Mútumál skekur Evrópuþingið: Heitir því að engum verði hlíft

Saksóknarar í Belgíu hafa samkvæmt BBC sakað yfirvöld í Katar um að beita mútum til að reyna að hafa áhrif á starfsemi Evrópusambandsins. Þeir segja sérstaka áherslu hafa verið lagða á að ná til aðstoðarmanna á þinginu.

Eva Kaili, ein af fjórtán varaforsetum þingsins, og þrír aðrir þingmenn voru handteknir um helgina og hafa þau verið ákærð fyrir mútuþægni og fjárþvætti. Tveir aðrir sem voru handteknir og yfirheyrðir hafa ekki verið ákærðir.

Fundu 150 þúsund í reiðufé

Lögreglan í Belgíu hefur gert húsleit á fjölmörgum heimilum og skrifstofum á þinginu frá því á föstudaginn. því um helgina, lagði hald á minnst sex hundruð þúsund evrur í reiðufé, samkvæmt frétt Politico. Á einu heimili fundust hundrað og fimmtíu þúsund evrur í reiðufé.

Sjá einnig: Varaforseti Evrópuþingsins grunaður um spillingu

Lögreglan hefur þar að auki lokað á aðgang tíu starfsmanna þingsins að tölvukerfi þess til að varðveita gögn vegna rannsóknarinnar og hefur hald verið lagt á tölvur og síma.

Neita sök

Auk Kaili var Francesco Giorgi, maki hennar og starfsmaður þingsins, handtekinn. Eigur þeirra og fjölskyldu Kaili í Grikklandi hafa verið frystar af yfirvöldum þar.

Húsleit var einnig gerð hjá þingmanninum Marc Tarabella í dag. Hann var ekki handtekinn og segist ekkert hafa gert af sér en honum hefur þó verið vikið úr sendinefnd þingsins gagnvart Arabíuskaganum.

Einnig er vitað að Pier Antonio Panzeri, fyrrverandi þingmaður, er til rannsóknar auk forsvarsmanns verkalýðsfélags í Brussel og ítalsks aðila sem ekki hefur verið nafngreindur.

Fjórmenningarnir neita sök. Það gera yfirvöld í Katar einnig. Í yfirlýsingu sem birt var um helgina sögðu ráðamenn þar að yfirvöld færu ávallt eftir alþjóðalögum og reglum.

Ötull stuðningsmaður Katar

Loucas Fourlas, þingmaður frá Kýpur steig fram um helgina og sagði að Kaili hefði beðið sig um að gera breytingar á skýrslu Evrópuþingsins um mannréttindi í Katar. Hann sagði að tillögur hennar hefðu snúið að því að draga úr ásökunum um mannréttindabrot í Katar.

Í ræðu í nóvember þar sem verið var að ræða meint mannréttindabrot yfirvalda í Katar gegn farandverkafólki sem kom að því að byggja leikvanga og aðra innvið vegna Heimsmeistaramótsins, sagði hún Katar mjög framarlega þegar kæmi að réttindum verkafólks.

Hún ferðaðist einnig nýverið til Katar og hitti ráðherra þar.

Í kjölfar þeirrar heimsóknar sótti hún fund dómsmála- og innansambandsnefndar ESB. Hún situr ekki í nefndinni en mætti samt til að styðja tillögu um að íbúar Katar og Kúveit fái að ferðast innan Schengen-svæðisins án vegabréfsáritana.

Mögulega toppurinn á ísjakanum

Gagnsæissérfræðingar segja mögulegt að það sem komið hafi í ljós hingað til gæti einungis verið toppurinn á ísjakanum. Sérfræðingar sem vakta Evrópusambandið segja mikla þörf á endurbótum hjá þinginu og Evrópusambandinu og vísa til þess að þingið hafi lengi komið í veg fyrir að stofnun verði mynduð til að vakta starfsemi þingsins.

Framkvæmdastjórn Evrópusambandsins hefur lengi frestað birtingu tillögu um stofnun nokkurs kona innri endurskoðenda ESB sem hafi vald til að rannsaka meinta spillingu og refsa fólki fyrir brot.

Í ræðu sem hún hélt í dag sagði Metsola að undanfarnir dagar hefðu verið einhverjir þeir erfiðustu í starfi hennar. Hún hét því að málið yrði rannsakað til hlítar og að engum yrði hlíft. Þá verði skoðað að gera breytingar til að auka gegnsæi og verja gegn spillingu.

Evrópuþingið er skipað 705 þingmönnum frá 27 ríkjum og er eina stofnun ESB sem kosið er til.

Í frétt Washington Post segir að innan stofnana ESB sé talað um málið sem stærsta hneyksli sambandsins á undanförnum árum og er vísað til ummæla Annalenu Baerbock, utanríkisráðherra Þýskalands, um að trúverðugleiki Evrópusambandsins sé í húfi.

Victor Orbán, hinn umdeildi forsætisráðherra Ungverjalands, hæddist að Evrópusambandinu í kjölfar þess að ásakanirnar litu dagsins ljós. Framkvæmdastjórn ESB lagði nýverið til að umfangsmiklar fjárveitingar til Ungverjalands yrðu frystar vegna áhyggja af stöðu lýðræðisins þar í landi.

Orbán hefur líka verið gagnrýndur fyrir að stöðva aðstoð ESB til Úkraínu.