Bindur vonir við nýja manninn: „Ekki með svona leik­mann í liðinu í dag“

Í gær var greint frá því að KR hefði fest kaup á Amin frá Njarðvík en sá hefur farið geisi­lega vel af stað í Lengju­deildinni á yfir­standandi tíma­bili og skorað þrjú mörk í fyrstu fjórum um­ferðum deildarinnar.

Amin er sonur Al­mir Cosic sem lék með HK á árum áður. Þar er Amir upp­alinn en skipti til Njarðvíkur í upp­hafi árs 2024. Hann er sóknar­sinnaður leik­maður fæddur árið 2005 og á að baki 33 leiki fyrir Njarðvík í öllum keppnum.

Amin mun ganga til liðs við KR þegar að félags­skipta­glugginn opnar að nýju í júlí og er til mikils ætlast af honum í Vestur­bænum.

„Fljótur og leikinn kant­maður sem getur gefið okkur aukna vídd í sóknar­leiknum,“ sagði Óskar Hrafn í viðtali eftir 4-2 tap gegn Stjörnunni í Bestu deildinni í gær. „Við erum ekki með svona leik­mann í liðinu í dag. Við bindum miklar vonir við hann, höfum fylgst með honum í tölu­verðan tíma og teljum okkur vita hvernig við getum best nýtt hans hæfi­leika. Við hlökkum mikið til að fá hann í raðir KR þegar að félag­skipta­glugginn opnar.“