Menning

Þróaði með sér dellu fyrir míkra­fóna­smíði

Dóra Júlía Agnarsdóttir skrifar
Baldvin Hlynsson opnar sýninguna Tónbil í Hörpu í dag.
Baldvin Hlynsson opnar sýninguna Tónbil í Hörpu í dag. Aðsend

„Sýningin tengir saman myndlist, tónlist og eðlisfræði og kjarni hennar er að fanga útlit tónbilanna tólf á sínu myndræna formi,“ segir fjöllistamaðurinn Baldvin Hlynsson, sem opnar sýninguna Tónbil í Hörpu í dag klukkan 18:00. Sýningin er hluti af HönnunarMars og stendur til ellefta maí næstkomandi.

Baldvin stundaði nám við Konunglega tónlistarháskólann í Stokkhólmi en þar kviknaði áhugavert áhugamál hjá honum.

„Þegar ég var í náminu þróaði ég með mér dellu fyrir míkrafónasmíði á milli þess sem ég var í skólanum eða að æfa mig.“

Míkrafónn sem Baldvin smíðaði sjálfur.Aðsend

Fjölbreytt form út frá sveiflusjá

Verkefnið Tónbil spratt upp úr tilraunum sem Baldvin var að gera með sveiflusjá, sem er tæki sem breytir hljóðbylgjum í myndrænt graf á X og Y ás. 

„Ég notaði sveiflusjá til að gera mælingar á míkrafónunum sem ég var að smíða og á einhverjum tímapunkti datt mér í hug að prófa að spila tónbil í gegnum sveiflusjána. 

Mér til mikillar furðu urðu til allavegana form. Þessi form voru ekki kringlótt eins og endanlegu formin urðu en engu að síður voru þau symmetrísk og reglubundin.“

Baldvin að störfum.Aðsend

Áhugi á samfélagsmiðlum

Baldvin fór í kjölfarið að deila formunum á Instagram hjá sér og segir hann að fólk hafi verið mjög áhugasamt um þetta og spurt ýmissa spurninga.

„Eftir það fór ég að stúdera þetta nánar og fann, eftir töluverða leit, leið til að gera formin kringlótt. Mér fannst það skemmtilegt, þar sem öll tónbilin voru nú eins í laginu en mismunandi að innan.“

Verkin hans Baldvins koma í tveimur mismunandi litapalletum, annars vegar form í lit á svörtum bakgrunni og hins vegar form í svörtu á hvítum bakgrunni.

„Fyrir lituðu verkin valdi ég litinn sjálfur eftir eigin tilfinningu. Þau koma líka í tveimur stærðum en hvert verk er framleitt í takmörkuðu upplagi af sex.

Ég ramma verkin inn sjálfur af mikilli nákvæmni með svokallaðri float mount aðferð, sem felur í sér að verkin fljóta inni í rammanum en ramminn er sérsmíðaður, svartur og spónlagður álrammi.“

Stór þríund eftir Baldvin.Aðsend

Hverri mynd fylgir texti um viðeigandi tónbil sem fjallar um tilfinninguna og hughrifin sem það tónbil hefur þótt vekja í aldanna rás sem og útskýringu á litavalinu og tengsl við viðeigandi lit í listfræðilegu og táknrænu samhengi. 

Auk þess fylgir QR kóði með hverri mynd svo hægt sé að sjá og heyra tónbilið birtast á sveiflusjá og rannsaka hvernig það hegðar sér. Eintökin eru númeruð og árituð.


Tengdar fréttir

Hönnunar­Mars hefst á morgun: 100 sýningar og 400 þátt­tak­endur

Opnunarhóf HönnunarMars fer fram á morgun, miðvikudaginn 3. maí, í Hörpu klukkan 17:00. Lilja D. Alfreðsdóttir, menningar- og viðskiptaráðherra, Dagur B. Eggertsson, borgarstjóri og Halla Helgadóttir, framkvæmdastjóri Miðstöðvar hönnunar og arkitektúrs setja hátíðina með formlegum hætti og eru öll velkomin.






Fleiri fréttir

Sjá meira


×