Spilaði með KV í gær en má spila með KR í dag

Birgir Steinn skipti úr KR í KV þann 16. júlí. Hann hefur verið meiddur mikið í sumar og spilaði þrjá leiki með KV í þriðju deildinni til að koma sér í form. Þann síðasta í gærkvöldi en Birgir var í byrjunarliði KV í 4-4 jafntefli gegn Augnablik.

Hann skipti svo aftur úr KV í KR eftir leikinn í gærkvöldi og fékk leikheimild skráða í dag, 26. júlí.

„Eru þessi skipti lögleg?“ spyr Þórður Einarsson, yfirþjálfari hjá Þrótti og formaður þjálfaranefndar KSÍ, á samfélagsmiðlinum X.

„Skil ekkert, hélt líka að ekki væri hægt að kalla til baka fyrr en í næsta glugga“ skrifar Sævar Pétursson, framkvæmdastjóri KA, við færsluna.

Skiptin eru lögleg vegna þess að félagaskiptagluggar neðri deilda og efri deilda eru ekki þeir sömu.

Félagaskiptagluggi neðri deilda er opinn frá 5. febrúar til 31. júlí en sumarfélagaskiptagluggi Bestu deildarinnar er opinn frá 17. júlí til 13. ágúst.

Birgir Steinn skipti úr KR í KV þann 16. júlí, í neðri deilda glugganum.

Hann skipti svo aftur til baka, úr KV í KR, þegar Bestu deildar glugginn var opinn.

Félagaskiptin flokkast því í sitt hvoran félagaskiptagluggann og eru ekki ólögleg en þetta staðfesti Guðni Þór Einarsson, starfsmaður á innanlandssviði KSÍ sem sér um mótamál, félagaskipti og leikmannasamninga.

Birgir Steinn verður löglegur leikmaður KR þegar liðið mætir Breiðablik á Meistaravöllum á eftir. Það yrði þá hans fjórði leikur á ellefu dögum, fyrir tvö mismunandi félög. 

Leikurinn hefst klukkan fimm og verður í beinni útsendingu á Sýn Sport.