Bölvar Í­þrótta­dóm­stólnum: „Þeir láta reiði sína bitna á lítilli stúlku“

Valieva féll á lyfjaprófi sem var tekið tveimur mánuðum fyrir síðustu Vetrarólympíuleika en það kom ekki í ljós fyrr en á miðjum leikum. Valieva hafði þá hjálpað Rússum að vinna gull í liðakeppninni. Hún fékk að keppa í einstaklingskeppninni en réð ekki við álagið og komst ekki á pall.

Valieva var sannkallað undrabarn og þótti mjög líkleg til að vinna gullið á leikunum þrátt fyrir að vera aðeins fimmtán ára gömul. Hún var að gera hluti sem höfðu ekki sést áður á ísnum.

Árangursaukandi hjartalyf fannst í sýni Valieva en hennar vörn var að hún hefði drukkið úr sama glasi og afi hennar sem fengi þetta efni í hjartameðalinu sínu.

Alþjóða Íþróttadómstólinn tók þessa afsökun ekki gilda og taldi Valievu og hennar fólk ekki hafa sannað það að hún hafi tekið efnið inn án vitundar.

Heimsfrægi rússneski þjálfarinn Tatiana Tarasova er mjög ósátt við dóminn og bölvaði Íþróttadómstólnum.

„Glæpahyski og löglaust fólk. Auðvitað verðum við að áfrýja þessari ákvörðun. Þú verður að berjast á móti úrþvættum með þeirra eigin aðferðum,“ sagði Tarasova í viðtali við rússneska miðilinn Championat.

„Kamila mun fá að keppa í okkar landi. Hún er sterk stelpa og mun komast í gegnum allt saman,“ sagði Tarasova sem segir þetta vera svo ósanngjarnt fyrir Valievu.

„Fjandinn hafi þessi skítseiði. Þeir láta reiði sína bitna á lítilli stúlku með það að markmiði að reyna að ná höggi á okkar þjóð,“ sagði Tarasova.

„Þetta er ómannúðleg ákvörðun. Það á ekki að vera hægt að fá þetta út. Þetta er óhugsandi grimmd. Ég bölva þeim sem ákváðu þetta. Vonandi fer þetta allt vel hjá Kamilu því hún er ótrúlega hæfileikarík stelpa. Hún átti þetta ekki skilið,“ sagði Tarasova.

Fjögurra ára bann Valievu gildir frá 25. desember 2021. Það þýðir að hún sleppur úr banninu fyrir Ólympíuleikana á Ítalíu árið 2026 það er ef rússneskt íþróttafólk fær leyfi til að keppa á þeim leikum.