„Hún er í af­neitun“

Hólmfríður Dóra er efst á stigalista alþjóða skíðasambandsins og hefði því átt að fá úthlutað sæti Íslands á Vetrarólympíuleikunum sem hefjast á Ítalíu í næstu viku. En vegna meiðslanna sem hún varð fyrir í síðasta mánuði ákvað stjórn SKÍ að senda annan keppanda.

Hólmfríður braut bein í sköflungi á æfingu í byrjun desember og gekkst undir aðgerð. Hún segir endurhæfinguna hafa gengið vel og stefndi sjálf að því að taka þátt á Ólympíuleikunum. Í viðtali við Vísi í gær lýsti hún yfir gríðarlegum vonbrigðum með ákvörðunina.

Formaður Skíðasambandsins, Gísli Reynisson, segir ákvörðunina ekki hafa átt að koma Hólmfríði á óvart. Hún hafi verið tekin út frá fyrirliggjandi gögnum, læknisskýrslu sem sagði hana ekki hæfa til keppni.

„Hún er í afneitun frekar en hitt. Hún er með þessa skýrslu og í henni stendur að það sé læknisfræðilegt mat að hún sé ekki hæf til keppni. Hún er með það haldreipi að hún telji sig vera hæfa, að hún verði í standi þarna 12. febrúar þegar risasvigið fer fram“ sagði Gísli í samtali við Vísi.

„Hún fór í skoðun 15. janúar og fór svo aftur í myndatöku síðar. Þar kemur fram að beinið er enn þá brotið. Læknisfræðilegt mat mælir ekki með keppni“ sagði hann einnig og vitnaði svo beint í læknisskýrsluna máli sínu til stuðnings.

„Ekki áhættunnar virði“

Hólmfríður Dóra lýsir annarri upplifun af sínum samtölum við lækna og sjúkraþjálfara. Hún segir þau hafa verið jákvæð og stefnan sett á keppni, en stjórn SKÍ hafi tekið fram fyrir hendur hennar og ákveðið hvað sé best fyrir hennar langtíma hagsmuni.

Gísli ítrekaði að sætið á Ólympíuleikana sé úthlutað af stjórn og ákvörðunin hafi verið tekin út frá fyrirliggjandi gögnum.

„Þó að íþróttamaðurinn telji sig geta keppt þá er það alveg ljóst að beinið er ekki fullgróið og miðað við þá krafta og það álag sem er í risasvigsbrautinni í Cortina, einni erfiðustu risasvigsbraut í heimi, þá var það metið að það væri ekki áhættunnar virði.“

Hver er áhættan?

„Ef hún keppir þá eru auknar líkur á að hnéð gefi sig, þá eru einnig auknar líkur á að hún detti með þeim afleiðingum að meiðsli hljótist af því. Vissulega kemur það fram að sjúkraþjálfarinn hennar segir hana vera að koma mjög vel út úr endurhæfingunni… En Skíðasambandið byggir sitt mat á, að stærstum hluta, lækni sem telur hana ekki hæfa til keppni, miðað við hvað er stutt frá slysi… Stjórn Skíðasambandsins var ekki tilbúin til þess að senda hana í þá keppni miðað við ástandið á henni. Þrátt fyrir að við teljum hana vera okkar bestu skíðakonu og erum rosalega sorgmædd yfir þessu öllu.“

Funduðu tíu dögum áður og báðu um betri gögn

Hólmfríður stefndi sjálf á keppni en fékk símtal á mánudagskvöld þar sem henni var tilkynnt um ákvörðunina. Hún segir það hafa verið mikið áfall.

Hefði ekki verið hægt að tækla þetta áfall betur með henni Hólmfríði?

„Það var alveg búið að funda með henni. Tíu dögum, að minnsta kosti, áður, var umræða eftir fund hjá alpagreinanefnd. Þá voru fyrstu skilaboðin, þó að þau hafi ekki verið endanleg, að hún þyrfti að koma með betri gögn svo það væri hægt að gefa henni grænt ljós. Hvorki Skíðasambandið né ÍSÍ hefur lent í þessum aðstæðum, þær eru erfiðar og það eiga allir eftir að læra af þessu. Það hefði örugglega verið hægt að gera eitthvað öðruvísi í ferlinu, alveg klárlega.“

„Hreint út sagt gjörsamlega galin framkoma“

Eins og kemur fram að ofan er Hólmfríður allt annað en sátt með niðurstöðuna. Það er unnusti hennar líka, skíðagöngukappinn Dagur Benediktsson sem er að fara að keppa á Vetrarólympíuleikunum. Hann segir framkomuna gjörsamlega galna.

Verður ekkert vandræðaleg stemning þarna úti á Ítalíu?

„Nei ég held ekki. Ég á ekki von á því. Auðvitað er þetta leiðinlegt en þetta er ekkert persónulegt eða neitt svoleiðis. Hólmfríður er mjög faglegur íþróttamaður og tekur þessu bara af ótrúlegu æðruleysi“ sagði Gísli.