Innlent

Leyndin um Lindar­hvol sögð „lög­fræði­legir loft­fim­leikar Birgis“ á þinginu

Jakob Bjarnar skrifar
Birgir Ármansson ásamt Katrínu Jakobsdóttur forsætisráðherra sem hefur verið fremur þögul um þetta mál, leyndina um Lindarhvol, sem er orðin að sjálfstæðum ímyndarvanda fyrir ríkisstjórna og þingið. Fréttastofa spurði Katrínu um hennar afstöðu í dag og þá vísaði hún til þess að málið væri á forræði forsætisnefndar.
Birgir Ármansson ásamt Katrínu Jakobsdóttur forsætisráðherra sem hefur verið fremur þögul um þetta mál, leyndina um Lindarhvol, sem er orðin að sjálfstæðum ímyndarvanda fyrir ríkisstjórna og þingið. Fréttastofa spurði Katrínu um hennar afstöðu í dag og þá vísaði hún til þess að málið væri á forræði forsætisnefndar. vísir/vilhelm

Jóhann Páll Jóhannsson, þingmaður Samfylkingarinnar, lagði fyrir viku fram skriflega fyrirspurn um Lindarhvol ehf. til forseta Alþingis. En svo brá við að Birgir Ármannsson forseti leyfði ekki fyrirspurnina.

Enn bætist einn steinn í vörðuna hvað varðar leyndina um Lindarhvol. Jóhann Páll hefur hins vegar með vísan til þingskaparlaga náð að knýja fram atkvæðagreiðslu í þingsal um hvort fyrirspurnin skuli leyfð. Birgir staðfest að sú atkvæðagreiðsla fari fram.

Spurður um á hvaða forsendum Birgir hafi hafnað fyrirspurninni segir Jóhann Páll í samtali við Vísi forseta Alþingis bera því við að honum finnist hún ekki fjalla um „stjórnsýslu Alþingis“ heldur málefni Ríkisendurskoðunar. 

Hin forboðna fyrirspurn

„Mitt svar við því er að þetta er ekki lengur vinnuplagg Ríkisendurskoðunar eftir að Alþingi fékk það afhent, og þetta er augljóslega andlag stjórnsýslumáls á Alþingi vegna ákvarðana sem hafa verið teknar um hvort skuli birta greinargerðina eða ekki.“

Fyrirspurn Jóhanns Páls til forseta Alþingis er svohljóðandi:

1. Hvað kemur fram í greinargerð setts ríkisendurskoðanda um að starfsemi Lindarhvols ehf. frá 2018?

2. Hvaða atriði taldi settur ríkisendurskoðandi að gæfi tilefni til frekari upplýsingaöflunar og mats á því hvort rétt hefði verið staðið að málum?

3. Hvaða athugasemdir gerði settur ríkisendurskoðandi við söluferli hlutar ríkisins í félaginu Klakka ehf.?

4. 5. Hvað taldi settur ríkisendurskoðandi gefa til kynja að hlutur ríkisins í Klakka hefði verið seldur á undirverði.

„Þetta er óþolandi“

Nokkur umræða varð um málið á þingi nú rétt í þessu um þetta atriði og ítrekaði Þórhildur Sunna Ævarsdóttir fyrirspurn sína um fylgigagn forsætisnefndar í bréfi til stjórnar Lindarhvols, álitsgerð lögfræðistofunnar Magna um hvort löglegt væri að leggja greinargerð Sigurðar Þórðarsonar setts ríkisendurskoðanda um Lindarhvol, yrði lögð fram. Ekki verður annað af ráðið af gögnum sem Vísir hefur undir höndum en að Magni telji það standast lög að greinargerðin sé fram lögð. Stjórn Lindarhvols hefur hins vegar lagst alfarið gegn því að greinargerðin verði birt.

Jóhann Páll vísar til þingskapa og vill að greidd verði um það atkvæði á þinginu hvort fyrirspurn hans verði leyfði.vísir/vilhelm

Björn Leví Gunnarsson þingmaður Pírata tók jafnframt til máls og tók undir orð Jóhanns Páls og Þórhildar Sunnu. Halldóra Mogensen þingmaður Pírata sagði með ólíkindum hversu mikið Birgir legði á sig, með ótrúlegum lögfræðilegum klækjum, til að birta greinargerðina ekki. „Birtum þetta bara. Ég krefst þess að forseti finni leiðir til þess. Þetta er óþolandi.“

Arndís Anna Kristínardóttir Gunnarsdóttir þingmaður Pírata bætti um betur og kallaði þetta „lögfræðilega loftfimleika“ Birgis.

Alþingi Stjórnsýsla Starfsemi Lindarhvols

Tengdar fréttir

Birgir Ár­­manns­­son ver enn leyndina um Lindar­hvol

Þingmenn Samfylkingarinnar og Pírata gerðu harða hríð að Birgi Ármannssyni forseta Alþingis í gær og kölluðu eftir því að á þinginu að greinargerð Sigurðar Þórðarsonar setts ríkissaksóknara yrði birt. Birgir telur það ýmsum vandkvæðum bundið.

Þor­­steinn Páls­son botnar ekkert í Lindar­hvols­­leyndinni

Þorsteinn Pálsson, fyrrverandi forsætisráðherra, telur furðu sæta að Birgir Ármannsson telji sig geta setið á greinargerð Sigurðar Þórðarsonar setts ríkisendurskoðanda. Hann segir málið allt hið furðulegasta og telur Sigurð geta sent þingmönnum hverjum um sig erindi sitt.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið