Um 6.000 flótta­menn og hælis­leit­endur á Ís­landi

Þetta er meðal þess sem kemur fram í svörum dómsmálaráðherra við fyrirspurn Sigmundar Davíðs Gunnlaugssonar, formanns og þingmanns Miðflokksins.

Ráðherra segist ekki geta svarað því hversu margir þeirra sem fengið hafa íslenska ríkisborgararétt án þess að hafa hlotið hann við fæðingu eða ættleiðingu séu búsettir á Íslandi, þar sem öflun þeirra gagna kalli á sérvinnslu af hálfu Hagstofunnar.

Sigmundur spurði meðal annars að því hversu margir hefðu búsetu eða dvalarleyfi á Íslandi á grundvelli umsóknar um alþjóðlega vernd en samkvæmt upplýsingum frá Útlendingastofnun voru 4.020 einstaklingar með dvalarleyfi hér á landi á grundvelli tímabundinnar verndar vegna fjöldaflótta í lok árs 2024 og 2.353 á grundvelli alþjóðlegrar verndar og viðbótarverndar.

Þeir sem fengu tímabundna vernd vegna fjöldaflótta eru Úkraínumenn vegna innrásar Rússa sem hófst í febrúar árið 2022.

Þá voru 4.392 einstaklingar með dvalarleyfi hér á landi á grundvelli fjölskyldusameiningar í lok árs 2024. Bæði íslenskir ríkisborgarar og erlendir ríkisborgarar með dvalarleyfi á landinu eiga rétt á fjölskyldusameiningu. 

Rúmur meirihluti fjölskyldusameininga tengist Íslendingum eða EES-borgurum innanlands, að því er kom fram í skýrslu sem dómsmálaráðherra kynnti í dag.

Þá voru 1.105 með dvalarleyfi á grundvelli náms og menningarskipta, 1.469 á grundvelli atvinnuþátttöku og 6.183 af öðrum ástæðum, þ.m.t. einstaklingar með ótímabundið dvalarleyfi, breskir ríkisborgarar sem bjuggu á Íslandi fyrir Brexit og einstaklingar með dvalarleyfi á grundvelli mannúðarsjónarmiða.

Fréttin hefur verið uppfærð. Í upphaflegri útgáfu hennar sagði að flóttamenn, hælisleitendur og fjölskyldur þeirra væru um tíu þúsund talsins. Inni í þeirri tölu voru einstaklingar með dvarleyfi á grundvelli tímabundinnar verndar vegna fjöldaflótta, alþjóðlegrar verndar og viðbótarverndar auk fjölskyldusameiningar. Dvalarleyfi á grundvelli fjölskyldusameiningar eru hins vegar ekki einskorðuð við hælisleitendur eða flóttamenn. Þetta hefur verið leiðrétt í fréttinni.