„Föstur kveikja ekki á auka brennslu, þær virka einfaldlega því fólk borðar minna“

„Það er mikið af misvísandi upplýsingum á netinu og fullyrðingar um hitt og þetta sem standast ekki. Þegar ég fór sjálfur í átak á sínum tíma ákvað ég að fara í einkaþjálfaraskólann til að fá botn í hvað er rétt og hvað er rangt. Ég leita mér alltaf áreiðanlegra heimilda sem byggja á raunverulegum rannsóknum og byggi mína vinnu og ráðleggingar til fólks á vísindalegum grunni,“ segir Stefán Barði og bendir á nokkur atriði sem hann segir ekki standast. 

„Til dæmis er oft verið að selja eða ráðleggja fólki sérstaka detox-kúra sem eiga að losa okkur við eiturefni en líkaminn sér einfaldlega um þetta sjálfur án aðstoðar. Við höfum lifur og nýru til þess og húðin gegnir líka hlutverki í þessu. Safar bæta þar engu við. Allir megrunarkúrar ganga út á það sama, hvort sem það heitir fasta eða ketó eða eitthvað annað, þeir ganga út á að neyta færri hitaeininga en þú brennir. Föstur kveikja ekki á auka brennslu eins og margir halda, þær virka einfaldlega því fólk er að borða minna,“ segir Stefán og bætir við að sykur sé ekki óvinurinn.

„Sykur er ekki óvinurinn í sjálfu sér heldur er það oftar en ekki samspil sykurs og fitu sem gerir matinn girnilegan og fólk borðar of mikið af honum. Fólk borðar ekki sykur beint upp úr skál með skeið en þegar hann er kominn í súkkulaði, ís, og kökur eða annað getur maður innbyrt meira. Það er heldur ekki rétt að sætuefni séu slæm fyrir okkur eins og oft er haldið fram. Samkvæmt rannsóknum sem ég hef kynnt mér er ekkert að sætuefnum,“ segir Stefán Barði. 

Svindldagar vond hugmynd 

„Ég vil hjálpa fólki á vísindalegum grunni við að létta sig og koma sér í form og borða rétt. Það þýðir yfirleitt lítið eða ekkert að fara í stranga megrun eða á einhvern kúr, yfirleitt springa allir á endanum. Svindldagar eru hræðileg hugmynd, að vera í aðhaldi alla vikuna en innbyrða svo á einum degi allar þær kaloríur sem þú hafðir forðast. Fólk þarf að breyta því hvernig það nálgast mat og borða hollt u.þ.b 80% af tímanum og leyfa sér 20% af tímanum.“

Hvernig er best að byrja þegar fólk vill taka sig á?

„Ég mæli með því að byrja ekki of geyst. Ekki skella þér á ketó-kúr og mæta tólf sinnum í viku í ræktina, það verður bara til þess að fólk springur á því og þá líður því illa.  Setjum okkur viðráðanleg markmið og náum þeim. Það er til dæmis gott að stefna á að missa eitt kíló fyrsta mánuðinn og svo tvö kíló þann næsta. Mæta tvisvar í viku í ræktina fyrsta mánuðinn og svo þrisvar í viku þann næsta, fara að labba meira og auka skrefafjöldann og bæta svo jafnt og þétt í. 

Varðandi mataræðið ætti að auka próteininntöku um 25 grömm á dag, bæta í trefjarnar og auka grænmeti og ávexti en ekki neita sér um uppáhaldsmatinn sinn þó hann sé óhollur, hafa hann inni á matseðlinum en í minna magni. Við þekkjum það öll að ef við segjum við okkur sjálf „ekkert súkkulaði“ þá gengur flestum illa að hætta að hugsa um súkkulaði. Svo er alltaf gott að bóka fyrsta mánuðinn með einkaþjálfara til að koma sér af stað, læra að gera æfingarnar rétt og fá viðeigandi prógramm til að fylgja. Hægt er að haft beint samband við mig á netfangið stefanbardi3@gmail.com og einnig hægt að fylgja mér á Instagram og Tik tok  undir „stefanb.einkathjalfari" þar sem ég gef góð ráð.“