Menning

Hafa selt samtals 27 milljónir bóka á heimsvísu

Hólmfríður Gísladóttir skrifar
Arnaldur, Yrsa og Ragnar hafa skapað íslenska krimmanum góðan orðstír erlendis.
Arnaldur, Yrsa og Ragnar hafa skapað íslenska krimmanum góðan orðstír erlendis.

Arnaldur Indriðason, Yrsa Sigurðardóttir og Ragnar Jónsson hafa selt samtals um 27 milljónir bóka á heimsvísu. Arnaldur hefur gefið út 26 bækur á 26 árum, Yrsa 24 bækur á 25 árum og Ragnar fjórtán bækur á fjórtán árum.

Frá þessu er greint í Morgunblaðinu í dag.

Rithöfundarnir þrír eiga það sameiginlegt að hafa sérhæft sig í glæpasögum, þótt Yrsa hafi einnig skrifað sex barnabækur.

„Ég fæ ekki betur séð en hann hafi selt meira en aðrir íslenskir glæpasagnahöfundar til samans á erlendri grundu og þannig mætti segja að hann hafi að nokkru leyti dregið vagninn,“ hefur Morgunblaðið eftir Agli Erni Jóhannessyni hjá Forlaginu um nokkra yfirburði Arnaldar þegar kemur að sölu.

Pétur Már Ólafsson, útgefandi hjá Bjarti/Veröld, bendir hins vegar á gríðarlegar vinsældir Yrsu og Ragnars í Þýskalandi. Bráðin, eftir Yrsu, sé til að mynda búin að vera tíu vikur samfleytt á metsölulista Spiegel í haust.

„Ragnar hefur selt gríðarlega á síðustu þremur árum erlendis og munar þar auðvitað mest um að hann var um tíma með þrjár af mest seldu bókum Þýskalands í sömu vikunni og er eini íslenski höfundurinn sem hefur komið bók inn á metsölulista Sunday Times. Þá nýtur hann gríðarlegra vinsælda í Frakklandi,“ segir Pétur.






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.