Fimm­tán milljarða króna lán­taka borgarinnar sam­þykkt

Í tilkynningu frá Reykjavíkurborg í gær sagði að borgarráð hafi samþykkkt þann 29. febrúar síðastliðinn heimild til borgarstjóra til að sækja um lán til CEB að fjárhæð 100 milljónir evra til fjármögnunar á viðhaldsátaki í húsnæði grunnskóla, leikskóla og frístundar, samanber áætlun sem upprunalega var lögð fram í borgarráði þann 4. nóvember 2021. 

Framkvæmdastjórn CEB hafi samþykkt lánveitinguna þann 25. mars og nú liggi skilmálar lánasamnings fyrir.

Borgarstjórn samþykkti lántökuna með öllum atkvæðum meirihlutans.

Einar Þorsteinsson mælti fyrir tillögu um lántökuna og lagði áherslu á það að hún rúmaðist vel innan lánaáætlunar í fjármálaáætlun. Þá sagði hann að fjármögnunin gæti jafnvel verið ódýrari en býðst á innlendum markaði.

Fulltrúar minnihlutans ekki sáttir

Kolbrún Áslaugar Baldursdóttir, borgarfulltrúi Flokks fólksins, sagði á fundinum að borgin nyti ekki lengur lánstraust hér á landi og þurfi því að leita út fyrir landssteinana.

„Vegna slakrar fjármálastöðu borgarinnar verður að grípa til þessa örþrifaráðs. Á síðustu árum hefur Reykjavíkurborg að mestu fjármagnað fjárfestingar með útgáfu skuldabréfa á innlendum markaði. Sérstakt þykir að þróunarbankinn sem hefur það að markmiði að styrkja samfélög sem eiga undir högg að sækja hyggist nú veita lán til borgar sem hefur trassað að halda við skólabyggingum í áraraðir þrátt fyrir að geta talist velmegunarborg,“ sagði í bókun sem Kolbrún las upp á fundinum.

Þá lögðu borgarfulltrúar Sjálfstæðisflokks mikla áherslu á það að borgin verði sig fyrir gengissveiflum.