Þeir bestu (3. sæti): Sann­kallaður Benjamin Button

3. Óskar Örn Hauksson

Fyrir hörmungarárið 2007 fékk KR nokkra sterka leikmenn eins og venjan var á þeim árum. Rúnar Kristinsson, Pétur Marteinsson, Jóhann Þórhallsson og Atla Jóhannsson. Og svo Óskar Örn Hauksson, 22 ára kantmann úr liði Grindavíkur sem féll tímabilið á undan. Minnst bar kannski á þeim félagaskiptum en þau reyndust þegar uppi var staðið þau bestu í sögu KR og ein þau bestu í sögu efstu deildar.

Óskar lék fimmtán tímabil með KR og er bæði leikja- og markahæsti leikmaður félagsins í efstu deild. Hann er jafnframt langleikjahæstur í sögu efstu deildar, aðeins átta leikmenn hafa skorað meira og bara tveir lagt upp fleiri mörk. Óskar varð þrisvar sinnum Íslandsmeistari með KR og fjórum sinnum bikarmeistari. Og hann var valinn leikmaður ársins 2019, þá 35 ára. Þetta er ein svakaleg ferilskrá.

Óskar var næstum því fallinn á sínu fyrsta tímabili í KR en sumarið 2008 lék hann alla 27 leiki liðsins í deild og bikar. Skot hans í uppbótartíma bjó til sigurmarkið í bikarúrslitaleiknum gegn Fjölni. Tímabilið á eftir fór KR aðeins of seint í gang en þegar það gerðist héldu liðinu engin bönd. Sóknarleikur liðsins í seinni umferðinni var stórkostlegur með Björgólf Takefusa í fantaformi fremstan, Guðmund Benediktsson fyrir aftan hann, Gunnar Örn Jónsson á hægri kantinum, Óskar Örn og Guðmund Reyni Gunnarsson á þeim vinstri, Baldur Sigurðsson að keyra inn í teiginn af miðjunni og Bjarna Guðjónsson að stýra umferðinni.

KR lenti í 4. sæti í deild og 2. sæti í bikar tímabilið 2010 en 2011 fékk KR-inga undir stjórn Rúnars Kristinssonar ekkert stöðvað. Óskar meiddist reyndar um mitt mót eftir að hafa verið frábær fram að því en KR vann tvöfalt. KR varð aftur Íslandsmeistari með miklum yfirburðum 2013 þar sem Óskar skoraði sjö mörk í deildinni.

KR varð bikarmeistari 2014 en næstu ár voru frekar slöpp hjá liðinu. Óskar hélt samt dampi og vel það. Hann skoraði samtals 23 mörk tímabilin 2015-17 og eftir nokkuð rólegt sumar 2018, endurkomutímabil Rúnars, sýndi hann allar sínar bestu hliðar og var besti leikmaður deildarinnar 2019. Óskar skoraði sjö mörk fyrir KR sem vann deildina með fjórtán stiga mun. Hann var þá orðinn fyrirliði KR og staða hans í sögu félagsins orðin trygg.

Óskar spilaði tvö ár í viðbót með KR og sló leikjamet Birkis Kristinssonar í efstu deild 2020. Hann lék í eitt ár með Stjörnunni, eitt með Grindavík í B-deildinni og dúkkaði svo óvænt upp sem fertugur spilandi styrktarþjálfari hjá Víkingi í fyrra og var hársbreidd frá því að verða Íslands- og bikarmeistari með liðinu.

Óskar var með frábæran vinstri fót og gríðarlega skotfastur og sparkviss. Hann skoraði 88 mörk í efstu deild og skoraði á nítján tímabilum sem enginn annar hefur afrekað. Síðasta tímabil var það eina þar sem hann skoraði ekki í efstu deild.

Óskar entist líka fáránlega vel og varð betri eftir því sem árin færðust yfir. Til marks um það skoraði hann fimmtíu af 88 mörkum sínum í efstu deild eftir að hann komst á fertugsaldurinn. Sannkallaður Benjamin Button.