Sagði sínum mönnum að skjóta á Onana við hvert tæki­færi

André Onana, markvörður United, gerði sig sekan um slæm mistök í markinu sem Matej Vydra skoraði fyrir Plzen. Eftir leikinn viðurkenndi Miroslav Koubek, þjálfari liðsins, að hann hefði sagt sínum mönnum að láta reyna á Onana eins oft og mögulegt var.

„Það er planið okkar. Ég sagði þeim að skjóta á markið við hvert tækifæri,“ sagði Koubek.

Staðan var markalaus í hálfleik en á 48. mínútu kom Vydra Plzen yfir eftir að Pavel Sulc komst inn í sendingu Onanas frá marki. Rasmus Højlund kom United hins vegar til bjargar en hann skoraði tvö mörk sem dugðu Rauðu djöflunum til sigurs í Tékklandi.

Onana hefur spilað vel fyrir United í vetur en hefur gert sig sekan um slæm mistök í síðustu tveimur leikjum liðsins. Á laugardaginn fékk hann á sig tvö neyðarleg mörk þegar United laut í lægra haldi fyrir Nottingham Forest, 2-3, í ensku úrvalsdeildinni.

Næsti leikur United er borgarslagur gegn Manchester City á Etihad á sunnudaginn. Strákarnir hans Rubens Amorim eru í 13. sæti ensku úrvalsdeildarinnar með nítján stig eftir fimmtán leiki.