Fal­legur golf­völlur á sögu­legum slóðum

Í sumar ætlum við að kynnast nokkrum af þeim fjölda spennandi golfvalla sem hægt er að finna víða um land og gaman væri að prófa í sumarfríinu en hægt er að leika golf á yfir 60 völlum hér á landi. Kálfatjarnarvöllur er golfvöllur vikunnar á Vísi.

Mikil mannvist einkennir Kálfatjarnarvöll en þar má finna tóttir, forna túngarða og aðrar grjóthleðslur segir Húbert Ágústsson, vallarstjóri Kálfatjarnarvallar. „Í raun marka grjóthleðslurnar flestar brautirnar hér. Þær eru á minjaskrá og því friðaðar. Auk þess er golfhringurinn spilaður umhverfis Kálfatjarnarkirkju og kirkjugarðinn. Það má því segja að upplifun af mikilli mannvist og sögu henni tengdri og nálægð guðs sé því mikil. Það er mikil saga á svæðinu og er henni gerð góð skil á brautarskiltum vallarins auk almenns fróðleiks um svæðið.“

Heimamenn eru duglegir að sækja völlinn auk félagsmanna úr stærri klúbbum á höfuðborgarsvæðinu þar sem oft er erfitt að fá rástíma. „Svo koma hingað oft fyrirtækjahópar sem leigja þá völlinn undir starfsmannamót og eru þá með mat á eftir, enda er stutt hingað frá höfuðborgarsvæðinu og öðrum bæjum á Reykjanesi.“

Hann segir alla aðstöðu fyrir kylfinga vera til fyrirmyndar. „Við rekum veitingasölu í golfskálanum sem opin er öllum sem leið eiga um svæðið, jafnt kylfingum sem almennum gestum á svæðinu. Unnið er að merkingum á svæðinu og verða þar tilgreindar mannvistarleifar og minjar frá fyrri árum og er þetta hluti af því að gera svæðið aðgengilegra ferðafólki.“