en Mexíkó og Suður-Afríka hefja leik í fyrsta leik mótsins, að því er BBC greinir frá.

Áður hafði verið tilkynnt að Shakira, Madonna og K-popp hljómsveitin BTS muni koma fram í hálfleikssýningunni í úrslitaleik mótsins.

Kólumbíumaðurinn J Balvin og suðurafríska söngkonan og lagahöfundurinn Tyla eru meðal þeirra sem einnig munu koma fram á opnunarhátíðinni í Mexíkó.

Opnunarhátíðir verða haldnar í hverju gestgjafalandanna þriggja. Í Kanada munu meðal annarra Michael Bublé og Alanis Morissette koma fram áður en Kanada mætir Bosníu og Hersegóvínu þann 12. júní.

Í Bandaríkjunum munu poppstjarnan Katy Perry og rapparinn Future koma fram áður en Bandaríkin mæta Paragvæ sama dag.