Napoli ó­stöðvandi | Ó­trú­leg dramatík í Madríd og Lundúnum

Napoli lagði Rangers örugglega 3-0 þökk sé tvennu Giovanni Simeone og Leo Skiri Østigård undir lok leiks. Sigurinn þýðir að Napoli er með 15 stig á toppi A-riðils en þarf enn að ná í stig gegn Liverpool í lokaumferðinni til að tryggja toppsæti riðilsins.

Í B-riðli mættust Atl. Madríd og Bayer Leverkusen í höfuðborg Spánar. Eftir 4-0 sigur Porto á Club Brugge fyrr í dag þá þurftu bæði lið á sigri að halda til að komast áfram í 16-liða úrslit.

Leikurinn var hin mesta skemmtun þó svo að mesta dramatíkin hafi verið eftir að leikurinn var flautaður af. Moussa Diaby kom Leverkusen yfir en Yannick Carrasco jafnaði metin fyrir heimamenn. Callum Hudson-Odoi kom gestunum hins vegar yfir á nýjan leik skömmu síðar og staðan 1-2 í hálfleik.

Rodrigo de Paul jafnaði metin fyrir heimamenn í upphafi síðari hálfleiks og þannig var hún allt þangað til undir lok leiks. Atlético sendi alla fram undir lok leiks í von um að vinna leikinn og eiga möguleika á að komast áfram.

Dómari leiksins flautaði af en í ljós kom að boltinn hafði farið í hendina á leikmanni Leverkusen eftir fyrirgjöf og vítaspyrna dæmd þó svo að leikurinn hafði verið flautaður af.

Carrasco fór á punktinn en Lukáš Hrádecký varði meistaralega. Boltinn barst til Saúl Ñíguez sem skallaði í átt að marki en boltinn fór í slána og þaðan kom skot að marki sem fór í Carrasco og yfir markið. Í kjölfarið var flautað til leiksloka og lokatölur 2-2 á Metropolitano-vellinum í Madríd. Þar með er ljóst að Brugge og Porto eru komin áfram í 16-liða úrslit á meðan Atl. Madríd og Leverkusen berjast um sæti í Evrópudeildinni.

Í hinum æsispennandi D-riðli hélt dramatíkin áfram. Eintracht Frankfurt vann óvæntan 2-1 sigur á Marseille þökk sé mörkum Daichi Kamada og Randal Kolo Muani. Matteo Guendouzi með mark gestanna.

Í Lundúnum mættust svo Tottenham Hotspur og Sporting frá Portúgal. Marcus Edwards, fyrrum leikmaður Tottenham, kom gestunum yfir í fyrri hálfleik og var það eina mark leiksins þangað til Rodrigo Bentancur jafnaði metin þegar tíu mínútur voru til leiksloka.

Þegar sex mínútur voru komnar fram yfir venjulegan leiktíma skoraði Harry Kane og allt ætlaði um koll að keyra. Eftir langa skoðun komust dómarar leiksins að því að Kane væri rangstæður í aðdraganda marksins og það dæmt af. Í kjölfarið var Antonio Conte, þjálfari Tottenham, rekinn af velli fyrir að missa hausinn og urða yfir dómarateymi leiksins.

Þegar ein umferð er eftir þá geta enn öll lið D-riðils komist áfram í 16-liða úrslit. Tottenham er á toppnum með átta stig, Sporting og Frankfurt eru með sjö stig og Marseille er á botninum með sex stig.