„Stærsta hindrunin er ein­ræði Infantino“

Marchi tók nýlega við formannsstóli FIFPro af David Afanzo í kjölfar háværs ákalls eftir breytingum innan þeirra. Um 66 þúsund fótboltamenn víðs vegar um heim eiga aðild að samtökunum.

Áhyggjur af álagi leikmanna á efsta stigi hafa aukist undanfarin misseri og ný heimsmeistarakeppni félagsliða sætt sérlega mikilli gagnrýni. Marchi var valinn til að taka við af Afanzo vegna kröfu um bætt réttindi og meiri hvíldatíma. Hann þótti líklegri til að standa í hári þeirra sem valdið hafa hjá knattspyrnusamböndum heimsins.

„Stærsta hindrunin fyrir FIFPro í dag er einræði forseta FIFA,“ segir Marchi í viðtali við The Athletic.

Chelsea vann fyrstu HM félagsliða í þeirri mynd sem keppnin birtist í sumar. Keppnin hafði sætt gagnrýni sem mánuðum skipti í aðdragandanum. Hún lengir tímabil leikmanna stærstu liða heims, sem margir hverjir leika hátt í 70 leiki á tíu mánaða tímabili auk þess að stytta sumarleyfi.

Keppnin bætist við HM og EM sem fara fram á fjögurra ára fresti hvort, og má því gera ráð fyrir að evrópskir leikmenn á efsta stigi leiki sumarmót fram í júlí þrjú ár af hverjum fjórum.

Fyrsta HM félagsliða fór fram í Bandaríkjunum í sumar þar sem Infantino og Donald Trump, Bandaríkjaforseti, voru í forgrunni stóran hluta móts.

Leikmenn Juventus fóru í furðulega heimsókn í Hvíta húsið í fylgd Infantino, FIFA opnaði skrifstofu í Trump-turni á meðan mótinu stóð og þá var Trump miðpunkturinn í fagnaðarlátum leikmanna Chelsea er þeir lyftu heimsmeistarabikarnum, eða Infantino-bikarnum, þar sem ekki þótti duga að grafa nafn hans einu sinni á bikarinn heldur á tveimur stöðum.

Chelsea hafði svo með sér eftirlíkingu af bikarnum til Lundúna, á meðan upprunalegi gripurinn varð eftir hjá Bandaríkjaforseta í Hvíta húsinu.

Lifi í öðrum veruleika

Eftir að hafa boðað breytingar á spilltri FIFA-stofnun við embættistöku sína árið 2017 hefur forsetinn undið hratt ofan af breytingum til lýðræðislegri starfshátta og samhliða því orðið sífellt tengdari umdeildum heimsleiðtogum.

„Infantino lifir í sínum eigin heimi, það eina sem skiptir hann máli eru þessi stóru sjónarspil. Hann hlustar ekki á leikmenn eða viðurkennir þarfir þeirra. Ég get ekki setið rólegur á meðan fólk þjáist. Margir sögðu mér að ég ætti ekki að tala. En ég fylgi sannfæringu minni. Ég er þrautseigur. Og ég er ekki hræddur við valdstjórnina,“ segir Marchi um forsetann.

Undir lok heimsmeistaramótsins stóð FIFA að fundi um velferð leikmanna en athygli vakti að fulltrúum FIFPro var ekki boðið á fundinn. Köldu andar milli Marchi og Infantino, en forsetinn á einnig í deilum við Aleksandr Ceferin, forseta UEFA, sem sniðgekk heimsmeistaramótið alfarið.

Misskipting auðs

Úrslitaleikur heimsmeistaramótsins var eini leikurinn af 63 sem seldist upp. Mótið einkenndist af hálftómum stúkum en FIFA hefur lagt mikla áherslu á hversu vel hafi heppnast til. Sambandið hafi selt 2,5 milljón miða á mótinu og rakað inn um tveimur milljörðum dala. Marchi segir fótbolta einkennast af misskiptingu auðs.

„Við erum á 21. öldinni og þúsundir leikmanna fá enn ekki greitt. Á meðan fagnar FIFA metsölu miða. Leyfum þeim að halda sína veislu, en fólkið sem byggði upp leikinn ætti líka að fá greitt,“ segir Marchi og bætir við:

„Fótbolti er einkennist af djúpstæðu óréttlæti. Hann er óréttlátur. Og við erum í starfsgrein sem endar við 35 ára aldur, með heilt líf framundan.“

FIFA sýni ljósið og feli skuggana

Marchi segist áður hafa borið áhyggjur sínar upp beint við stjórnendur FIFA. Það hafi ekki verið til neins. Hann skorar á Infantino að rökræða við sig á opinberum vettvangi, en býst tæplega við að því tilboði verði tekið.

„Ég myndi rökræða við hann hvar sem er,“ sagði Marchi. „Hvaða blaðamaður sem er, hvaða miðill sem er, í hvaða formi sem er. Látum myndavélarnar rúlla. Látum heiminn heyra báðar hliðar. Því það sem FIFA kynnir er síaður veruleiki. Þeir sýna þér ljósin, en fela skuggana.“